Аюулт үзэгдэл, ослын нөхцөл байдлын мэдээ

Өнгөрсөн хоногт: Нийт нутгаар цаг агаар тогтуун байлаа.

Өнөөдөр: Ихэнх нутгаар үүлшинэ. Төвийн аймгуудын зүүн, зүүн аймгуудын хойд хэсгээр цас орж, цасан шуурга шуурна. Бусад нутгаар цас орохгүй. Салхи баруун хойноос секундэд 6-11 метр, зарим газраар 14-16 м/с хүрч ширүүснэ. Дархадын хотгороор 18-23 градус, Увс нуурын хотгор, Хангай, Хэнтийн уулархаг нутаг, Идэр, Тэс, Хараа, Ерөө, Туул, Тэрэлж, Хэрлэн голын хөндийгөөр 12-17 градус, говийн бүс нутгийн өмнөд хэсгээр 0-5 градус, бусад нутгаар 5-10 градус хүйтэн байна.

Улаанбаатар хотод үүлшинэ. Бага зэргийн цас орно. Салхи баруун хойноос 5-10 м/с. 14-16 градус хүйтэн байна.

Төлөв байдал: 26-нд зүүн аймгуудын нутгийн өмнөд хэсгээр, 28-нд нутгийн баруун өмнөд, 29-нд нутгийн зүүн өмнөд  хэсгээр цас орж, цасан шуурга шуурна. Салхи 26-нд зарим газраар секундэд 14-16 м/с хүрч ширүүснэ. Дархадын хотгор, Идэр, Тэс голын хөндийгөөр шөнөдөө 25-30 градус, өдөртөө 17-22 градус, Увс нуурын хотгор болон Хараа, Ерөө, Туул, Тэрэлж, Хэрлэн голын хөндийгөөр шөнөдөө 21-26 градус, өдөртөө 10-15 градус, говийн бүс нутгийн өмнөд хэсгээр шөнөдөө 8-13 градус хүйтэн, өдөртөө 2 градус дулаанаас 3 градус хүйтэн, бусад нутгаар шөнөдөө 15-20 градус, өдөртөө 3-8 градус хүйтэн байна.

Сураггүй болсон: Дундговь аймгийн Сайнцагаан сумын Наран  багийн А0202 тоот засмал зам дагуу иргэн О /30 настай, эрэгтэй/ 2016.11.24-ний өдрийн 02:00 цагт сураггүй болсон тухай дуудлагыг 2016.11.24-ний  04:15 цагт хүлээн авч тус аймгийн Онцгой байдлын газрын Гал түймэр унтраах, аврах 25 дугаар ангийн 6 албан хаагч, 1  техник хэрэгсэлтэйгээр эрлийн ажиллагааг 2016.11.24-ний өдрийн 07:15 цагаас 08:40 цагийн хооронд орон нутгийн А0202 тоот зам дагуу /аймгийн төвөөс баруун урд зүгт 20-25 км-т/ зохион байгуулж, иргэн Г.Очирбат Өмнөговь аймгийн Цогт-Цэций сумаас олдсон тул эрлийн ажиллагааг зогсоосон.

Ус, цас, шаварт саатсан: Хөвсгөл аймгийн Цэцэрлэг сумын Жаргалант багийн Дүмбэгэрийн-Өвөр гэдэг газар /сумын төвөөс зүүн урд зүгт 38 км-т/, иргэн М-н “Бенз” загварын 50 тонн даацтай ачааны автомашин Тэсийн голд мөс цөмөрч суусан тухай дуудлагыг 2016.11.22-ны өдрийн 06:00 цагт хүлээн авч тус аймгийн Онцгой байдлын газрын Эрэн хайх, аврах салбарын 7 албан хаагч, 2 техник хэрэгсэлтэйгээр ажиллаж,  ачааг шилжүүлэн ачиж, 2016.11.24-ний өдрийн 16:30 цагт автомашиныг татан гаргаж  аюулгүй болгосон.

Завхан аймгийн Шилүүстэй сумын Баян-Улаан багийн Дугантын ам гэдэг газар /Улиастай сумаас зүүн урд зүгт 90 км-т/ иргэн Т–н 16 зорчигчтой “Пургон” автомашин цасанд сууж, эвдэрсэн тухай дуудлагыг 2016.11.24-ний өдрийн 01:30 цагт хүлээн авч тус аймгийн Онцгой байдлын газрын Гал түймэр унтраах, аврах 43 дугаар ангийн 3 албан хаагч, 1  техник хэрэгсэлтэйгээр ажиллаж, 16 зорчигчийг аварч, Улайстай сумруу зөөвөрлөж автомашиныг Цагаанхайрхан суманд хүргэн аюулгүй болгосон.

Завхан аймгийн Тосонцэнгэл сумын Идэр багийн “Уужим” гэдэг газар /сумын төвөөс хойд зүгт 50 км-т/ оторлож байгаа малчин Н-х цас их орсны улмаас нүүх шаарлагатай болсон тул туслалцаа үзүүлнэ үү гэсэн хүсэлтийг 2016.11.22-ний өдрийн 16:50 цагт хүлээн авч тус аймгийн Онцгой байдлын газрын Гал түймэр унтраах, аврах 39 дүгээр ангийн 5 албан хаагч, 2 техник хэрэгсэлтэйгээр ажиллаж, малчин Д.Ням-Осорын 2 гэрийг сумын төвд зөөвөрлөн, малыг сумын төвөөс хойд зүгт 20 км-т айлд хүргэн аюулгүй болгосон.

