1.Цаг агаар:
Өнгөрсөн хоногт: Улаанбаатар хот болон Архангай, Баянхонгор, Булган, Говьсүмбэр, Дархан-Уул, Дорнод, Дундговь, Орхон, Завхан, Сэлэнгэ, Төв, Хөвсгөл аймгуудын нутгаар бороо орсон.
Өнөөдөр: Төв болон зүүн аймгуудын нутгаар үүлэрхэг, бусад нутгаар солигдмол үүлтэй. Баруун болон төвийн аймгуудын нутгийн зарим газар, зүүн аймгуудын ихэнх нутаг болон говийн аймгуудын нутгийн зүүн хэсгээр бороо орно. Салхи баруун хойноос 6-11 м/с, говь, талын нутгаар 14-16 м/с, зарим газраар борооны өмнө түр зуур ширүүснэ. Алтай, Хангай, Хөвсгөлийн уулархаг нутаг, Завхан голын эх, Хүрэнбэлчир орчим, Идэр, Туул, Тэрэлж голын хөндийгөөр 14-19 градус, говийн бүс нутгийн өмнөд хэсэг, Дорнод-Дарьгангын тал нутаг, Халх голын хөндийгөөр 26-31 градус, бусад нутгаар 19-24 градус дулаан байна.
Улаанбаатар хотод: Үүлэрхэг. Бага зэргийн бороо орно. Салхи баруун хойноос 7-12 м/с. 17-19 градус дулаан байна.
Төлөв байдал: 3-нд баруун аймгуудын нутгийн хойд хэсэг, төвийн аймгуудын нутгийн зарим газар, зүүн аймгуудын нутгийн ихэнх хэсгээр, 4, 6-нд нутгийн хойд хэсгээр, 5-нд баруун болон зүүн аймгуудын нутгийн хойд хэсгээр бороо, зарим газраар дуу цахилгаантай аадар бороо орно. Салхи ихэнх хугацаанд 6-11 м/с, зарим газраар борооны өмнө түр зуур ширүүснэ. Ихэнх хугацаанд нутгийн хойд хэсгээр сэрүүхэн Алтай, Хангай, Хөвсгөл, Хэнтэйн уулархаг нутаг, Хүрэнбэлчир орчим, Завхан голын эх, Туул, Тэрэлж голын хөндийгөөр шөнөдөө 3-8 градус, өдөртөө 14-19 градус, говийн бүс нутгийн өмнөд хэсгээр шөнөдөө 15-20 градус, өдөртөө 27-32 градус, бусад нутгаар шөнөдөө 8-13 градус, өдөртөө 20-25 градус дулаан байна.
2.Гал түймэр:
Хувийн өмчид гарсан: Ховд аймгийн Булган сумын Алагтолгой багийн Ярантын заставын “Гурвын хаалт” гэдэг газар /аймгийн төвөөс баруун зүгт 441 км-т, сумын төвөөс баруун хойд зүгт 41 км-т/ автомашин шатаж байна гэсэн дуудлагыг 08.01-ний өдрийн 20:25 цагт хүлээн авсан. Тус аймгийн Онцгой байдлын газрын Булган сум дахь Онцгой байдлын хэлтсийн Гал түймэр унтраах, аврах 38 дугаар ангийн алба хаагчид 41 км замыг туулан 21:03 цагт очиж, тус аймгийн Булган сумын төвөөс Ярантын заставын чиглэлд зорчиж явсан иргэн А-ийн “Тоёота Камри” загварын суудлын автомашин шатаж байсныг 10 минут ажиллаж унтраасан.
Төв аймгийн Зуунмод сумын Дэнж багийн 1 дүгээр байранд амбаар шатаж байна гэсэн дуудлагыг 08.02-ны өдрийн 00:55 цагт хүлээн авсан. Тус аймгийн Онцгой байдлын газрын Гал түймэр унтраах, аврах 24 дүгээр ангийн алба хаагчид 00:58 цагт очиж, иргэн Ж-ийн 4х3 метрийн хэмжээтэй амбаарт хуучин хувцас, модон ор шатаж байсныг 5 минут ажиллаж унтраасан.
Дорноговь аймгийн Сайншанд сумын 6 дугаар багийн Дампилын 13 дугаар гудамжинд иргэн Г-ийн “Тоёота Приус-30” загварын суудлын автомашины хөдөлгүүрийн хэсэг шатаж байна гэсэн дуудлагыг 08.02-ны өдрийн 04:23 цагт хүлээн авсан. Тус аймгийн Онцгой байдлын газрын Гал түймэр унтраах, аврах 33 дугаар ангийн алба хаагчид 1.2 км замыг туулан 04:27 цагт очиж, 7 минут ажиллаж унтраасан.
