1.Цаг агаар
Өнгөрсөн хоногт: Баян-Өлгий, Булган, Говьсүмбэр, Дархан-Уул, Дорноговь, Дорнод, Орхон, Өвөрхангай, Өмнөговь, Сэлэнгэ, Төв, Хөвсгөл, Хэнтий аймгуудын нутгаар бороо орсон. Бусад нутгаар цаг агаар тогтуун байсан.
Өнөөдөр: Ихэнх нутгаар солигдмол үүлтэй. Баруун, төв, зүүн аймгуудын нутгийн зарим газраар бороо, дуу цахилгаантай аадар бороо орно. Салхи нутгийн хойд хэсгээр баруун хойноос, бусад хэсгээр баруун өмнөөс секундэд 5-10 метр, говь, тал, хээрийн нутгаар секундэд 13-15 метр, зарим газраар борооны өмнө түр зуур ширүүснэ. Алтай, Хангай, Хөвсгөлийн уулархаг нутаг, Эг, Үүр голын хөндийгөөр 15-20 градус, говийн бүс нутгийн өмнөд хэсгээр 30-35 градус, Их нууруудын хотгор, говийн бүс нутгийн хойд хэсэг болон Дарьгангын талаар 25-30 градус, бусад нутгаар 20-25 градус дулаан байна.
Улаанбаатар хотод: Шөнөдөө үүлэрхэг, бага зэргийн бороо орно. Өдөртөө үүл багасна, бороо орохгүй. Салхи баруун өмнөөс секундэд 6-11 метр. Шөнөдөө 10-12 градус, өдөртөө 23-25 градус дулаан байна.
Төлөв байдал: 24-нд баруун, төв, зүүн аймгуудын нутгийн зарим газар, говийн аймгуудын нутгийн хойд хэсгээр, 25-нд баруун болон говийн аймгуудын нутгийн хойд хэсэг, төв болон зүүн аймгуудын нутгийн зарим газраар, 26-нд баруун аймгуудын нутгийн зүүн хэсэг, төвийн аймгуудын ихэнх нутаг, говь болон зүүн аймгуудын нутгийн зарим газраар, 27-нд төв болон зүүн аймгуудын нутгийн зарим газраар бороо, дуу цахилгаантай аадар бороо орно. Салхи ихэнх хугацаанд секундэд 5-10 метр, 25-нд нутгийн өмнөд хэсгээр, 26, 27-нд говь, тал, хээрийн нутгаар секундэд 13-15 метр хүрч, борооны өмнө түр зуур ширүүснэ. Дархадын хотгор, Монгол-Алтай, Хангай, Хөвсгөл, Хэнтийн уулархаг нутаг, Завхан голын эх, Хүрэнбэлчир орчим, Идэр, Тэс, Эг, Үүр, Тэрэлж голын хөндийгөөр шөнөдөө 1-6 градус, өдөртөө 15-20 градус, говийн бүс нутгийн өмнөд хэсгээр шөнөдөө 16-21 градус, өдөртөө 29-34 градус, бусад нутгаар шөнөдөө 8-13 градус, өдөртөө 18-23 градус дулаан байна.
2.Гал түймэр
Объектын түймэр: Дорноговь аймаг, Замын-Үүд сум. 1 дүгээр багийн Эрх чөлөөний гудамжинд зочид буудлын 4 дүгээр давхарт гал гарч байна гэсэн дуудлагыг 07.23-ны өдрийн 00:00 цагт хүлээн авсан.
Тус аймгийн Онцгой байдлын газрын Гал түймэр унтраах, аврах 17 дугаар ангийн алба хаагчид 3 км замыг туулан 00:04 цагт очиход иргэн Э-ын эзэмшлийн зочид буудлын 4 дүгээр давхрын 7 тоот өрөөнд зурагт, сандал, буйдан шатаж байсныг 31 минут ажиллаж унтраасан.
Хэнтий аймаг, Норовлин сум. Онон багийн “Кабинтайн гарам” гэдэг газар /аймгийн төвөөс зүүн зүгт 200 км, сумын төвөөс баруун хойд зүгт 4 км/-т байшин шатсан тухай мэдээллийг 07.22-ны өдрийн 15:40 цагт хүлээн авсан.
Тус сумын Иргэдийн төлөөлөгчдийн хурлын дарга Б-ээр ахлуулсан ажилтнууд 08:35 цагт очиж иргэн Г-ын 12х5 метрийн хэмжээтэй байшин шатаж байсныг 3 цаг ажиллаж унтраасан.
