1. Цаг агаар:
Өнгөрсөн хоногт: Нийт нутгаар цаг агаар тогтуун байлаа.
Өнөөдөр: Төв болон зүүн аймгуудын нутгийн хойд хэсгээр солигдмол үүлтэй, бусад нутгаар багавтар үүлтэй. Нийт нутгаар цас орохгүй. Нутгийн зүүн хагаст баруун хойноос, бусад нутгаар баруунаас 4-9 м/с, тал, хээрийн нутгаар 12-14 м/с хүрч ширүүснэ. Хөвсгөлийн уулархаг нутаг, Завхан голын эх, Идэр, Тэс голын хөндий, Хүрэнбэлчир орчмоор -25-30 градус, Хангай, Хэнтийн уулархаг нутгаар -17-22 градус, цас багатай энгэр ээвэр газар болон говийн бүс нутгийн өмнөд хэсгээр -8-13 градус, бусад нутгаар -14-19 градус хүйтэн байна.
Улаанбаатар хотод: Үүлшинэ, цас орохгүй. Салхи баруун хойноос 5-10 м/с, -14-16 градус хүйтэн байна.
Төлөв байдал: 12.02-ны өдөр төв болон зүүн аймгуудын нутгийн хойд хэсгээр, 03-ны өдөр Алтай, Хангай, Хөвсгөл, Хэнтийн уулархаг нутгаар ялимгүй цас орно. Салхи 02-ны өдөр говь, тал, хээрийн нутгаар 12-14 м/с хүрч ширүүснэ. Дархадын хотгор, Хүрэнбэлчир орчим, Завхан голын эх, Идэр, Тэс голын хөндийгөөр шөнөдөө -36-41 градус, өдөртөө -24-29 градус, Монгол-Алтай, Хангай, Хөвсгөл, Хэнтийн уулархаг нутаг, Эг, Үүр, Туул, Тэрэлж голын хөндийгөөр шөнөдөө -29-34 градус, өдөртөө -18-23 градус, говийн бүс нутгийн өмнөд хэсгээр шөнөдөө -18-23 градус, өдөртөө -7-12 градус, бусад нутгаар шөнөдөө -22-27 градус, өдөртөө -14-19 градус хүйтэн байна. Хугацааны сүүлчээр ихэнх нутгаар хүйтний эрч бага зэрэг суларна.
2.Гал түймэр:
ААН, байгууллагын өмчид гарсан: Нийслэлийн Сонгинохайрхан дүүргийн 5 дугаар хороо, 46 дугаар гудамжинд агуулах шатаж байна гэсэн дуудлагыг 11.30-ны өдрийн 08:56 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 26 дугаар ангийн алба хаагчдыг очиход 10х20 метрийн хэмжээтэй хүнсний агуулахын дээвэр шатаж байсныг 20 минут ажиллаж унтраасан.
– Хувийн өмчид гарсан: Нийслэлийн Сонгиохайрхан дүүргийн 13 дугаар хороо, Залуусын гудамжны 11 дүгээр байр түргэн хоолны газар шатаж байна гэсэн дуудлагыг 11.30-ны өдрийн 13:49 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 26 дугаар ангийн алба хаагчдыг очиход иргэн Э-ын 3х4 метрийн хэмжээтэй түргэн хоолны газар шатаж байсныг 20 минут ажиллаж унтраасан.
Нийслэлийн Хан-Уул дүүргийн 5 дугаар хороо, Яармагийн 20 дугаар гудамжинд байшин шатаж байна гэсэн дуудлагыг 11.30-ны өдрийн 13:17 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 30 дугаар ангийн алба хаагчдыг очиход иргэн Д-ын 5х10 метрийн хэмжээтэй байшин шатаж байсныг 1 цаг ажиллаж унтраасан.
Хэнтий аймгийн Бор-Өндөр сумын Бумбат багийн “Дэнж” хорооллын 8 дугаар гудамжинд гэр шатаж байна гэсэн дуудлагыг 11.30-ны өдрийн 06:18 цагт хүлээн авсан. Тус аймгийн Онцгой байдлын газрын Бор-Өндөр сум дахь Онцгой байдлын хэлтсийн Гал түймэр унтраах, аврах 49 дүгээр ангийн алба хаагчдыг очиход иргэн И-ын 4 ханатай гэр шатаж байсныг 20 минут ажиллаж унтраасан. Уг гал түймэрт иргэн И /28 настай, эрэгтэй/-ын гар, хөлний хэсэг түлэгдсэн тул сумын Нэгдсэн эмнэлэгт хүлээлгэн өгсөн.
Төв аймгийн Зуунмод сумын Номт баг дахь “Төв чандмань” ХХК Цахилгаан хуваарилах самбар шатаж байна гэсэн тухай дуудлагыг 11.30-ны өдрийн 12:57 цагт хүлээн авсан. Тус аймгийн Онцгой байдлын газрын Гал түймэр унтраах, аврах 24 дүгээр ангийн алба хаагчдыг очиход тус байгууллагын цахилгаан хуваарилах самбар шатаж байсныг 10 минут ажиллаж унтраасан.
