1.Цаг агаар:
Өнгөрсөн хоногт: Өвөрхангай аймагт цас орсон. Бусад нутгаар цаг агаар тогтуун байсан.
Өнөөдөр: Ихэнх нутгаар солигдмол үүлтэй. Хангайн уулархаг нутаг, говийн бүс нутгийн баруун хэсэг, Халх голын хөндийгөөр цас орж, явган шуурга шуурна. Бусад нутгаар цас орохгүй. Салхи баруун аймгуудын нутгийн баруун хэсгээр баруунаас, бусад нутгаар хойноос 5-10 м/с, говь, тал, хээрийн нутгаар 12-14 м/с хүрч ширүүснэ. Дархадын хотгор, Хангай, Хөвсгөл, Хэнтэйн уулархаг нутаг, Хүрэнбэлчир орчим, Завхан голын эх, Орхон-Туулын бэлчир орчмоор, Идэр, Тэс, Эг, Үүр, Сэлэнгэ, Хараа, Ерөө, Онон, Улз, Халх голын хөндий, Дарьгангын тал нутгаар 22-27 градус, Монгол-Алтайн уулархаг нутаг болон говийн бүс нутгийн баруун өмнөд хэсгээр 10-15 градус, бусад нутгаар 16-21 градус хүйтэн байна.
Улаанбаатар хотод: Их төлөв цэлмэг. Салхи хойноос 5-10 м/с. 18-20 градус хүйтэн байна.
Төлөв байдал: 28-нд Монгол-Алтай, Хангай, Хөвсгөл, Хэнтэйн уулархаг нутгаар, 29-нд төв болон говийн аймгуудын нутгийн зарим газраар цас орж, явган шуурга шуурна. Бусад хугацаанд цас орохгүй. Салхи 26-нд тал, хээрийн нутгаар 13-15 м/с хүрч ширүүснэ. 26-наас ихэнх нутгаар өдөртөө хүйтний эрч бага зэрэг суларч Дархадын хотгор, Завхан голын эх, Хүрэнбэлчир орчим, Идэр, Тэс, Байдраг голын хөндийгөөр шөнөдөө 35-40 градус, өдөртөө 21-26 градус, Увс нуурын хотгор, Хангай, Хөвсгөл, Хэнтэйн уулархаг нутаг, Эг, Үүр, Хараа, Ерөө, Туул, Тэрэлж, Хэрлэн, Онон, Улз, Халх голын хөндий, Дорнод-Дарьгангын тал нутгаар шөнөдөө 30-35 градус, өдөртөө 16-21 градус, говийн бүс нутгийн баруун өмнөд хэсгээр шөнөдөө 18-23 градус, өдөртөө 6-11 градус, бусад нутгаар шөнөдөө 24-29 градус, өдөртөө 11-16 градус хүйтэн байна.
2. Гал түймэр:
– Хувийн өмчид гарсан: Орхон аймгийн Баян-Өндөр сумын Согоот багийн III-50 дугаар байрны тагтан дээр гал гарч байна гэсэн дуудлагыг 12.24-ний өдрийн 06:56 цагт хүлээн авсан. Тус аймгийн Онцгой байдлын газрын Гал түймэр унтраах, аврах 56 дугаар ангийн алба хаагчид 3 км замыг туулан 07:09 цагт очиход иргэн А-ийн 2х1.5 метрийн хэмжээтэй тагтан дээр эд зүйл шатаж байсныг 6 минут ажиллан унтраасан.
Булган аймгийн Булган сумын Ачуут багийн Тамгад гэр шатаж байна гэсэн дуудлагыг 07:30 цагт хүлээн авсан. Тус аймгийн Онцгой байдлын газрын Гал түймэр унтраах, аврах 20 дугаар ангийн алба хаагчид 3.4 км зам туулан 07:33 цагт очиход иргэн С-ын 5 ханатай гэр шатаж байсныг 25 минут ажиллан унтраасан.
Нийслэлийн Баянзүрх дүүргийн 8 дугаар хороо, Эрдэнэтолгойн 44 дүгээр гудамжинд байшин шатаж байна гэсэн дуудлагыг 08:14 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 63 дугаар ангийн алба хаагчид 3.5 км замыг туулан 08:18 цагт очиход иргэн Э-ийн 10х6 метрийн хэмжээтэй байшингийн дээвэр шатаж байсныг 20 минут ажиллан унтраасан.
Төв аймгийн Зуунмод сумын Номт багийн “Соёмбо” 200 дугаар байр авто зогсоолд автомашин шатаж байна гэсэн дуудлагыг 12.24-ний өдрийн 12:03 цагт хүлээн авсан. Тус аймгийн Онцгой байдлын газрын Гал түймэр унтраах, аврах 24 дүгээр ангийн алба хаагчид 1 км замыг туулан, 12:05 цагт очиход иргэн Ц-ийн “Бонго Портер” загварын ачааны автомашин шатаж байсныг 23 минут ажиллан унтраасан.
