Завхан аймгийн Онцгой байдлын газраас “Шилдэг ахлагч-2022” тэмцээнийг Тосонцэнгэл суманд зохион байгууллаа.
Тэмцээнд Тосонцэнгэл сум дахь Гал түймэр унтраах, аврах 39 дүгээр анги, Улиастай сум дахь Гал түймэр унтраах, аврах 43 дугаар анги, Эрэн хайх, аврах бүлэг, Тэс сум дахь Гал түймэр унтраах, аврах 57 анги, Сонгино сум дахь Эрэн хайх, аврах бүлгийн нийт 15 алба хаагч оролцсон юм.
Алба хаагчид онолын мэдлэг, эмнэлгийн анхан шатны тусламж, мэргэжлийн ур чадвар, галын бэлтгэл, бие бялдар бэлтгэлжилтийн норматив, марш тусгай бэлтгэл гэсэн төрлүүдээр өрсөлдөж, аваргуудаа шалгарууллаа.
Нийлбэр дүнгээр Гал түймэр унтраах, аврах 39 дүгээр ангийн аврагч-гал сөнөөгч, ахлагч А.Дугарсүрэн тэргүүлж, Улиастай сум дахь Гал түймэр унтраах, аврах 43 дугаар ангийн аврагч-гал сөнөөгч, дэд ахлагч Т.Тавхай, Улиастай сум дахь Эрэн хайх, аврах бүлгийн жолооч-холбоочин, ахлах ахлагч Н.Баасандэмбэрэл нар удааллаа гэж Завхан аймгийн Онцгой байдлын газраас мэдээллээ.
