1.Цаг агаар:
Өнгөрсөн хоногт: Архангай, Баян-Өлгий, Баянхонгор, Дархан-Уул, Дорноговь, Дорнод, Завхан, Өвөрхангай, Өмнөговь, Сүхбаатар, Төв, Ховд, Хөвсгөл аймгуудын нутгаар бороо орсон. Баян-Өлгий аймгийн Цэнгэл суманд цас орсон. Бусад нутгаар цаг агаар тогтуун байлаа.
Өнөөдөр: Ихэнх нутгаар солигдмол үүлтэй. Баруун аймгуудын нутгийн зарим газар, зүүн аймгуудын нутгийн зүүн хэсгээр бороо орно. Салхи ихэнх нутгаар баруун хойноос 6-11 м/с. Алтай, Хангай, Хөвсгөл, Хэнтэйн уулархаг нутаг, Хүрэнбэлчир орчим, Завхан голын эх, Идэр, Тэс, Эг, Үүр, Тэрэлж, Улз, Халх голын хөндийгөөр 11-16 градус, Алтайн өвөр говиор 22-27 градус, бусад нутгаар 16-21 градус дулаан байна.
Улаанбаатар хотод: Үүлэрхэг. Бороо орохгүй. Салхи баруун хойноос 5-10 м/с. 16-18 градус дулаан байна.
Төлөв байдал: 28-нд баруун аймгуудын нутгийн зарим газар, төвийн аймгуудын нутгийн баруун хойд хэсгээр, 29-нд баруун болон төвийн аймгуудын нутгийн зарим газраар, 30-нд төвийн аймгуудын нутгийн зарим газраар, 31-нд төв болон зүүн аймгуудын нутгийн хойд хэсгээр бороо орно. Салхи ихэнх хугацаанд 6-11 м/с. Ихэнх нутгаар өдөртөө бага зэрэг дулаарч, Алтай, Хангай, Хөвсгөл, Хэнтэйн уулархаг нутаг, Хүрэнбэлчир орчим, Завхан голын эх, Идэр, Тэс, Тэрэлж голын хөндийгөөр шөнөдөө 1-6 градус дулаан, өдөртөө 15-20 градус, говийн бүс нутгийн өмнөд хэсгээр шөнөдөө 10-15 градус, өдөртөө 23-28 градус, бусад нутгаар шөнөдөө 7-12 градус, өдөртөө 18-23 градус дулаан байна.
2.Гал түймэр:
Хувийн өмчид гарсан: Баянхонгор аймгийн Баян-Овоо сумын Улаан-Үзүүр багийн “Есөн-Овоод” гэдэг газарт /аймгийн төвөөс баруун урд зүгт 276 км-т, сумын төвөөс баруун хойд зүгт 15 км-т/ 08.26-ны өдрийн 08:00 цагийн орчим иргэн С-ийн 4 ханатай гэр шатсан тухай мэдээллийг 08.26-ны өдрийн 12:15 цагт хүлээн авсан. Уг гал түймэрт Е /15 настай, эмэгтэй, III-IV зэргийн түлэгдэлттэй/ өртөж, мөн өдрийн 17:04 цагт аймгийн Нэгдсэн эмнэлгийн ЯТТ-ийн Эрчимт эмчилгээний тасгийн их эмчид хүлээлгэн өгсөн тухай мэдээллийг тус аймгийн Онцгой байдлын газраас мэдээлсэн.
Дорноговь аймгийн Сайншанд сумын 2 дугаар багт гал гарч байна гэсэн дуудлагыг 08.26-ны өдрийн 14:09 цагт хүлээн авсан. Тус аймгийн Онцгой байдлын газрын Гал түймэр унтраах, аврах 33 дугаар ангийн алба хаагчид 900 м замыг туулан 14:11 цагт очиход иргэн Ө-гийн 4х7 метрийн хэмжээтэй өрөөнд эд хогшил шатаж байсныг 5 минут ажиллан унтрааж, тус аймаг дахь Цагдаагийн газрын эрүүгийн мөрдөгчид хүлээлгэн өгсөн.
