1.Цаг агаарын талаар:
Өнгөрсөн хоногт: Нийт нутгаар цаг агаар тогтуун байлаа.
Өнөөдөр: Баруун зүгийн нутгаар үүлшинэ. Бусад нутгаар багавтар үүлтэй. Цас орохгүй. Салхи ихэнх нутгаар зүүн өмнөөс 6-11 м/с, Алтайн салбар уулсаар 12-14 м/с хүрч ширүүснэ. Увс нуур болон Дархадын хотгор, Идэр, Тэс голын хөндийгөөр 17-22 градус, Их нууруудын хотгор, Завхан голын эх, Хүрэн бэлчир, Хараа, Ерөө, Туул, Тэрэлж, Хэрлэн, Онон, Халх, Улз голын хөндий, Дорнод, Дарьгангын тал нутгаар 10-15 градус, говийн бүс нутгийн өмнөд хэсгээр 1 градус дулаанаас 4 градус хүйтэн, бусад нутгаар 3-8 градус хүйтэн байна.
Улаанбаатар хотод: Багавтар үүлтэй. Цас орохгүй. Салхи зүүн өмнөөс 5-10 м/с. 10-12 градус хүйтэн байна.
Төлөв байдал: 27-нд баруун аймгуудын нутгийн баруун хэсгээр, 28-нд баруун аймгуудын ихэнх нутаг, төвийн аймгуудын нутгийн хойд хэсгээр, 29-нд төв, зүүн, говийн аймгуудын нутгаар, 30-нд зүүн аймгуудын нутгаар цас орж, цасан шуурга шуурна. 27-нд Алтайн салбар уулсаар, 28-нд зарим газраар, 29-нд ихэнх нутгаар, 30-нд говь, тал хээрийн нутгаар 14-16 м/с хүрч ширүүснэ. 27, 28-нд өдөртөө хүйтний эрч сулрах боловч, цаашдаа ихэнх нутгаар хүйтний эрч чангарч Увс нуур болон Дархадын хотгор, Идэр, Тэс, Хараа, Ерөө, Туул, Тэрэлж, Хэрлэн, Онон, Улз, Халх голын хөндийгөөр шөнөдөө 34-39 градус, өдөртөө 22-27 градус, Завхан голын эх, Хүрэн бэлчир, Хангай, Хөвсгөл, Хэнтэйн уулархаг нутгаар шөнөдөө 28-33 градус, өдөртөө 17-22 градус, говийн бүс нутгийн өмнөд хэсэг болон цас багатай энгэр ээвэр газруудаар шөнөдөө 15-20 градус, өдөртөө 4-9 градус, бусад нутгаар шөнөдөө 22-27 градус, өдөртөө 10-15 градус хүйтэн байна.
2.Объектын гал түймэр:
Төрийн өмчид гарсан: Ховд аймгийн Жаргалант сумын “Ховд дулааны станц” ТӨХК-ийн түлш дамжуулах цехийн нүүрс зөөвөрлөх туузан дамжуурга /конвейр/ шатаж байна гэсэн дуудлагыг 12.25-ны өдрийн 09:58 цагт хүлээн авч тус аймгийн Онцгой байдлын газрын Гал түймэр унтраах, аврах 12 дугаар ангийн 7 алба хаагч, 2 автомашинтай 10:03 цагт очиж, 1 цаг 52 минут, нэмэлтээр 45 алба хаагч, 3 автомашинтай 10:32 цагт очиж 1 цаг 23 минут тус тус ажиллаж унтраасан.
Хувийн өмчид гарсан: Ховд аймгийн Жаргалант сумын Магсаржав багт гэр шатаж байна гэсэн дуудлагыг 12.25-ны өдрийн 13:35 цагт хүлээн авч тус аймгийн Онцгой байдлын газрын Гал түймэр унтраах, аврах 12 дугаар ангийн 6 алба хаагч, 1 автомашинтай 13:37 цагт очиж, 18 минут ажиллаж унтраасан.
Нийслэлийн Чингэлтэй дүүргийн 10 дугаар хороонд байшин шатаж байна гэсэн дуудлагыг 12.25-ны өдрийн 12:36 цагт хүлээн авч тус дүүргийн Гал түймэр унтраах, аврах 10 дугаар ангийн 8 алба хаагч, 2 автомашинтай 12:45 цагт очиж, 25 минут ажиллаж унтраасан.
