1.Цаг агаар:
Өнгөрсөн хоногт: Өмнөговь аймгийн Ханбогд суманд бага зэргийн цас орсон. Бусад нутгаар цаг агаар тогтуун байсан.
Өнөөдөр: Нутгийн хойд хэсгээр үүлшиж цас орж, цасан шуурга шуурна. Бусад нутгаар солигдмол үүлтэй, цас орохгүй. Салхи нутгийн баруун хэсгээр баруун хойноос, бусад нутгаар баруун өмнөөс секундэд 6-11 метр, зарим газраар секундэд 14-16 метр, Алтайн салбар уулс болон Арц богдын өвөр хоолойгоор түр зуур секундэд 18-20 метр хүрч ширүүснэ. Увс нуур болон Дархадын хотгор, Завхан голын эх, Хүрэнбэлчир орчим, Тэс голын хөндийгөөр 24-29 градус, Хангай, Хөвсгөл, Хэнтэйн уулархаг нутаг, Идэр, Эг, Үүр, Хараа, Ерөө, Туул, Хэрлэн голын хөндий, Дарьгангын тал нутгаар 16-21 градус, цас багатай энгэр ээвэр газраар 4-9 градус, бусад нутгаар 11-16 градус хүйтэн байна.
Улаанбаатар хотод: Үүлшинэ, цас орохгүй. Салхи баруун хойноос секундэд 5-10 метр, өдөртөө зарим үед секундэд 14-16 метр хүрч ширүүснэ. Шөнөдөө Яармаг-Сонгины орчмоор 32-34 градус, бусад хэсгээр 24-26 градус, өдөртөө 13-15 градус хүйтэн байна.
Төлөв байдал: 12-нд баруун аймгуудын нутгийн зүүн хэсэг, төв болон зүүн аймгуудын нутгийн зарим газраар, 13-нд нутгийн хойд хэсгээр, 14-нд баруун аймгуудын ихэнх нутаг, төв болон зүүн аймгуудын нутгийн зарим газраар, 15-нд нутгийн зарим газраар цас орж, цасан шуурга шуурна. Салхи 12, 13-нд, 14-нд говийн бүс нутгаар секундэд 14-16 метр хүрч ширүүснэ. Увс нуурын болон Дархадын хотгор, Завхан голын эх, Хүрэнбэлчир орчим, Тэс голын хөндийгөөр шөнөдөө 34-39 градус, өдөртөө 24-29 градус, Алтай, Хангай, Хөвсгөл, Хэнтэйн уулархаг нутаг, Идэр, Эг, Үүр, Орхон, Сэлэнгэ, Хараа, Ерөө, Туул, Тэрэлж, Хэрлэн голын хөндий, Дарьгангын тал нутгаар шөнөдөө 28-33 градус, өдөртөө 16-21 градус, цас багатай энгэр ээвэр газраар шөнөдөө 13-18 градус, өдөртөө 3-8 градус, бусад нутгаар шөнөдөө 21-26 градус, өдөртөө 11-16 градус хүйтэн байна. 15-нд ихэнх нутгаар бага зэрэг хүйтэрнэ.
2. Гал түймэр:
Баянхонгор аймгийн Баянговь сумын Өргөн багийн 3 дугаар гудамжинд мотоцикл шатаж байна гэсэн дуудлагыг 01.10-ны өдрийн 10:40 цагт хүлээн авсан. Тус аймгийн Онцгой байдлын газрын Баянговь сум дахь Эрэн хайх, аврах бүлгийн алба хаагчид 1.5 км замыг туулан 09:54 цагт очиж 3 дугаар гудамжны иргэн Э-ийн “Дэйвүү” загварын мотоцикл шатаж байсныг 6 минут ажиллаж унтраасан.