Нийслэлийн Баянгол дүүргийн 21 дүгээр хороо, Горькийн 24 дүгээр гудамжинд байшин шатаж байна гэсэн дуудлагыг 23:35 цагт хүлээн авсан. Чингэлтэй дүүргийн Онцгой байдлын хэлтсийн Гал түймэр унтраах, аврах 10 дугаар ангийн алба хаагчид 5 км замыг туулан иргэн Г-ын 5х3 метрийн хэмжээтэй байшин шатаж байсныг 15 минут ажиллан унтраасан.
Нийслэлийн Баянгол дүүргийн 9 дүгээр хороо, Горькийн 5 дугаар гудамжинд байшин шатаж байна гэсэн дуудлагыг 03:38 цагт хүлээн авсан. Чингэлтэй дүүргийн Онцгой байдлын хэлтсийн Гал түймэр унтраах, аврах 10 дугаар ангийн алба хаагчид 5 км замыг туулан 03:48 цагт очиход иргэн Э-ын 8х7 метрийн хэмжээтэй байшин, иргэн З-ын 4 ханатай гэр тус тус шатаж байсныг 20 минут ажиллан унтраасан. Тус гал түймэрт Ховд аймгийн харьяат иргэн О /45-50 орчим настай, эмэгтэй/ өртөж нас барсан байсныг тус дүүргийн Цагдаагийн 2 дугаар хэлтсийн мөрдөгчид хүлээлгэн өгсөн.
3.Геологийн гаралтай аюулт үзэгдэл:
Газар хөдлөлт: Ховд аймгийн Дарви сумын Мөрөн багийн “Овоон дэн” гэдэг газар /аймгийн төвөөс урд зүгт 248 км, сумын төвөөс баруун зүгт 27 км-т, Ө-46°57’36.0”У-93°15’00.0”/ 12.24-ний өдрийн 08:48 цагт 4.9 магнитудын хүчтэй газар хөдлөлт болсон тухай мэдээллийг 08:55 цагт ООГХ-ээс цахим шуудангаар ирүүлсэн. Тус аймгийн Онцгой байдлын газраар дамжуулан сумын Засаг даргын Тамгын газрын даргаас тодруулахад иргэдэд чичирхийлэл мэдрэгдсэн бөгөөд учирсан хохиролгүй тухай мэдээлсэн.
Ховд аймгийн Дарви сумын Мөрөн багийн “Баясгалантын-Ам” гэдэг газар /аймгийн төвөөс урд зүгт 232 км, сумын төвөөс баруун зүгт 12 км-т, Ө- 46°57’36.0”У-93°27’00.0”/ 12.24-ний өдрийн 09:05 цагт 4.3 магнитудын хүчтэй газар хөдлөлт болсон тухай мэдээллийг 09:12 цагт ООГХ-ээс цахим шуудангаар ирүүлсэн. Тус аймгийн Онцгой байдлын газраар дамжуулан сумын Засаг даргын Тамгын газрын даргаас тодруулахад иргэдэд чичирхийлэл мэдрэгдсэн бөгөөд учирсан хохиролгүй тухай мэдээлсэн.
4.Хүний үйл ажиллагаатай холбоотой осол:
Төөрсөн, сураггүй болсон: Хэнтий аймгийн Цэнхэрмандал сумын Баянмод багийн “Эмгэн толгой” гэдэг газар /аймгийн төвөөс баруун зүгт 145 км, сумын төвөөс урд зүгт 20 км-т/ Тус сумын харьяат иргэн О 12.08-ны өдөр гэрээсээ гараад сураггүй болсон тухай дуудлагыг 12.20-ны өдрийн 12:00 цагт хүлээн авсан. Тус аймгийн Онцгой байдлын газрын Эрэн хайх, аврах салбарын алба хаагчид, ар гэрийнхэн иргэн О /50 настай, эмэгтэй/-ыг эрэн хайх ажиллагааг зохион байгуулж, 17:35 цагт тус сумын Хучхан багийн “Эмгэн толгой” гэдэг газраас зүүн урд зүгт 10,8 км-т /хонхор газарт дээшээ харсан байдалтай байсан/ цогцсыг олж, тус сумын Цагдаагийн хэсэгт шилжүүлэн өгсөн.
Бусад төрлийн осол /аюул/: Дорноговь аймгийн Замын-Үүд сумын 2 дугаар багийн Хилийн 1 дүгээр гудамжинд амины сууцны цонхонд хүн хавчуулагдан нас барсан тухай дуудлагыг 12.24-ны өдрийн 09:27 цагт Цагдаагийн байгууллагаас хүлээн авсан. Тус аймгийн Онцгой байдлын газрын Замын-Үүд сум дахь Онцгой байдлын хэлтсийн Гал түймэр унтраах, аврах 17 дугаар ангийн алба хаагчид 3 км замыг туулан 09:34 цагт очиход тус тоотын 6х4 метрийн хэмжээтэй байшингийн цонхонд иргэн М /51 настай, эрэгтэй/ хавчуулагдан нас барсан байсан цогцсыг гарган сум дундын Цагдаагийн хэлтсийн ахлах мөрдөн байцаагчид хүлээлгэн өгсөн.
ОНЦГОЙ БАЙДЛЫН ЕРӨНХИЙ ГАЗАР