Сэлэнгэ аймаг, Сүхбаатар сум. 5 дугаар багийн 2 дугаар хэсэгт эзэнгүй байшингаас утаа гарч байна гэсэн дуудлагыг 07.22-ны өдрийн 16:14 цагт хүлээн авсан.
Тус аймгийн Онцгой байдлын газрын Гал түймэр унтраах, аврах 36 дугаар ангийн алба хаагчид 5 км замыг туулан 16:22 цагт очиход иргэн М-ын 28х6 метрийн хэмжээтэй залгаа 2 байшин шатаж байсныг 43 минут ажиллаж унтраасан.
Улаанбаатар хот, Баянзүрх дүүрэг. 8 дугаар хороо, Холбоо толгойн 6 дугаар гудамжинд байшин шатаж байна гэсэн дуудлагыг 07.23-ны өдрийн 02:25 цагт хүлээн авсан.
Тус дүүргийн Онцгой байдлын хэлтсийн Гал түймэр унтраах, аврах 63 дугаар ангийн алба хаагчид 7 км замыг туулан 02:45 цагт очиход иргэн Э-ын 8х5 метрийн хэмжээтэй байшин байсныг 15 минут ажиллаж унтраасан.
Улаанбаатар хот, Баянзүрх дүүрэг. 20 дугаар хороо, Гачууртын Их-Аманд байшин шатаж байна гэсэн дуудлагыг 07.23-ны өдрийн 04:27 цагт хүлээн авсан.
Тус дүүргийн Онцгой байдлын хэлтсийн Гал түймэр унтраах, аврах 35 дугаар ангийн алба хаагчид 11 км замыг туулан 04:48 цагт очиход эзэн тодорхойгүй 10х10 метрийн хэмжээтэй 2 давхар монсардтай байшин, 3х10 метрийн хэмжээтэй гарааш тус тус шатаж байсныг 15 минут ажиллаж унтраасан.
3.Хүний үйл ажиллагаатай холбоотой осол
Зам, тээврийн осол: Баян-Өлгий аймаг, Толбо сум. Орон нутгийн автозамын 33 дугаар тэмдэгтийн дэргэд /аймгийн төвөөс урд зүгт 33 км, сумын төвөөс баруун хойд зүгт 37 км/-т “Шар нуур” гэдэг газар зам тээврийн осол гарсан тухай дуудлагыг 07.22-ны өдрийн 20:25 цагт хүлээн авсан.
Тус аймгийн Онцгой байдлын газрын Эрэн хайх, аврах бүлгийн алба хаагчид 33 км замыг туулан 20:50 цагт очиход тус аймгийн Толбо сумаас Өлгий сумын чиглэлд зорчин явсан “Харриер” загварын суудлын автомашин автозамын төмөр хашлагыг мөргөж Дархан уул аймгийн харьяат иргэн Ү/38 настай, эрэгтэй/ автомашины эд ангид хавчуулагдаж нас барсан байсныг 1 цаг 20 минут ажиллаж цогцсыг гарган аймгийн Цагдаагийн газрын мөрдөн байцаах тасагт шилжүүлэн өгсөн.
Усны осол: Булган аймаг, Хутаг-Өндөр сум. Тээл багийн “Баруун тэрмийн тавилан” гэдэг газар /аймгийн төвөөс баруун зүгт 170 км, сумын төвөөс баруун зүгт 25 км/-т 07.10-ны өдрийн 16:00 цагийн орчим малчин Д “Сэлэнгэ” мөрний усаар адуугаа гаргаж байгаад морьтойгоо осолдсон тухай дуудлагыг мөн өдрийн 16:25 цагт хүлээн авсан.
Тус аймгийн Онцгой байдлын газрын Эрэн хайх аврах, салбар, Гал түймэр унтраах, аврах 50 дугаар ангийн алба хаагчид, ар гэрийнхэн 07.22-ны өдрийн 06:00 цагаас эхлэн иргэн Д /33 настай, эрэгтэй/-г эрэн хайх ажиллагааг зохион байгуулж мөн өдрийн 13:05 цагт анх осолдсон газраас зүүн зүгт 15 км-т, Тээл багийн “Зүүн тэрэм” гэдэг газраас “Сэлэнгэ” голын усны мандал дээр цогцос нь хөвж байсныг олж гарган аймгийн Цагдаагийн газрын мөрдөн байцаах тасагт шилжүүлэн өгсөн.
ОНЦГОЙ БАЙДЛЫН ЕРӨНХИЙ ГАЗАР