Төв аймгийн Лүн сумын 3 дугаар багийн Тээгийн 4 дүгээр гудамжинд байшин шатаж байна гэсэн дуудлагыг 01.10-ны өдрийн 17:00 цагт хүлээн авсан. Тус аймгийн Онцгой байдлын газрын Лүн сум дахь Эрэн хайх, аврах бүлгийн алба хаагчид, орон нутгийн иргэд 1 км замыг туулан 16:58 цагт очиж иргэн Д-ийн 7х8 метрийн хэмжээтэй байшингийн дээвэр шатаж байсныг 24 минут ажиллаж унтраасан.
Баянхонгор аймгийн Баянхонгор сумын Цахир багийн хогийн цэгт автомашин шатаж байна гэсэн дуудлагыг 01.10-ны өдрийн 19:00 цагт хүлээн авсан. Тус аймгийн Онцгой байдлын газрын Гал түймэр унтраах, аврах 16 дугаар ангийн алба хаагчид 10 км замыг туулан 19:11 цагт очиж иргэн Х-ын “Тоёота Клюгер” загварын суудлын автомашин шатаж байсныг 6 минут ажиллаж унтраасан.
Нийслэлийн Хан-Уул дүүргийн 2 дугаар хороо, 22 дугаар байрны хойд талд зогсоолд автомашин шатаж байна гэсэн дуудлагыг 01.10-ны өдрийн 21:38 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 14 дүгээр ангийн алба хаагчид 1.5 км замыг туулан 21:41 цагт очиж иргэн Н-ийн “Соната-6” загварын суудлын автомашины хөдөлгүүр шатаж байсныг 5 минут ажиллаж унтраасан.
Нийслэлийн Сонгинохайрхан дүүргийн 32 дугаар хороо, “Таван толгойн түлш” ХХК руу явах замд автомашин шатаж байна гэсэн дуудлагыг 01.11-ний өдрийн 06:03 цагт хүлээн авсан.Тус дүүргийн Онцгой байдлын хэлтсийн Гал түймэр унтраах, аврах 26 дугаар ангийн алба хаагчид 10 км замыг туулан 06:14 цагт очиж иргэн Б-ын “Зебро” загварын автомашин шатаж байсныг 30 минут ажиллаж унтраасан.
3.Хүний үйл ажиллагаатай холбоотой осол:
Орхон аймгийн Баян-Өндөр сумын Бүрэнбүст багийн 19 дүгээр байр 5 дугаар давхраас хүн үсрэх гэж байна гэсэн дуудлагыг 01.11-ний өдрийн 06:07 цагт хүлээн авсан. Тус аймгийн Онцгой байдлын газрын Гал түймэр унтраах, аврах 56 дугаар ангийн алба хаагчид 4 км замыг туулан 06:11 цагт очиж иргэн Б /37 настай, эрэгтэй/ 5 давхрын тагтан дээр зогсож байсныг 13 минут ажиллан эсэн мэнд аварч аймгийн Цагдаагийн байгууллагад хүлээлгэн өгсөн.
Увс аймгийн Баруунтуруун сумын Баян-Айраг багийн “Бураагийн эх” гэдэг газар /аймгийн төвөөс зүүн урд зүгт 150 км, сумын төвөөс зүүн хойд зүгт 30 км/-т Малчин П нь 01.10-ны өдрийн 19:00 цагт гэрлүүгээ явганаар гараад сураггүй болсон тухай дуудлагыг мөн өдрийн 23:30 цагт хүлээн авсан. Тус аймгийн Онцгой байдлын газрын Гал түймэр унтраах аврах 60 дугаар ангийн алба хаагчид, Баруунтуруун сумын Засаг даргын Тамгын газрын ажилтнууд 01.10-ны өдрийн 20:30 цагаас эхлэн малчин О-н туслах малчин П /50 настай, эрэгтэй/-ийг эрэн хайх ажиллагааг зохион байгуулж Баруунтуруун сумаас зүүн хойд зүгт 35 км-т “Систем” гэдэг газраас 01.11-ний өдрийн 02:55 цагт эсэн мэнд олж сумын Засаг даргад хүлээлгэн өгсөн.
ОНЦГОЙ БАЙДЛЫН ЕРӨНХИЙ ГАЗАР