Өмнөговь аймгийн Даланзадгад сумын Оюут багийн 3 дугаар гудамжинд гэр шатаж байна гэсэн дуудлагыг 11.30-ны өдрийн 19:50 цагт хүлээн авсан. Тус аймгийн Онцгой байдлын газрын Гал түймэр унтраах, аврах 21 дүгээр ангийн алба хаагчдыг очиход иргэн Ч-ын 5 ханатай гэр шатаж байсныг 7 минут ажиллаж унтраасан.
Завхан аймгийн Тосонцэнгэл сумын Улаантолгой багийн Цэнгэл хорооны 1 дүгээр гудамжинд байшин шатаж байна гэсэн дуудлагыг 11.30-ны өдрийн 21:19 цагт хүлээн авсан. Тус аймгийн Онцгой байдлын газрын Тосонцэнгэл сум дахь Онцгой байдлын хэлтсийн Гал түймэр унтраах, аврах 39 дүгээр ангийн алба хаагчдыг очиход иргэн Э-ын 5х8 метрийн хэмжээтэй байшингийн дээврийн хэсэг шатаж байсныг 20 минут ажиллаж унтраасан.
Өмнөговь аймгийн Цогт-Овоо сумын Замын шанд багийн “Баян” хорооллын 2 дугаар гудамжинд байшин шатаж байна гэсэн дуудлагыг 12.01-ний өдрийн 03:30 цагт хүлээн авсан. Тус аймгийн Онцгой байдлын газрын Гал түймэр унтраах, аврах 21 дүгээр ангийн алба хаагчдыг очиход иргэн Х-ийн 6х8 метрийн хэмжээтэй байшингийн дээвэр шатаж байсныг 20 минут ажиллаж унтраасан.
3.Хүний үйл ажиллагаатай холбоотой осол:
Төөрсөн, сураггүй болсон: Ховд аймгийн Булган сумын Алагтолгой багийн “Өвхөөдөг” гэдэг газар /аймгийн төвөөс баруун урд зүгт 445 км-т, сумын төвөөс баруун урд зүгт 65 км-т/ 11.27-ны өдрийн 12:00 цагийн орчим Алагтолгой багийн “Өвхөөдөг” гэдэг газраас Булган сумын чиглэлд зорчиж явсан 2 зорчигчтой суудлын автомашин эвдэрч, жолооч А нь тусламж гуйхаар яваад сураггүй алга болсон тухай дуудлагыг 11.30-ны өдрийн 12:05 цагт хүлээн авсан. Тус аймгийн Онцгой байдлын газрын Булган сум дахь Онцгой байдлын хэлтсийн Гал түймэр унтраах, аврах 38 дугаар ангийн алба хаагчид, сумын мэргэжлийн ангийнхан малчин А /23 настай, эрэгтэй/-ыг эрэн хайх ажиллагааг зохион байгуулахаар хөдөлсөн бөгөөд мөн өдрийн 15:05 цагт Хилийн цэргийн 0130 дугаар ангийн жижүүр Булган сум дахь Онцгой байдлын хэлтэстэй холбогдож, тус ангийн “Гурван хүүхэд” заставын хилийн харуулууд тухайн иргэний цогцсыг олж, тус сум дахь Цагдаагийн хэлтсийн мөрдөгчид хүлээлгэн өгсөн тухай мэдээлсэн.
Цас шаварт суусан: Төв аймгийн Баяндэлгэр сумын Галуут багийн “Аягын-Ам” гэдэг газар /аймгийн төвөөс зүүн зүгт 153 км, сумын төвөөс зүүн урд зүгт 45 км-т/ 2 зорчигчтой ачааны автомашин цасанд суусан тухай дуудлагыг 11.30-ны өдрийн 14:25 цагт хүлээн авсан. Нийслэлийн Багануур дүүргийн Онцгой байдлын хэлтсийн Гал түймэр унтраах, аврах 64 дүгээр ангийн алба хаагчдыг очиход “Бонго фронтиер” загварын ачааны автомашин цасанд суусан байсныг 45 минут ажиллан татан гаргасан.
Нийслэлийн Багахангай дүүргийн 1 дүгээр хороо, “Үнэгтэй” гэдэг газар 5 зорчигчтой суудлын автомашин цасанд сууж, дугуй нь хагарсан тухай дуудлагыг 11.30-ны өдрийн 18:35 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 80 дугаар ангийн алба хаагчдыг очиход Приус-20 загварын суудлын автомашин цасанд суусан байсныг 30 минут ажиллан татан гаргасан.
ОНЦГОЙ БАЙДЛЫН ЕРӨНХИЙ ГАЗАР