3.Геологийн гаралтай аюулт үзэгдэл:
Газар хөдлөлт: Булган аймгийн Баян-Агт сумын Халтар багийн “Халтарын гол” гэдэг газарт /аймгийн төвөөс баруун хойд зүгт 110 км-т, сумын төвөөс зүүн урд зүгт 23 км-т, Ө-48°51’00.0”, У-102°13’12.0”/ 08.27-ны өдрийн 04:06 цагт 3.9 магнитудын хүчтэй газар хөдлөлт болсон тухай мэдээллийг ООГХ-ээс мөн өдрийн 04:15 цагт цахим шуудангаар ирүүлсэн. Тус аймгийн Онцгой байдлын газраар дамжуулан сумын Засаг даргын Тамгын газрын даргатай холбогдож тодруулахад чичирхийлэл мэдрэгдээгүй бөгөөд учирсан хохиролгүй тухай мэдээлсэн.
4.Хүний үйл ажиллагаатай холбоотой осол:
Зам, тээврийн осол: Завхан аймгийн Тэлмэн сумын Өгөөмөр багийн “Тээлийн-Ам’’ гэдэг газар /аймгийн төвөөс зүүн хойд зүгт 120 км-т, сумын төвөөс баруун зүгт 30 км-т, Тосонцэнгэл сумын төвөөс баруун урд зүгт 90 км-т/ суудлын автомашин онхолдож 1 иргэн автомашины бүхээгийн төмөр хийцэд хавчуулагдаж нас барсан, гаргаж өгнө үү гэсэн Цагдаагийн байгууллагаас ирүүлсэн хүсэлтийг 08.26-ны өдрийн 23:26 цагт хүлээн авсан. Тус аймгийн Онцгой байдлын газрын Гал түймэр унтраах, аврах 39 дүгээр ангийн алба хаагчид 08.27-ны өдрийн 01:10 цагт очиход тус аймгийн Тэлмэн сумаас Улиастай сумын чиглэлд иргэн Б-гийн жолоодож явсан “Приус-20” загварын суудлын автомашин /2 зорчигчтой/ онхолдож, тус аймгийн харьяат иргэн Б /27 настай, эмэгтэй/ нь автомашины бүхээгийн төмөр хийцэд хавчуулагдан нас барсан байсан тул цогцсыг гаргаж, тус аймгийн Тосонцэнгэл сум дахь Цагдаагийн хэлтсийн эрүүгийн ахлах мөрдөгчид шилжүүлж өгсөн. Мөн иргэн Б /25 настай, эрэгтэй/, Б /37 настай, эмэгтэй/ нас барсан байсан.
Усны осол: Хөвсгөл аймгийн Рэнчинлхүмбэ сумын Хоолойн зах багийн “Шаргын голын-Эх” гэдэг газарт /аймгийн төвөөс хойд зүгт 320 км-т, сумын төвөөс хойд зүгт 50 км-т/ 08.19-ний өдрийн 17:00 цагийн орчим иргэн Б морьтой “Шаргын гол”-ыг гатлахдаа живсэн тухай дуудлагыг 08.26-ны өдрийн 09:30 цагт хүлээн авсан. Орон нутгийн иргэд эрэн хайх ажиллагааг зохион байгуулж, 08.20-ны өдрийн 11:00 цагт /осол болсон газраас 5 км-т/ “Шаргын гол”-оос иргэн Б /29 настай, эрэгтэй/-ийн унаж явсан морийг нь голын эргээс үхсэн байсныг олсон. Тус аймгийн Онцгой байдлын газрын Эрэн хайх аврах салбарын алба хаагчид 08.27-ны өдрийн 01:05 цагт Рэнчинлхүмбэ суманд очиж хоносон.
Өндрөөс унах: Нийслэлийн Хан-Уул дүүргийн 4 дүгээр хороонд цонхоор хүн үсрэх гээд байна дуудлагыг 08.26-ны өдрийн 11:24 цагт хүлээн авсан. Нийслэлийн Аврах ангийн алба хаагчид 9 км замыг туулан 11:35 цагт очиход иргэн А /35 настай, эрэгтэй, согтууруулах ундаа хэрэглэсэн/ гэр бүлийн маргааны улмаас цонхоор үсэрч амиа хорлох гэж байсныг буулгаж, тус дүүргийн Цагдаагийн 2 дугаар хэлтсийн эргүүлийн офицерт хүлээлгэн өгсөн.
