1.Цаг агаарын талаар:
Өнгөрсөн хоногт: Нийт нутгаар цаг агаар тогтуун байлаа.
Өнөөдөр: Нутгийн баруун хэсгээр солигдмол үүлтэй, Алтай, Хангайн уулархаг нутгаар цас орно. Бусад нутгаар багавтар үүлтэй, цас орохгүй. Салхи баруун хойноос 5-10 м/с, нутгийн өмнөд хэсгээр 12-14 м/с хүрч ширүүснэ. Хүйтний эрч чангарч Дархадын хотгороор 25-30 градус, Увс нуурын хотгор, Идэр, Тэс, Сэлэнгэ, Хараа, Ерөө, Туул, Тэрэлж, Хэрлэн, Онон, Улз голын хөндийгөөр 21-26 градус, Эхийн голын Баянбүрд орчмоор 5-10 градус, говийн нутгаар 10-15 градус, бусад нутгаар 14-19 градус хүйтэн байна.
Улаанбаатар хотод: Үүл багасна. Цас орохгүй. Салхи баруун хойноос 5-10 м/с. Хүйтэрч 21-23 градус хүйтэн байна.
Төлөв байдал: 21-нд нутгийн баруун өмнөд хэсгээр цас орно. Салхи 20-нд говь, талын нутгаар 12-14 м/с хүрч явган шуурга шуурна. Хүйтний эрч чангарч Дархадын хотгор, Идэр, Тэс голын хөндийгөөр шөнөдөө 40-45 градус, өдөртөө 27-32 градус, Увс нуурын хотгор болон Орхон-Сэлэнгэ, Хараа, Ерөө, Туул, Тэрэлж, Хэрлэн, Онон, Улз, Халх голын хөндийгөөр шөнөдөө 32-37 градус, өдөртөө 20-25 градус, говийн бүс нутгийн өмнөд хэсгээр шөнөдөө 18-23 градус, өдөртөө 10-15 градус, бусад нутгаар шөнөдөө 26-31 градус, өдөртөө 16-21 градус хүйтэн байна. Хугацааны сүүлээр өдөртөө хүйтний эрч суларна.
2. Эрэн хайх, аврах ажиллагаа:
Газрын хэвлийд эрэн хайх: Нийслэлийн Налайх дүүргийн 3 дугаар хороо 57 дугаар уклоны ашигладаггүй уурхайн аманд 1 иргэн унаж агааргүйдсэн байна гаргаж өгөөч гэсэн дуудлагыг 2016.11.19-ний өдрийн 09:25 цагт хүлээн авч ОБЕГ-ын харъяа Уул уурхайн аврах ангийн 7 албан хаагч, 2 техник хэрэгсэлтэйгээр ажиллаж иргэн С /38 настай, эрэгтэй/-г 39 метр гүн, 45 градусын налуу аманд унасан байсныг гарган авч эмнэлгийн анхан шатны тусламж үзүүлэн дүүргийн эрүүл мэндийн төвд хүлээлгэн өгсөн.
Ус, цас, шаварт саатсан: Ховд аймгийн Булган сумын Баянгол багийн Жаргалантын-Аманд цасанд боогдсоны улмаас иргэд явж чадахгүй байна гэсэн дуудлагыг 2016.11.15-ны өдрийн 15:40 цагт хүлээн авч Ховд аймаг дахь Зэвсэгт хүчний 0123 дугаар ангийн 2 албан хаагч, тус аймгийн Булган суман дахь Онцгой байдлын хэлтсийн 1 албан хаагч, Газ-66 загварын автомашинтай ажиллаж тухайн багийн 36 иргэнийг тээвэрлэн Жаргалантын-Амны Доод, Дээд нарийн гэдэг газарт 2016.11.19-ний 12:30 цагт гэр гэрт нь хүргэж буулгасан.
Ховд аймгийн Цэцэг сумын Баян-Овоо багийн нутаг Цагаан-Эрэг гэдэг газарт хувиараа чулуу олборлож байсан 60 хүн, 12 автомашин шатахуун дуусч, Богосын даваанд цасанд боогдсон гэсэн дуудлагыг 2016.11.19-ний өдрийн 11:40 цагт хүлээн авч тус аймгийн Цэцэг сум дахь “МОН-ЭНКО” ХХК-ийн 10 хүн, 2 автомашин, Мөст сумаас 7 хүн, 2 автомашин, нийт 4 автомашин, 17 хүн 2016.11.20-ны өдрийн 06:00 цагт гарч ажиллахаар болсон. Цасанд боогдсон иргэд айлуудын зуслангийн хашаа саравчинд 2 гэр барьж хонож байгаа тухай мэдэгдсэн.