3.Байгаль цаг агаарын аюулт үзэгдэл:
Үер – Уруйн үер: Дархан-Уул аймгийн Орхон сумын 1 дүгээр багт /аймгийн төвөөс хойд зүгт 36 км-т/ 08.01-ний өдөр усархаг бороо орсны улмаас уруйн үерт автозамын зорчих хэсэг сэтэрч, цөмөрсөн тухай дуудлагыг 08.01-ний өдрийн 11:42 цагт хүлээн авсан. Тус аймгийн Орхон сумын 1 дүгээр багийн Шарын голын гүүрээс ус зайлуулах суваг хүртэл 300 метр автозамын зорчих хэсэг сэтэрч, цөмөрсөн байсныг Сэлэнгэ аймгийн “Сэлэнгэ АЗЗА” ТӨХК-ийн 12 ажилтан, 3 техник хэрэгсэлтэй засварлан ажиллаж байна.
Дархан-Уул аймгийн Дархан сумын 6, 9 дүгээр багт 08.01-ний өдөр усархаг бороо орсны улмаас Хээтэй хорооллын 4, 4А дугаар байрны зоорийн давхар, дулаан дамжуулах шугам хоолойн суваг уруйн үерийн усанд автсан тухай дуудлагыг 08.01-ний өдрийн 12:10 цагт хүлээн авсан. Тус аймгийн Онцгой байдлын газрын Дархан сум дахь Гал түймэр унтраах, аврах 22 дугаар ангийн алба хаагчид, “Санда трейд” ХХК-ийн ажилтнууд ажиллаж, тус байрны зоорийн давхрын усыг соруулж, дулаан дамжуулах шугам хоолойн сувагт 72 м3 шороо асгаж сэргээн засварласан.
4.Эрэн хайх, аврах ажиллагаа:
Эрэн хайх ажиллагаа /сураггүй болсон/: Нийслэлийн Налайх дүүргийн 6 дугаар хороо, “Тэнгэрийн энерги бясалгалын төв” 07.31-ний өдрийн 22:35 цагийн орчим Хан-Уул дүүргийн 2 дугаар хороо, 27 дугаар байрны иргэн О /25 настай, эмэгтэй/ сураггүй болсон тухай дуудлагыг 08.01-ний өдрийн 11:04 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 28 дугаар анги, тус дүүргийн Цагдаагийн хэлтсийн алба хаагчид, ар гэрийнхэн мөн өдрийн 14:40 цагаас эхлэн “Тэрэлжийн даваа” гэдэг газраас “Тэнгэрийн энерги бясалгалын төв” гэдэг газар хүртэл 10 км-т явганаар болон автомашинтай эрэн хайх ажиллагааг зохион байгуулсан боловч үр дүнд хүрээгүй тул мөн өдрийн 20:06 цагт түр зогсоосон. 08.02-ны өдрийн 08:30 цагт эрэн хайх ажиллагааг эхлүүлсэн.
Нийслэлийн Баянзүрх дүүргийн 11 дүгээр хороо, Маршалын гүүрээс зүүн зүгт 100 метрт “Туул” голд эмэгтэй хүний цогцос байна гэсэн дуудлагыг 08.01-ний өдрийн 11:40 цагт хүлээн авсан. Нийслэлийн Аврах анги-105-ын завьт эргүүлийн алба хаагчид 5 км замыг туулан 11:46 цагт очиж, “Туул” голд Чингэлтэй дүүргийн 12 дугаар хорооны иргэн А /18 настай, эмэгтэй/-ийн цогцсыг гаргаж, тус дүүргийн Цагдаагийн 3 дугаар хэлтсийн ахлах мөрдөгч, цагдаагийн ахмад Д.Алтайгаар ахлуулсан бүрэлдэхүүнд шилжүүлэн өгсөн.
5.Мэдээлэл:
Өвөрхангай аймгийн Төгрөг сумын Мазар багийн “Адгийн худгийн задгай” гэдэг газар /аймгийн төвөөс баруун урд зүгт 100 км-т, сумын төвөөс баруун хойд зүгт 31 км-т/ 07.31-ний өдрийн 14:00 цагийн орчим хүчтэй хуй салхины улмаас малчин Д-ийн 5 ханатай гэр нурсан тухай мэдээллийг 08.01-ний өдрийн 10:40 цагт хүлээн авсан. Тус сумын Засаг даргын Тамгын газрын ажилтнуудыг очиход М /6 настай, эмэгтэй толгойн хэсэг шалбаралттай/, Н/7 настай, эрэгтэй нурууны хэсэг шалбаралттай/ нарт эмнэлгийн анхан шатны тусламж үзүүлэн аав Д-т хүлээлгэн өгсөн.
Дорнод аймгийн Баян-Уул сумын Өвөр-Эрээн багийн “Улиастайн гарам” гэдэг газар /аймгийн төвөөс хойд зүгт 260 км-т, сумын төвөөс хойд зүгт 60 км-т/ Онон” гол үерлэсний улмаас иргэн Э-ын өвөлжөө, байшин усанд автсан тухай мэдээллийг 08.01-ний өдрийн 19:00 цагт хүлээн авсан. Мэдээллийн дагуу тус сумын Засаг даргын Тамгын газраас 08.02-ний өдөр хохирлыг тогтоож ажиллана.
ОНЦГОЙ БАЙДЛЫН ЕРӨНХИЙ ГАЗАР