1.Цаг агаар
Өнгөрсөн хоногт: Улаанбаатар хот болон Архангай, Баян-Өлгий, Булган, Дорнод, Завхан, Увс, Хөвсгөл аймгуудад бороо орсон. Бусад нутгаар цаг агаар тогтуун байсан.
Өнөөдөр: Ихэнх нутгаар үүлшинэ. Баруун, төв, говийн аймгуудын нутгийн зарим газраар бороо, дуу цахилгаантай аадар бороо орно. Бусад нутгаар бороо орохгүй. Нутгийн баруун хэсгээр баруун хойноос, бусад нутгаар баруун өмнөөс 6-11 м/с, Монгол-Алтайн уулархаг нутгаар 14-16 м/с хүрч, зарим газраар борооны өмнө түр зуур ширүүснэ. Дархадын хотгор болон Монгол-Алтай, Хангай, Хөвсгөлийн уулархаг нутаг, Завхан голын эх, Хүрэнбэлчир орчмоор 15-20 градус, Их нууруудын хотгороор 20-25 градус, Орхон-Сэлэнгийн сав газар болон говь, тал, хээрийн нутгаар 29-34 градус, бусад нутгаар 24-29 градус дулаан байна.
Улаанбаатар хотод: Үүлшинэ. Дуу цахилгаантай бага зэргийн аадар бороо орно. Салхи баруун өмнөөс 5-10 м/с. 27-29 градус дулаан байна.
Төлөв байдал: 20-нд баруун болон төвийн аймгуудын нутгийн зарим газар, зүүн аймгуудын нутгийн баруун хэсгээр, 21-нд баруун болон говийн аймгуудын нутгийн зарим газар, төвийн аймгуудын ихэнх нутгаар, 22-нд төв болон зүүн аймгуудын ихэнх нутаг, говийн аймгуудын нутгийн зарим газраар, 23-нд төвийн аймгуудын зарим газар, зүүн аймгуудын ихэнх нутгаар бороо, дуу цахилгаантай аадар бороо орно. Салхи ихэнх хугацаанд 6-11 м/с, 20, 23-нд нутгийн зарим газраар, 21, 22-нд говь, тал, хээрийн нутгаар 15-17 м/с хүрч ширүүснэ. 20-21-нд баруун болон төвийн аймгуудын нутгаар, цаашдаа нутгийн хойд хэсгээр бага зэрэг сэрүүсэж Дархадын хотгор, Монгол-Алтай, Хангай, Хөвсгөл, Хэнтийн уулархаг нутаг, Завхан голын эх, Хүрэнбэлчир орчим, Идэр, Тэс, Тэрэлж голын хөндийгөөр шөнөдөө 0-5 градус, өдөртөө 13-18 градус, говийн бүс нутгийн өмнөд хэсгээр шөнөдөө 16-21 градус, өдөртөө 28-33 градус, бусад нутгаар шөнөдөө 7-12 градус, өдөртөө 18-23 градус дулаан байна.
2.Гал түймэр
Объектын түймэр: Төв аймаг, Эрдэнэсант сум. Улаан-Ухаа багийн 2 дугаар хорооны 10 дугаар гудамжинд иргэн Б-ийн 5х10 метрийн хэмжээтэй байшин 06:50 цагийн орчимд шатсан тухай мэдээллийг 07:34 цагт хүлээн авсан.
Тус сумын Засаг даргын Тамгын газрын ажилтнууд, орон нутгийн иргэд 06:55 цаг очиж, 01:20 цаг ажиллан гал түймрийг унтраасан тухай мэдээллийг сумын Засаг даргын Тамгын газрын дарга аймгийн Онцгой байдлын газарт мэдэгдсэн.
Улаанбаатар хот, Багахангай дүүрэг. 1 дүгээр хороо, 1 дүгээр гудамжинд байшин шатаж байна гэсэн дуудлагыг 11:25 цагт хүлээн авсан.
Тус дүүргийн Онцгой байдлын хэлтсийн Гал түймэр унтраах, аврах 80 дугаар ангийн алба хаагчид 2 км замыг туулан 11:28 цагт очиход иргэн М-ын 10х9 хэмжээтэй байшингийн 4х3 метрийн хэмжээтэй өрөөнд эд зүйл шатаж байсныг 10 минут ажиллан унтраасан.
