1.Цаг агаар:
Өнгөрсөн хоногт: Баянхонгор, Дорнод аймгийн нутгийн зарим хэсэг нойтон цас орсон. Бусад нутгаар цаг агаар тогтуун байлаа.
Өнөөдөр: Ихэнх нутгаар солигдмол үүлтэй. Хангай, Хэнтийн уулархаг нутаг, Хэрлэн, Онон, Улз голын хөндийгөөр хур тунадас орно. Бусад нутгаар хур тунадас орохгүй. Салхи нийт нутгаар хойноос 5-10 м/с, говь, тал, хээрийн нутгаар 14-16 м/с хүрч ширүүснэ. Хангай, Хөвсгөл, Хэнтийн уулархаг нутаг, Идэр, Тэс, Туул, Тэрэлж, Хэрлэн, Онон, Улз, Халх, голын хөндийгөөр 3-8 градус, Их нууруудын хотгор болон Алтайн өвөр говиор 16-21 градус, бусад нутгаар 7-12 градус дулаан байна.
Улаанбаатар хотод: Үүлшиж, ялимгүй хур тунадас орно. Салхи зүүн хойноос 6-11 м/с, 5-7 градус дулаан байна.
Төлөв байдал: 13-ны өдөр зүүн аймгуудын нутгийн зүүн хэсгээр нойтон цас, 16-ны өдөр Монгол-Алтай, Хангай, Хөвсгөл, Хэнтийн уулархаг нутгаар бороо орно. Бусад хугацаанд нийт нутгаар хур тунадас орохгүй. Салхи ихэнх хугацаанд 6-11 м/с. Ихэнх нутгаар дулаарч Алтай, Хангай, Хөвсгөл, Хэнтийн уулархаг нутаг, Идэр, Тэс, Завхан, Байдраг, Туул, Тэрэлж голын хөндийгөөр шөнөдөө 5-10 градус хүйтэн, өдөртөө 9-14 градус, Их нууруудын хотгор, говийн бүс нутгийн баруун өмнөд хэсгээр шөнөдөө 5-10 градус, өдөртөө 20-25 градус дулаан, бусад нутгаар шөнөдөө 3 градус хүйтнээс 2 градус дулаан, өдөртөө 16-21 градус дулаан байна.
2. Гал түймэр:
Объектын түймэр: Нийслэлийн Баянзүрх дүүргийн 21 дүгээр хороонд байшин шатаж байна гэсэн дуудлагыг 05.11-ний өдрийн 14:57 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 35 дугаар ангийн алба хаагчид 5 км замыг туулан 15:07 цагт очиход иргэн А-гийн 6×8 метрийн хэмжээтэй байшингийн дээвэр шатаж 10 минут ажиллаж унтраасан.
Чингэлтэй дүүргийн 17 дугаар хороо, “Зүрх” уулын Дунд дэлгүүрийн буудал гэдэг газар өнжмөл өвс шатаж байна гэсэн дуудлагыг 05.11-ний өдрийн 15:28 цагт хүлээн авсан. Сүхбаатар дүүргийн Онцгой байдлын хэлтсийн Гал түймэр унтраах 34 дүгээр ангийн алба хаагчид 7 км замыг туулан 15:38 цагт очиход 20 га орчим талбайд өнжмөл өвс, 4×5 хэмжээтэй байшингийн үүдний амбаар, 10 метр орчим урттай хашаа тус тус шатаж байсан. Хүч нэмэгдүүлэн Сүхбаатар дүүргийн Онцгой байдлын хэлтсийн Гал түймэр унтраах, аврах 34 дүгээр анги, Чингэлтэй дүүргийн Онцгой байдлын хэлтсийн Гал түймэр унтраах, аврах 10 дугаар ангийн алба хаагчид 3 цаг ажиллаж унтраасан.
Чингэлтэй дүүргийн 12 дугаар хороонд байшин шатаж байна гэсэн дуудлагыг 05.11-ний өдрийн 17:59 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 10 дугаар ангийн алба хаагчид 4.5 км замыг туулан 18:08 цагт очиход иргэн М-ийн 5×8 метрийн хэмжээтэй байшин шатаж байсныг 25 минут ажиллаж унтраасан.