Төөрсөн, сураггүй болсон: Нийслэлийн Чингэлтэй дүүргийн 17 дугаар хороо, “Зүрх-Уул” гэдэг газар хөгжлийн бэрхшээлтэй 1 хүн төөрсөн тухай дуудлагыг 07.19-ний өдрийн 23:32 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 10 дугаар ангийн алба хаагчид 08.26-ны өдөр Чингэлтэй дүүргийн харьяат иргэн Н /32 настай, эрэгтэй, хөгжлийн бэрхшээлтэй/-г Чингэлтэй дүүргийн 17 дугаар хорооны “Зүрх-Уул” орчмын зуслангийн бүсэд явганаар 7 км-т, автомашинтай 26 км-т эрэн хайх ажиллагааг зохион байгуулсан боловч үр дүнд хүрээгүй тул мөн өдрийн 17:00 цагт зогсоосон.
Архангай аймгийн Өлзийт сумын Бодонт багийн “Хархираан багалзуур” гэдэг газар /аймгийн төвөөс зүүн хойд зүгт 136 км-т, сумын төвөөс урд зүгт 3 км-т/ 08.23-ны өдрийн 16:00 цагийн орчим иргэн Б гэрээсээ мотоциклтой гараад сураггүй болсон тухай дуудлагыг 08.23-ны өдрийн 23:10 цагт хүлээн авсан. Тус аймгийн Онцгой байдлын газрын Эрэн хайх аврах салбарын алба хаагчид, сумын Засаг даргын Тамгын газрын ажилтнууд, ар гэрийн хүмүүс малчин Б /36 настай, эрэгтэй/-ыг эрэн хайх ажиллагааг зохион байгуулж, 08.23-ны өдрийн 17:00 цагийн орчим “Хархираан” голын эргээс мотоциклыг олсон. 08.26-ны өдөр “Хархираан багалзуур” гэдэг газраас “Их хүдэртийн-Ам” гэдэг газар хүртэл “Орхон” голын усанд завиар 20 км-т, “Орхон” голын эрэг дагуу 20 км-т явганаар болон автомашинтай эрэн хайх ажиллагааг зохион байгуулсан боловч үр дүнд хүрээгүй тул мөн өдрийн 20:10 цагт түр зогсоосон. 08.27-ны өдрийн 08:00 цагт эрэн хайх ажиллагааг эхлүүлсэн.
5.Ус, цаг уурын гаралтай аюулт үзэгдэл:
Гол, мөрний усны үер: Архангай аймгийн Өлзийт сумын Бодонт багийн “Хар-Усны тохой” гэдэг газар /аймгийн төвөөс зүүн хойд зүгт 136 км, сумын төвөөс урд зүгт 25 км-т/ малчин М-ийн 370 толгой бог мал “Орхон” голд боогдсон тухай дуудлагыг 08.26-ны өдрийн 10:10 цагт хүлээн авсан. Тус аймгийн Онцгой байдлын газрын Эрэн хайх, аврах салбарын алба хаагчид, ар гэрийн хүмүүс мөн өдрийн 15:40 цагт очиж, “Орхон” голд боогдсон малчин М-ийн 300 хурга, 70 ишиг, нийт 370 толгой бог малыг 4 цаг 20 минут ажиллаж аюулгүй газарт гаргаж, малчин М-д хүлээлгэн өгсөн.
Уруйн үер: Баян-Өлгий аймгийн Цэнгэл сумын Партизан, Хөшөөт багт 08.26-ны өдрийн 16:25 цагаас усархаг аадар бороо, цас орсны улмаас байшин, хашаа усанд автсан тухай дуудлагыг 08.26-ны өдрийн 21:45 цагт хүлээн авсан. Тус аймгийн Онцгой байдлын газрын Гал түймэр унтраах, аврах 71 дүгээр ангийн алба хаагчид, сумын мэргэжлийн ангийн ажилтнууд, нутгийн иргэд 18 айлын байшин, хашааны усыг соруулан, 1 метр өндөр, 1.2 метр өргөн, 490 метр урттай далан босгож, мөн 5 шуудуу даланг цэвэрлэж усны урсгалыг сайжруулан 3 шуудуу далангийн 6 хэсэг сэтэрсэн байсныг шороогоор нөхөж хэвийн болгосон. Нийт 78 айл усанд автаж, 10 шуудуу, далан сэтэрч бөглөрсөн байсныг 07 цаг 22 минут ажиллаж аюулгүй болгосон.
ОНЦГОЙ БАЙДЛЫН ЕРӨНХИЙ ГАЗАР