Улаанбаатар хот, Баянзүрх дүүрэг. 11 дүгээр хороо, Эмийн ургамалын 31 дүгээр гудамжинд гэр шатаж байна гэсэн дуудлагыг 11:36 цагт хүлээн авсан.
Тус дүүргийн Онцгой байдлын хэлтсийн Гал түймэр унтраах, аврах 63 дугаар ангийн алба хаагчид 15 км замыг туулан 11:49 цагт очиход иргэн С-ийн 5 ханатай 2 гэр, 4 метр орчим хашаа, шатаж байсныг 10 минут ажиллан унтраасан.
Дорноговь аймаг, Замын-Үүд сум. 6 дугаар хороо, Залуучууд зочид буудлын хойд талд хог шатаж байна гэсэн дуудлагыг 12:33 цагт хүлээн авсан.
Чингэлтэй дүүргийн Онцгой байдлын хэлтсийн Гал түймэр унтраах, аврах 10 дугаар ангийн алба хаагчид 12:34 цагт ангиас гарч, 1.5 км замыг туулан 12:36 цагт очиход хогийн цэгт хог шатаж байсныг 10 минут ажиллан унтраасан.
Улаанбаатар хот, Сүхбаатар дүүрэг. 15 дугаар хороо, Өвөрсогоотын задгайд хог шатаж байна гэсэн дуудлагыг 22:20 цагт хүлээн авсан.
Тус дүүргийн Онцгой байдлын хэлтсийн Гал түймэр унтраах, аврах 34 дүгээр ангийн алба хаагчид 6 км замыг туулан 22:27 цагт очиход хогийн цэгт хог шатаж байсныг 10 минут ажиллан унтраасан.
3.Хүний үйл ажиллагаатай холбоотой осол
Усны осол: Булган аймаг, Хутаг-Өндөр сум. Тээл багийн “Баруун тэрмийн тавилан” гэдэг газар /аймгийн төвөөс баруун зүгт 170 км-т, сумын төвөөс баруун зүгт 25 км-т/ 07.10-ны өдрийн 16:00 цагийн орчим малчин Д “Сэлэнгэ” мөрний усаар адуугаа гаргаж байгаад морьтойгоо осолдсон тухай дуудлагыг мөн өдрийн 16:25 цагт хүлээн авсан.
Тус аймгийн Онцгой байдлын газрын Эрэн хайх аврах, салбар, Гал түймэр унтраах, аврах 50 дугаар ангийн алба хаагчид, ар гэрийнхний хамт 07.18-ны өдрийн 05:30 цагаас 20:30 цаг хүртэлх хугацаанд иргэн Д /33 настай, эрэгтэй/-г эрэн хайх ажиллагааг Хутаг-Өндөр сумын Тээл багийн “Баруун тэрмийн тавилан” гэдэг газраас зүүн зүгт “Цагаан тохой” гэдэг газар хүртэл 45 км-т “Сэлэнгэ” мөрний усаар завиар урсаж, мөн голын эрэг дагуу явганаар 25 км-т эрэн хайх ажиллагааг зохион байгуулсан. 07.19-ний өдрийн 05:30 цагт эрэн хайх ажиллагааг эхлүүлсэн.
Улаанбаатар хот, Хан-Уул дүүрэг. 20 дугаар хороо, “Мишээл-Экспо”-ын урд “Туул” голын салаанд 1 хүүхэд живсэн гэсэн дуудлагыг 15:33 цагт хүлээн авсан.
Нийслэлийн аврах ангийн алба хаагчид 10 км замыг туулан 15:54 цагт очиж, 3 метрийн гүнд 4 удаагийн шумбалт хийж 16:00 цагт Хан-Уул дүүргийн харьяат Б /15 настай, эрэгтэй/-ын цогцсыг олж гарган Цагдаагийн байгууллагад шилжүүлэн өгсөн.
ОНЦГОЙ БАЙДЛЫН ЕРӨНХИЙ ГАЗАР