1.Цаг агаар
Өнгөрсөн хоногт: Завхан аймагт бороо орсон. Бусад нутгаар цаг агаар тогтуун байсан.
Өнөөдөр: Ихэнх нутгаар солигдмол үүлтэй. Баруун аймгуудын ихэнх нутаг, төвийн аймгуудын нутгийн баруун хэсгээр бороо, нойтон цас орж, цасан шуурга шуурна. Салхи баруун аймгуудын нутгийн баруун хэсгээр баруун өмнөөс хойш эргэж, бусад нутгаар баруун өмнөөс 7-12 м/с, Алтайн уулархаг нутаг, Арц Богдын өвөр хоолойгоор түр зуур 16-18 м/с хүрч ширүүсэж, шороон шуурга шуурна. Монгол-Алтай, Хангай, Хөвсгөлийн уулархаг нутаг, Завхан голын эх, Хүрэнбэлчир орчим, Идэр, Тэс голын хөндийгөөр 2-7 градус, Хэнтэйн уулархаг нутаг, Тэрэлж, Хэрлэн, Онон, Улз, Халх голын хөндий, Дорнодын тал нутгаар 6-11 градус, говийн бүс нутгийн өмнөд хэсгээр 16-21 градус, бусад нутгаар 9-14 градус дулаан байна.
Улаанбаатар хотод: Үүлшинэ. Хур тунадас орохгүй. Салхи баруунаас 6-11 м/с. 10-12 градус дулаан байна.
Төлөв байдал: 2-нд баруун аймгуудын нутгийн зарим газар, төв болон зүүн аймгуудын ихэнх нутгаар, 3-нд баруун аймгуудын нутгийн хойд хэсэг, төвийн аймгуудын нутгийн зарим газар, зүүн аймгуудын ихэнх нутгаар, 5-нд баруун аймгуудын нутгийн хойд, төвийн аймгуудын нутгийн баруун хойд хэсгээр бороо, нойтон цас орж, нутгийн хойд хэсгээр цасан шуурга шуурна. Салхи 2-нд нутгийн өмнөд хэсгээр түр зуур 18-20 м/с, 3-нд говь, тал, хээрийн нутгаар 15-17 м/с хүрч ширүүсэж, нутгийн өмнөд хэсгээр шороон шуурга шуурна. 2-нд нутгийн баруун хагаст, 3-нд ихэнх нутгаар, 4-нд нутгийн зүүн хагаст хүйтэрч Хөвсгөлийн уулархаг нутаг, Завхан голын эх, Идэр, Тэс голын хөндийгөөр шөнөдөө 13-18 градус хүйтэн, өдөртөө 3 градус хүйтнээс 2 градус дулаан, Алтай, Хангай, Хэнтэйн уулархаг нутаг, Хүрэнбэлчир орчим, Эг, Үүр, Хараа, Ерөө, Туул, Тэрэлж, Хэрлэн, Онон, Улз, Халх голын хөндийгөөр шөнөдөө 9-14 градус хүйтэн, өдөртөө 0-5 градус, говийн бүс нутгийн баруун өмнөд хэсгээр шөнөдөө 3-8 градус, өдөртөө 13-18 градус дулаан, бусад нутгаар шөнөдөө 4-9 градус хүйтэн, өдөртөө 4-9 градус дулаан байна.
2. Гал түймэр:
Хувийн өмчид гарсан: Төв аймгийн Зуунмод сумын Зүүндэлгэр багийн задгайд гэр шатаж байна гэсэн дуудлагыг 10.01-ний өдрийн 02:39 цагт хүлээн авсан. Тус аймгийн Онцгой байдлын газрын Гал түймэр унтраах, аврах 24 дүгээр ангийн алба хаагчид 4 километр замыг туулан, 02:48 цагт очиход, иргэн Н-ийн 5 ханатай гэр бүрэн, гэрийн хажууд байсан тус иргэний Приус-20, иргэн Ц-гийн Приус-30 загварын автомашинууд шатаж байсныг 36 минут ажиллаж унтраасан.