Сүхбаатар дүүргийн 11 дүгээр хороо, “Поуан” төвд хогийн цэгт хог шатаж байна гэсэн дуудлагыг 05.11-ний өдрийн 20:07 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 10 дугаар ангийн алба хаагчид 5.5 км замыг туулан 20:16 цагт очиход хогийн цэгт хог шатаж байсныг 5 минут ажиллаж унтраасан.
Багануур дүүргийн 7 дугаар хороонд хашаа шатаж байна гэсэн дуудлагыг 05.11-ний өдрийн 20:46 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 28 дугаар ангийн алба хаагчид 1.5 км замыг туулан 20:49 цагт очиход иргэн Ө-гийн 2 метр урттай хашаа шатаж байсныг 3 минут ажиллаж унтраасан.
Сонгинохайрхан дүүргийн 37 дугаар хороонд орцонд утаажилттай байна гэсэн дуудлагыг 05.11-ний өдрийн 23:50 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 26 дугаар ангийн алба хаагчид 5 км замыг туулан 23:58 цагт очиход тус орцны хогийн сувагт хог шатаж байсныг 15 минут ажиллаж унтраасан. Утаажилтын бүсээс тус байрны 112 иргэнийг аюулгүй газарт гаргасан.
Дархан-Уул аймгийн Дархан сумын 14 дүгээр баг дахь “Цэцэрлэгт хүрээлэн”-д өнжмөл шар өвс шатаж байна гэсэн дуудлагыг 05.11-ний өдрийн 19:19 цагт хүлээн авсан. Тус аймгийн Онцгой байдлын газрын Гал түймэр унтраах, аврах 22 дугаар ангийн алба хаагчид 2 км замыг туулан 19:22 цагт очиход 32м2 талбайд өнжмөл шар өвс шатаж байсныг 5 минут ажиллаж унтраасан.
Говь-Алтай аймгийн Есөнбулаг сумын Баяншанд багт амбаар шатаж байна гэсэн дуудлагыг 05.11-ний өдрийн 19:30 цагт хүлээн авсан. Тус аймгийн Онцгой байдлын газрын Гал түймэр унтраах, аврах 59 дүгээр ангийн алба хаагчид 2 км замыг туулан 19:34 цагт очиход иргэн Б-гийн 2х3 метрийн хэмжээтэй амбаар шатаж байсныг 15 минут ажиллаж унтраасан.
Орхон аймгийн Баян-Өндөр сумын Даваат багийн Ундрагын 23 дугаар гудамжины задгайд байшин шатаж байна гэсэн дуудлагыг 05.11-ний өдрийн 23:47 цагт хүлээн авсан. Тус аймгийн Онцгой байдлын газрын Гал түймэр унтраах, аврах 81 дүгээр ангийн алба хаагчид 6 км замыг туулан 23:56 цагт очиход иргэн Б-гийн 4х12 метрийн хэмжээтэй чингэлэг шатаж байсныг 1 цаг 16 минут ажиллаж унтраасан.
Ой, хээрийн түймэр: Хэнтий аймгийн Норовлин сумын Онон багийн “Зүүн Олцийн-Ам” гэдэг газар /аймгийн төвөөс хойд зүгт 200 км-т, сумын төвөөс зүүн хойд зүгт 40 км-т/ 05.11-ний өдрийн 19:00 цагийн орчим ойн түймэр гарсан тухай дуудлагыг мөн өдрийн 20:50 цагт хүлээн авсан. Тус сумын мэргэжлийн ангийн алба хаагчид ажиллаж, 05.12-ны өдрийн 00:15 цагт түймрийг унтраасан. Урьдчилсан байдлаар түймэрт 2.5 га орчим талбай шатсан бөгөөд манаж хоносон. Тус аймгийн Онцгой байдлын газрын Батноров сумын Бэрх тосгон дахь Гал түймэр унтраах, аврах 42 дугаар анги, Дадал сумын мэргэжлийн ангийн алба хаагчид 22:05 цагт түймрийн голомт руу хөдөлсөн бүлэг Норовлин суманд 02:05 цагт очиж хоноглосон.
ОНЦГОЙ БАЙДЛЫН ЕРӨНХИЙ ГАЗАР