Өвөрхангай аймгийн Арвайхээр сумын Рашаант багт амбаар шатаж байна гэсэн дуудлагыг 12.25-ны өдрийн 21:35 цагт хүлээн авч тус аймгийн Онцгой байдлын газрын Гал түймэр унтраах, аврах 12 дугаар ангийн 5 алба хаагч, 1 автомашинтай 21:38 цагт очиж, 20 минут ажиллаж унтраасан.
Өвөрхангай аймгийн Тарагт сумын Алтантал багийн “Дунд гарам” гэдэг газар /аймгийн төвөөс зүүн урд зүгт 7 км-т/ малын саравч шатаж байна гэсэн дуудлагыг 12.25-ны өдрийн 10:15 цагт хүлээн авч тус аймгийн Онцгой байдлын газрын Гал түймэр унтраах, аврах 12 дугаар ангийн 4 алба хаагч, 1 автомашинтай 10:35 цагт очиж, 15 минут ажиллаж унтраасан.
3.Зам тээврийн осол:
Автозамын осол: Нийслэлийн Багануур дүүргийн 2 дугаар хороо, “Гүн-Овоо” гэдэг газар /дүүргийн төвөөс баруун зүгт 18 км-т/ иргэн Г-гийн эзэмшлийн 13-00 СҮЭ улсын дугаартай “Норд бенз” загварын 4 зорчигчтой ачааны автомашин онхолдож, автомашины төмөр хийцэд хүн хавчуулагдсан тухай дуудлагыг 12.25-ны өдрийн 09:30 цагт хүлээн авч тус дүүргийн Гал түймэр унтраах, аврах 64 дүгээр ангийн 6 алба хаагч, 1 автомашинтай 09:51 цагт очиж, иргэн Г /37 настай, эрэгтэй/, О /35 настай, эрэгтэй/, Г /30 настай, эрэгтэй/ нар автомашины төмөр хийцэд хавчуулагдсан байсныг гаргаж, эмнэлгийн байгууллагад шилжүүлэн өгсөн.
4.Байгаль цаг агаарын аюулт үзэгдэл:
Газар хөдлөлт: Дундговь аймгийн Хулд сумын Бүлээн багийн “Цайдам” гэдэг газар /сумын төвөөс зүүн урд зүгт 31 км-т/, /Ө-45002’00’’, У-105087’00’’/ 12.26-ны өдрийн 01:41 цагт 3.6 магнитудын хүчтэй газар хөдлөлт болсон тухай мэдээллийг ООГХ-ээс утсаар 12.26-ны өдрийн 02:02 цагт хүлээн авч тус аймгийн Онцгой байдлын газраар дамжуулан сумын Засаг дарга, сумын ЗДТГ-ын дарга, тус газар нутаглаж буй малчин нараас утсаар тодруулахад иргэдэд чичирхийлэл мэдрэгдээгүй, учирсан хохирол байхгүй тухай мэдээлсэн.
5.Эрэн хайх, аврах ажиллагаа:
Эрэн хайх ажиллагаа /сураггүй болсон/: Булган аймгийн Сэлэнгэ сумын Ингэт багт иргэн Б-гийнд Орхон аймгаас ирсэн, Тэшиг сумын харьяат иргэн Г /42 настай, эрэгтэй/ 12.05-ны өдрийн 22 цагийн үед /согтуу/ гараад явсан сураггүй байна гэсэн мэдээллийг 12.24-ний өдрийн 08:00 цагт хүлээн авч тус аймгийн Онцгой байдлын газрын Хангал сумын Хялгант тосгон дахь Гал түймэр унтраах, аврах 50 дугаар ангийн 5 алба хаагч, 1 автомашин, цагдаагийн 3 алба хаагч, ар гэр, орон нутгийн 14 хүн, 2 автомашин, нийт 22 хүн, 3 техник хэрэгсэлтэйгээр “Хийдийн даваа”, “Сэлэнгийн арал” гэдэг газруудад эрэн хайх ажиллагааг зохион байгуулж үр дүнд хүрээгүй тул ар гэрийн хүсэлтээр эрэн хайх ажиллагааг түр зогсоосон.
ОНЦГОЙ БАЙДЛЫН ЕРӨНХИЙ ГАЗАР