Нийслэлийн Сүхбаатар дүүргийн 19 дүгээр хороо, Шарга морьтын задгайд байшин шатаж байна гэсэн дуудлагыг 22:21 цагт хүлээн авсан. Сүхбаатар дүүргийн Онцгой байдлын хэлтсийн Гал түймэр унтраах, аврах 74 дүгээр ангийн алба хаагчид 5 км замыг туулан 22:27 цагт очиход иргэн Б-гийн 16х12 метрийн хэмжээтэй мансарттай 3 давхар баригдаж байсан барилгын 3 дугаар давхар, дээврийн хэсэг шатаж байсныг 4 цаг ажиллан унтраасан.
Нэмэлт 1: 22:27 цагт Тус дүүргийн Онцгой байдлын хэлтсийн Гал түймэр унтраах, аврах 34 дүгээр ангийн алба хаагчид 13 км замыг туулан 22:43 цагт очиж 3 цаг ажилласан. Нэмэлт 2: 22:40 цагт Чингэлтэй дүүргийн Онцгой байдлын хэлтсийн Гал түймэр унтраах, аврах 10 дугаар ангийн алба хаагчид 22 км замыг туулан 23:10 цагт очиж 40 минут ажилласан.
3. Ой, хээрийн түймэр:
Өвөрхангай аймгийн Тарагт сумын Арвайн тал баг “Хайрханы хишиг” гэдэг газар /аймгийн төвөөс баруун зүгт 18км, сумын төвөөс урд зүгт 20км /-т хээрийн түймэр гарсан тухай дуудлагыг 16:10 цагт хүлээн авсан. Тус аймгийн Онцгой байдлын газрын гал түймэр унтраах, аврах 12 дугаар анги, нэмэлтээр Эрэн хайх, аврах салбарын алба хаагчид, сумын Засаг даргын Тамгын газрын хүмүүс, орон нутгийн иргэд ажиллаж, 16:23 цагт түймрийг цурманд оруулан 53 минут ажиллан 17:13 цагт бүрэн унтрааж, сумын Засаг даргын орлогчид хүлээлгэн өгсөн. /нийт 10га талбай шатсан./
4. Хүний үйл ажиллагаатай холбоотой осол:
Зам, тээврийн осол: Ховд аймгийн Булган сумын Бүрэн хайрхан багийн Буурлууд гэдэг газар /аймгийн төвөөс баруун зүгт 403 км, сумын төвөөс хойт зүгт 12 км/-т Булган боомтоос Булган Сумын чиглэлд зорчиж явсан иргэн М-ийн эзэмшлийн “Норд бенз” загварын ачааны автомашин замын хажууруу унасан тухай дуудлагыг 09.30-ны өдрийн 19:15 цагт хүлээн авсан. Тус сумын Гал түймэр унтраах, аврах 38 дугаар ангийн алба хаагчид 12 км замыг туулан 19:55 цагт очиход иргэн М-ийн эзэмшлийн “Норд бенз” загварын 50 тн хүнс тээвэрлэсэн автомашин замын хажуу руу унасан, жолооч эсэн мэнд гарсан байдалтай байсныг 20 минут ажиллан автомашиныг татан босгож иргэн М-д хүлээлгэн өгсөн. Булган сум дахь сум дундын Цагдаагийн хэлтэс, Булган сумын нэгдсэн эмнэлгийн жижүүр эмч нарт тус иргэнийг хүлээлгэн өгсөн.
Төөрсөн, сураггүй болсон: Булган аймгийн Булган сум Булган багийн 6 дугаар хорооллын “Б” хэсэгт түр оршин суугч У /9 настай, эрэгтэй/ хүүхэд 09.29-ний өдрийн 14:30 цагт гэрээсээ гараад сураггүй болсон тухай мэдээллийг Цагдаагийн газраас 09.30-ны өдрийн 11:40 цагт хүлээн авсан. Тус аймгийн Онцгой байдлын газрын Эрэн хайх, аврах салбар, цагдаагийн газрын алба хаагчид, ар гэрийнхэн 12:00 цагт эрэн хайх ажиллагааг зохион байгуулж, 35 минут ажиллан 12:35 цагт У /9 настай, эрэгтэй/ хүүхдийг 6 дугаар хорооллын “А” хэсгээс эсэн мэнд олж, ар гэрийнхэнд нь хүлээлгэж өгсөн.
ОНЦГОЙ БАЙДЛЫН ЕРӨНХИЙ ГАЗАР