Дархан-Уул аймгийн Хонгор сумын 3 дугаар багийн “Сонин хангай” гэдэг газар иргэн Э-н “Ланд-80” загварын автомашин цасанд суусан, айлруу очиж хүрз аваад буцахдаа автомашинаа олохгүй байна, автомашинд 1 согтуу зорчигч үлдсэн туслаач гэсэн дуудлагыг 2016.11.25-ны өдрийн 03:55 цагт хүлээн авч тус аймгийн Онцгой байдлын газрын Гал түймэр унтраах, аврах 22 дугаар ангийн 2 албан хаагч, 1 техник хэрэгсэлтэйгээр ажиллаж, 2016.11.25-ны өдрийн 06:18  цагт иргэн Г-г /61 настай, эрэгтэй/ аварч, автомашиныг цаснаас татан гаргаж  аюулгүй болгосон.

Ховд аймгийн Булган сумын Байтаг багийн “Нохой долоох” гэдэг газар /сумын төвөөс баруун 83 км-т, хилийн замаар 163 км явна/ өвөлжиж байгаа иргэн M-н гэр цасанд боогдсон гэсэн дуудлагыг 2016.11.23-ны өдрийн 12:40 цагт хүлээн авч тус сумын Онцгой байдлын хэлтсийн дарга д/х Б.Ганхуягаар ахлуулсан орон нутгийн 9 иргэн, 2 техник хэрэгсэлтэйгээр ажиллаж,  2016.11.24-ний өдрийн 20:20 цагт малчин М-н гэрийг тус сумын төвд нүүлгэн шилжүүлж аюулгүй болгосон.

Аврах ажиллагаа: Дорнод аймгийн Хэрлэн сумын 7 дугаар багийн үйлчилгээний төвийн урд, дулааны шугамын худгаас нэр нь үл мэдэгдэх 2 эрэгтэй хүний цогцос олдсон тул, гаргаж өгнө үү гэсэн аймгийн Цагдаагийн газрын жижүүр д/а М 2016.11.24-ны өдрийн 11:40 цагт хүлээн авч аймгийн Онцгой байдлын газрын Эрэн хайх аврах ангийн 6 албан хаагч, 1 техник хэрэгсэлтэйгээр ажиллаж, цогцсыг дулааны шугамын худгаас гаргаж, Аймгийн цагдаагийн газрын бүлэгт хүлээлгэн өгсөн.

Ховд аймгийн Ховд сумын Баянбулаг багийн “Салон” гэдэг газар оторлож байгаа Жаргалант сумын Рашаант багийн  малчин Т-н 40 ямаанд халдварт өвчний шинж тэмдэг илэрсэн, өвчилсөн малаас дээж авч УМЭАЦТЛ-д шинжлүүлэхэд 2016.11.23-ны өдрийн 1185 дугаар хариугаар “Ямааны цэцэг” өвчин болох нь тогтоогдсон тул сумын Засаг даргын 2016.11.23-ний өдрийн А/207 дугаар захирамжаар хорио цээрийн дэглэм тогтоосон.

Хөвсгөл аймгийн Рашаант сумын Талын-Ус багийн “Гүнзгий” гэдэг газар малчин Э-н 1 үхэр 2016.11.07-ны өдөр халдварт өвчний шинж тэмдэгтэй өвчилсөн тул дээж авч аймгийн МЭАЦЛ-д шинжлүүлэхэд 2016.11.09-ний өдрийн 148 дүгээр хариугаар “Галзуу” өвчин болох нь тогтоогдсон. Тус аймгийн Засаг даргын 2016.11.22-ний өдрийн А/144 дүгээр захирамжаар хязгаарлалтын дэглэмийг цуцалсан.

 4. Объектын гал түймэр:

Нийслэлийн Чингэлтэй дүүргийн 13 дугаар хороо, 9 дүгээр гудамжийн 575А тоотод иргэн Д-н гэр шатаж байна гэсэн дуудлагыг 2016.11.24-ний өдрийн 15:24 цагт хүлээн авч тус дүүргийн Онцгой байдлын хэлтсийн Гал түймэр унтраах, аврах 10 дугаар ангийн 9 албан хаагч;

Говьсүмбэр аймгийн Сүмбэр сумын Хонхор багийн “Ус дулаан” ХХК-ийн уурын зуухны дээвэр шатаж байна гэсэн дуудлагыг 2016.11.24-ний өдрийн 19:11 цагт хүлээн авч аймгийн Онцгой байдлын газрын Гал түймэр унтраах, аврах 37 дугаар ангийн 7 албан хаагч;

Өмнөговь аймгийн Даланзадгад сумын Цагаан булаг багийн 7 дугаар гудамжийн 15 тоотод  иргэн Л-н байшингийн дээвэр шатаж байна гэсэн дуудлагыг 2016.11.24-ний өдрийн 22:28 цагт хүлээн авч тус аймгийн Онцгой байдлын газрын Гал унтраах, аврах 21 дүгээр ангийн 6 албан хаагч тус тус ажиллаж унтраасан.

Тээврийн хэрэгслийн осол: Сэлэнгэ аймгийн Сайхан сумын 2 дугаар багийн “Овоот” хороололд авто замын зорчих хэсэгт Портер загварын автомашинтай Соната загварын автомашин мөргөлдсний улмаас төмөр хийцэд хүн хавчуулагдсан тухай дуудлагыг 2016.11.24-ний өдрийн 15:17 цагт /17:00 цагт/ хүлээн авч тус аймгийн Онцгой байдлын газрын Гал түймэр унтраах, аврах 61 дүгээр ангийн 6 албан хаагч ажиллаж, автомашины төмөр хийцэд хавчуулагдсан иргэн А-г /32 настай, эрэгтэй/ аварч, эмнэлэгийн байгууллагад хүлээлгэн өгсөн.