Нийслэлийн Баянзүрх дүүргийн 11 дүгээр хороо, Хонхорын цахилгаан станцын хажууд автомашин цасанд суусан байна гэсэн дуудлагыг 2016.11.19-ний өдрийн 16:44 цагт хүлээн авч Налайх дүүргийн Онцгой байдлын хэлтсийн Гал түймэр унтраах, аврах 28 дугаар ангийн 5 албан хаагч, 1 автомашинтайгаар ажиллаж, иргэн Д-ийн “Соната-6” загварын автомашин цасанд суусан байсныг гарган аюулгүй болгосон.
3. Объектын гал түймэр:
Нийслэлийн Чингэлтэй дүүргийн 12 дугаар хороо, Булгийн 10 дугаар гудамжийн 1024 тоотод байшин шатаж байна гэсэн дуудлагыг 2016.11.19-ний өдрийн 09:05 цагт хүлээн авч тус дүүргийн Онцгой байдлын хэлтсийн Гал түймэр унтраах, аврах 10 дугаар ангийн 6 албан хаагч, 1 автомашин, нэмэлтээр мөн ангийн 8 албан хаагч, 2 автомашинтайгаар;
Нийслэлийн Баянзүрх дүүргийн 22 дугаар хороо, Монелын 23 дугаар гудамжийн 357 тоотод байшин шатаж байна гэсэн дуудлагыг 2016.11.19-ний өдрийн 12:16 цагт хүлээн авч тус дүүргийн Онцгой байдлын хэлтсийн Гал түймэр унтраах, аврах 63 дугаар ангийн 7 албан хаагч, 2 автомашинтайгаар ажиллаж, уг гал түймэрт иргэн С /43 настай, эрэгтэй/ угаартаж нас барсан байсныг дүүргийн Цагдаагийн хэлтсийн жижүүрийн бүрэлдэхүүнд хүлээлгэн өгсөн.
Баянхонгор аймгийн Баянхонгор сумын Гэгээн шавь багийн 1 дүгээр гудамжийн 17 тоотод амбаар шатаж байна гэсэн дуудлагыг 2016.11.19-ний өдрийн 15:32 цагт хүлээн авч тус аймгийн Онцгой байдлын газрын Гал түймэр унтраах, аврах 16 дугаар ангийн 6 албан хаагч, 2 автомашинтайгаар;
Нийслэлийн Сүхбаатар дүүргийн 5 дугаар хороо, “Өгөөж” ХХК-ийн байранд гал гарч байна гэсэн дуудлагыг 2016.11.19-ний өдрийн 18:54 цагт хүлээн авч тус дүүргийн Онцгой байдлын хэлтсийн Гал түймэр унтраах, аврах 10 дугаар ангийн 8 албан хаагч, 2 автомашинтайгаар;
Нийслэлийн Чингэлтэй дүүргийн 19 дүгээр хороо, Шадивлан зуслангийн 1081 тоотод байшин шатаж байна гэсэн дуудлагыг 2016.11.19-ний өдрийн 21:32 цагт хүлээн авч тус дүүргийн Онцгой байдлын хэлтсийн Гал түймэр унтраах, аврах 34 дүгээр ангийн 8 албан хаагч, 2 автомашинтайгаар тус тус ажиллаж унтраасан.
4. Техникийн холбогдолтой ослын талаар:
Тээврийн хэрэгслийн осол: Нийслэлийн Налайх дүүргийн 3 дугаар хороо Баянгийн-Энгэр гэдэг газар Диваажингийн цэцэрлэгт хүрээлэнгийн орчимд автомашин онхолдож төмөр хийцэд хүн хавчуулагдсан тухай дуудлагыг 2016.11.19-ний өдрийн 18:46 цагт хүлээн авч тус дүүргийн Онцгой байдлын хэлтсийн Гал түймэр унтраах, аврах 28 дугаар ангийн 5 албан хаагч, 1 автомашинтай ажиллаж, “Ниссан Тида” загварын автомашин замын хажуу руу унасан байсныг татан босгож, хөнгөн гэмтсэн иргэн Д /39 настай, эмэгтэй/-г тус дүүргийн Эрүүл мэндийн нэгдэлд хүлээлгэн өгсөн.
ГАМШГИЙН ШУУРХАЙ УДИРДЛАГЫН ГАЗАР