Австри Улсын Вена хотод төвтэй НҮБ-ын гадаад сансрын хамтын ажиллагааны байгууллага (UNOOSA), түүний хөтөлбөр болох гамшгийн менежмент, шуурхай хариу арга хэмжээнд зориулсан сансрын мэдээллийн платформ (UN-SPIDER) нь Онцгой байдлын ерөнхий газартай гамшгаас хамгаалах, эрсдэлийн бууруулах үйл ажиллагаанд орон зайн мэдээллийг нэвтрүүлэх, боловсон хүчний чадавхыг сайжруулах чиглэлээр 2014 оноос эхлэн хамтран ажиллаж байна.
Энэ хүрээнд “Ус, цаг уур, орчны судалгаа, мэдээллийн хүрээлэн”, МУЗН, НҮБ-ын хүнсний хөтөлбөр, Олон улсын гамшгийн чартер зэрэг байгууллагуудтай хамтран 10 удаагийн сургалтыг зохион байгуулж, 250 гаруй алба хаагчийг танхим болон цахимаар хамрууллаа.
Онцгой байдлын ерөнхий газар “Олон улсын гамшгийн чартер”-т албан ёсоор бүртгүүлж гишүүн болж, томоохон гамшиг, аюулт үзэгдэл, ослын үед тухайн байршил дахь бодит цаг хугацааны өндөр нарийвчлал бүхий сансрын зураг хүлээн авах, ашиглах нөхцөл бүрдсэн юм.
Мөн хамтын ажиллагааны хүрээнд холбогдох алба хаагчдыг Хятад, Энэтхэг зэрэг улсуудад сансрын болон орон зайн мэдээллийн технологийн чиглэлээр сургалтад хамруулах боломжийг бүрдүүлээд байна гэж Онцгой байдлын ерөнхий газраас мэдээллээ.
