1. Цаг агаар:
Өнгөрсөн хоногт: Нийт нутгаар цаг агаар тогтуун байлаа.
Өнөөдөр: Ихэнх нутгаар солигдмол үүлтэй. Баруун аймгуудын ихэнх нутаг, төв болон зүүн аймгуудын нутгийн хойд хэсгээр цас орж, цасан шуурга шуурна. Бусад нутгаар цас орохгүй. Салхи Нутгийн хойд хэсгээр баруун өмнөөс баруун хойш эргэж, бусад нутгаар баруун өмнөөс 5-10 м/с, зарим газраар 12-14 м/с хүрч ширүүснэ. Увс нуур болон Дархадын хотгор, Хөвсгөл, Хэнтийн уулархаг нутаг, Завхан голын эх, Хүрэн бэлчир орчим, Байдраг, Идэр, Тэс, Халх голын хөндийгөөр -22…-27 градус, Алтай, Хангайн уулархаг нутаг, -14…-19 градус Эг-Үүр, Орхон, Туул, Тэрэлж, Хэрлэн, Онон, Улз голын хөндийгөөр -18…-23 градус, Алтайн өвөр говь орчмоор -4…-9 градус, Хангайн нурууны өвөр бэл болон говийн бүс нутгийн өмнөд хэсгээр -8…-13 градус, бусад нутгаар хүйтэн байна..
Улаанбаатар хотод: Үүлшинэ,цас орохгүй, салхи баруун хойноос 4-9 м/с. -18…-20 градус хүйтэн байна.
Төлөв байдал: 22-нд баруун аймгуудын нутгийн өмнөд, төв болон говийн аймгуудын нутгийн баруун хэсгээр, 25-нд нутгийн баруун хойд хэсгээр цас орж, зөөлөн цасан шуурга шуурна. Салхи 22-нд говь, тал, хээрийн нутгаар, 25-нд Алтайн салбар уулсаар секундэд 15-17 метр хүрч ширүүснэ. 22-ноос хүйтний эрч эрс чангарч Увс нуур болон Дархадын хотгор, Хэнтийн уулархаг нутаг, Завхан голын эх, Идэр, Тэс, голын хөндийгөөр шөнөдөө -45…-50 градус, өдөртөө -30…-35 градус, Алтай, Хангай, Хөвсгөлийн уулархаг нутаг, Хүрэнбэлчир орчим, Эг, Үүр, Орхон, Сэлэнгэ, Хараа, Ерөө, Туул, Тэрэлж, Онон, Улз, Хэрлэн, Халх голын хөндийгөөр шөнөдөө -40…-45 градус, өдөртөө -26…-31 градус, говийн бүс нутгийн өмнөд хэсэг болон цас багатай газраар шөнөдөө -22…-27 градус, өдөртөө -15…-20 градус, говийн бүс нутгийн хойд болон зүүн хэсгээр шөнөдөө -27…-32 градус, өдөртөө -19…-24 градус, бусад нутгаар шөнөдөө -33…-38 градус, өдөртөө -23…-28 градус хүйтэн байна.
2. Гал түймэр:
– Хувийн өмчид гарсан: Нийслэлийн Налайх дүүргийн 6 дугаар хорооны “Мэлхий хад” гэдэг газар /дүүргээс зүүн хойд зүгт 25 км-т байшин шатаж байна гэсэн дуудлагыг 01.20-ны өдрийн 05:21 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 28 дугаар ангийн алба хаагчдыг очиход амралтын газрын 8х12 метрийн хэмжээтэй байшингийн дээвэр шатаж байсныг 2 цаг 50 минут ажиллаж унтраасан.
Нийслэлийн Баянзүрх дүүргийн 2 дугаар хорооны “Дунд дарь-Эх”-ийн 16 дугаар гудамжинд байшин шатаж байна гэсэн дуудлагыг 01.20-ны өдрийн 11:35 цагт хүлээн авсан. Чингэлтэй дүүргийн Онцгой байдлын хэлтсийн Гал түймэр унтраах аврах 10 дугаар ангийн алба хаагчдыг очиход иргэн Г-ын 8х5 метрийн хэмжээтэй байшингийн дээврийн хэсэг шатаж байсныг 20 минут ажиллаж унтраасан.
Хэнтий аймгийн Хэрлэн сумын 7 дугаар багийн “Цагаан далан” гэдэг газар /аймгийн төвөөс баруун хойд зүгт 50 км, Өлзийт тосгоноос баруун хойд зүгт 7 км, 5 ханатай гэр шатсан тухай мэдээллийг хүлээн авсан. Тус сумын харьяат иргэн Т-ын 5 ханатай гэр 01.20-ны өдрийн 20:15 цагт шатсан тул тус сумын Засаг даргын Тамгын газрын мэргэжилтнүүд ажиллаж унтраасан тухай мэдээллийг тус сумын Засаг дарга 23:30 цагт аймгийн Онцгой байдлын газарт ирүүлсэн.
3.Хүний үйл ажиллагаатай холбоотой осол:
Өндрөөс унах: Нийслэлийн Хан-Уул дүүргийн 3 дугаар хорооны “Гэрэлт- Өргөө” хотхон 12 давхар орон сууцны байрны өрөгтгөлийн 2 давхар барилгын дээвэр дээр цогцос байна гэсэн дуудлагыг 01.20-ны өдрийн 11:50 цагт хүлээн авсан. Нийслэлийн Аврах ангийн алба хаагчдыг очиход иргэн Б/41 настай, эрэгтэй/ нь 12 дугаар давхрын цонхоор үсэрч өргөтгөл дээр унаж нас барсан байсан тул 20 минут ажиллаж цогцсыг буулган тус дүүрэг дэхь Цагдаагийн 1 дүгээр хэлтсийн жижүүрийн бүрэлдэхүүнд шилжүүлэн өгсөн.
ОНЦГОЙ БАЙДЛЫН ЕРӨНХИЙ ГАЗАР