1.Цаг агаар:
Өнгөрсөн хоногт: Улаанбаатар хот болон Архангай, Баянхонгор, Баян-Өлгий, Булган, Говь-Алтай, Дундговь, Орхон, Өвөрхангай, Завхан, Увс, Сүхбаатар, Сэлэнгэ, Төв, Хөвсгөл, Хэнтий аймгийн нутгаар бороо орсон. Бусад нутгаар цаг агаар тогтуун байлаа.
Өнөөдөр: Баруун болон төвийн аймгуудын нутгаар үүлэрхэг, бусад нутгаар солигдмол үүлтэй. Баруун аймгуудын нутгийн зүүн хэсэг, төвийн аймгуудын ихэнх нутаг, говийн аймгуудын нутгийн хойд, зүүн аймгуудын нутгийн баруун хэсгээр бороо орно. Салхи баруун болон төвийн аймгуудын нутгаар баруун өмнөөс баруун хойш эргэж, бусад нутгаар баруун өмнөөс 6-11 м/с, говь, тал, хээрийн нутгаар 15-17 м/с, зарим газраар борооны өмнө түр зуур ширүүснэ. Увс нуурын хотгор, Завхан голын эх, Хүрэнбэлчир орчмоор 12-17 градус, Алтай, Хангай, Хөвсгөл, Хэнтэйн уулархаг нутаг, Туул, Тэрэлж голын хөндийгөөр 15-20 градус, говийн бүс нутаг болон Дорнод-Монголын тал нутгаар 29-34 градус, бусад нутгаар 21-26 градус дулаан байна.
Улаанбаатар хотод: Үүлшиж, бороо орно, салхи баруун өмнөөс хойш эргэж 7-12 м/с, борооны өмнө түр зуур ширүүснэ, 17-19 градус дулаан байна.
Төлөв байдал: 2-нд төв болон говийн аймгуудын нутгийн зарим газар, зүүн аймгуудын ихэнх нутгаар, 3-нд баруун аймгуудын нутгийн баруун хэсэг, төвийн аймгуудын нутгийн зарим, зүүн аймгуудын нутгийн ихэнх хэсгээр, 4-нд баруун аймгуудын нутгийн хойд хэсэг, төв болон зүүн аймгуудын нутгийн зарим газраар, 5-нд баруун болон зүүн аймгуудын нутгийн хойд хэсгээр бороо, зарим газраар дуу цахилгаантай аадар бороо орно. Салхи 6-11 м/с, зарим газраар борооны өмнө түр зуур ширүүснэ. Ихэнх нутгаар сэрүүсэж Алтай, Хангай, Хөвсгөл, Хэнтэйн уулархаг нутаг, Хүрэнбэлчир орчим, Завхан голын эх, Туул, Тэрэлж голын хөндийгөөр шөнөдөө 1-6 градус, өдөртөө 12-17 градус, говийн бүс нутгийн өмнөд хэсгээр шөнөдөө 13-18 градус, өдөртөө 25-30 градус, бусад нутгаар шөнөдөө 7-12 градус, өдөртөө 18-23 градус дулаан байна.
2.Эрэн хайх, аврах ажиллагаа:
Дундговь аймгийн Сайнцагаан сумын Нарлаг багийн “Задгай”-д “Сайн констракшн” ХХК-ийн 1 ажилтан бохирын шугамын худагт засвар хийж байгаад шороонд дарагдсан тухай дуудлагыг 07.31-ний өдрийн 12:22 цагт хүлээн авсан. Тус аймгийн Онцгой байдлын газрын алба хаагчид 3 км зам туулан 12:27 цагт очиход нийслэлийн Сүхбаатар дүүргийн иргэн Х /41 настай, эрэгтэй/ бохирын шугамын 4 метр гүнтэй нүхэд ул тэгшлэлт хийж байгаад шороонд даруулж нас барсан тул цогцсыг гаргаж аймгийн Цагдаагийн газрын жижүүрийн бүрэлдэхүүнд шилжүүлэн өгсөн.
Нийслэлийн Баянгол дүүргийн 16 дугаар хорооны “Орхон”-ы 8 дугаар гудамжинд “Зэндмэнэ суварга” ХХК-ийн харуул согтууруулах ундаа хэрэглэсэн үедээ харуулын байрнаасаа гарч байгаад төмөр хашаа руу унаж баруун хөлөө хашааны төмөрт сүлбүүлсэн байна гэсэн дуудлагыг 07.31-ний өдрийн 21:30 цагт хүлээн авсан. Нийслэлийн Аврах анги-105-ын алба хаагчид 4.5 км зам туулан 21:37 цагт очиж нийслэлийн Баянзүрх дүүргийн иргэн Б /57 настай, эрэгтэй/ 2 метр өндөр тулгуур дээрх харуулын байрнаас төмөр хашаан дээр баруун хөлөө нэвт хатган унасан байсныг эсэн мэнд аварч НЯТТТ-д шилжүүлэн өгсөн.
3.Мэдээлэл:
Төв аймгийн Мөнгөнморьт сумын Байдлаг багийн Цагаан толгой гэдэг газар /аймгийн төвөөс зүүн хойд зүгт 155 км, сумын төвөөс урд зүгт 39 км-т/ Иргэн Н-ийн 4 ханатай гэр 07.31-ний өдрийн 11:00 цагт шатсан. Мэдээллийг тус сум дахь Цагдаагийн хэсгийн төлөөлөгч цагдаагийн дэслэгч Л.Ган-Эрдэнэ мөн өдрийн 12:40 цагт аймгийн Онцгой байдлын газарт ирүүлсэн.
ОНЦГОЙ БАЙДЛЫН ЕРӨНХИЙ ГАЗАР