1.Цаг агаар:
Өнгөрсөн хоногт: Нийт нутгаар цаг агаар тогтуун байсан.
Өнөөдөр: Төв болон зүүн аймгуудын нутгаар үүлшинэ. Монгол-Алтай, Хэнтийн уулархаг нутаг, Орхон-Сэлэнгийн сав газраар цас орж, явган шуурга шуурна. Бусад нутгаар багавтар үүлтэй, цас орохгүй. Салхи ихэнх нутгаар баруун хойноос секундэд 5-10 метр, говь, тал, хээрийн нутгаар секундэд 13-15 метр хүрч ширүүснэ. Увс нуур болон Дархадын хотгор, Идэр, Тэс голын хөндийгөөр 20-25 градус, Их нууруудын хотгор, Алтай, Хангай, Хөвсгөлийн уулархаг нутаг, Хүрэнбэлчир орчим, Байдраг голын хөндийгөөр 15-20 градус, цас багатай газар, говийн бүс нутгийн баруун өмнөд хэсгээр 4-9 градус, бусад нутгаар 10-15 градус хүйтэн байна.
Улаанбаатар хотод: Үүлшинэ. Шөнөдөө цас орохгүй. Өдөртөө ялимгүй цас орно. Салхи баруун хойноос секундэд 6-11 метр. Шөнөдөө Яармаг-Сонгины орчмоор 30-32 градус, бусад хэсгээр 22-24 градус, өдөртөө 12-14 градус хүйтэн байна.
Төлөв байдал: 21-нд төвийн аймгуудын зарим газар болон говийн аймгуудын нутгийн зүүн хэсгээр, 22-нд Хэнтийн уулархаг нутгаар, 24-нд баруун болон төвийн аймгуудын нутгийн хойд хэсгээр цас орж, явган шуурга шуурна. Салхи 21, 22-нд говь, тал, хээрийн нутгаар, 23-нд Алтайн салбар уулсаар, 24-нд зарим газраар секундэд 13-15 метр хүрч ширүүснэ. 21-нд нутгийн баруун хэсгээр, цаашдаа ихэнх нутгаар хүйтний эрч суларч Увс нуур болон Дархадын хотгор, Завхан, Идэр, Тэс голын хөндийгөөр шөнөдөө 34-39 градус, өдөртөө 21-26 градус, Их нууруудын хотгор, Алтай, Хангай, Хөвсгөл, Хэнтийн уулархаг нутаг, Хүрэнбэлчир орчим, Эг, Үүр, Орхон, Сэлэнгэ, Хараа, Ерөө, Туул, Тэрэлж, Хэрлэн, Онон, Улз, Халх голын хөндийгөөр шөнөдөө 25-30 градус, өдөртөө 12-17 градус, говийн бүс нутгийн баруун өмнөд хэсгээр шөнөдөө 11-16 градус, өдөртөө 0-5 градус, бусад нутгаар шөнөдөө 18-23 градус, өдөртөө 6-11 градус хүйтэн байна.
2. Гал түймэр:
– Хувийн өмчид гарсан: Дархан-Уул аймгийн Дархан сумын 6 дугаар баг 68 дугаар байрны дэргэд хогийн цэгт хог шатаж байна гэсэн дуудлагыг 02.19-ний өдрийн 14:46 цагт хүлээн авсан. Тус аймгийн Онцгой байдлын газрын Гал түймэр унтраах, аврах 22 дугаар ангийн алба хаагчид ангийн байрлалаас гарч 4 км замыг туулан 14:51 цагт очиж 2х2 хэмжээтэй хогийн цэгт хог шатаж байсныг 10 минут ажиллаж унтраасан.
Сүхбаатар аймгийн Баруун-Урт сумын 8 дугаар баг “Амгалан хошуу” гэдэг газар /аймгийн төвөөс урд зүгт 8 км, сумын төвд/ Хураалттай өвс шатаж байна гэсэн дуудлагыг 02.19-ний өдрийн 15:20 цагт хүлээн авсан. Тус аймгийн Онцгой байдлын газрын Гал түймэр унтраах, аврах 15 дугаар ангийн алба хаагчид 8 км замыг туулан иргэн Ч-ийн хашаанд хураалттай байсан 15 тонн өвснөөс 5 тн өвс шатаж байсныг 2 цаг 56 минут ажиллаж унтраасан.
Нийслэлийн Баянзүрх дүүргийн 12 дугаар хороо, Жанжины 19 дүгээр гудамжинд гэр шатаж байна гэсэн дуудлагыг 02.19-ний өдрийн 16:10 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 63 дугаар ангийн алба хаагчид 2 км замыг туулан иргэн З-ын 5 ханатай гэр шатаж байсныг 10 минут ажиллаж унтраасан.
Нийслэлийн Баянзүрх дүүргийн 23 дугаар хороо, Баатархайрханы 5 дугаар хэсэгт автомашин шатаж байна гэсэн дуудлагыг 02.19-ний өдрийн 16:30 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 35 дугаар ангийн алба хаагчид 9 км замыг туулан очиход иргэн С-ийн “Дэевүү Реззо” загварын суудлын автомашин шатаж байсныг 5 минут ажиллаж унтраасан.
Хэнтий аймгийн Хэрлэн сумын 1 дүгээр багийн “Цацал” хорооллын 4 дүгээр гудамжинд байшингийн дээврийн хэсэг шатаж байна гэсэн дуудлагыг 02.19-ний өдрийн 19:21 цагт хүлээн авсан. Тус аймгийн Онцгой байдлын газрын Гал түймэр унтраах, аврах 32 дугаар ангийн алба хаагчид 1.5 км замыг туулан дуудлагын дагуу очиж иргэн Б-ийн 10х9 метрийн хэмжээтэй байшингийн дээврийн хэсэг шатаж байсныг 32 минут ажиллаж унтраасан.
Дорнод аймгийн Хэрлэн (Сүмбэр) сумын 2 дугаар багийн “Хэрлэн” хорооллын 3 дугаар гудамжинд байшингийн дээврийн хэсэг шатаж байна гэсэн дуудлагыг 02.19-ний өдрийн 21:24 цагт хүлээн авсан. Тус аймгийн Онцгой байдлын газрын Гал түймэр унтраах, аврах 52 дугаар ангийн алба хаагчтд 4 км замыг туулан очиход иргэн Ө-ийн 6х5 метрийн хэмжээтэй байшингийн дээврийн хэсэг шатаж байсныг 43 минут ажиллаж унтраасан.
ОНЦГОЙ БАЙДЛЫН ЕРӨНХИЙ ГАЗАР