1. Цаг агаар:
Өнгөрсөн хоногт: Орхон, Өмнөговь аймагт бага зэрэг бороо орсон. Бусад нутгаар цаг агаар тогтуун байлаа.
Өнөөдөр: Нутгийн өмнөд хэсгээр солигдмол үүлтэй. Хангайн нурууны өвөр бэлээр хур тунадас орно. Бусад нутгаар багавтар үүлтэй, хур тунадас орохгүй. Салхи нутгийн өмнөд хэсгээр зүүнээс, бусад нутгаар баруун хойноос 5-10 м/с, говь, талын нутгаар 12-14 м/с хүрч ширүүснэ. Дархадын хотгор, Хангай, Хөвсгөл, Хэнтийн уулархаг нутаг, Завхан голын эх, Хүрэнбэлчир орчим, Туул, Тэрэлж, Халх голын хөндийгөөр 7-12 градус, Их нууруудын хотгор болон говийн бүс нутгийн өмнөд хэсгээр 16-21 градус, бусад нутгаар 11-16 градус дулаан байна.
Улаанбаатар хотод: Багавтар үүлтэй, хур тунадас орохгүй, салхи баруун хойноос 4-9 м/с, 11-13 градус дулаан байна.
Төлөв байдал: 20-нд Хөвсгөлийн уулархаг нутаг, говийн бүс нутгийн зүүн өмнөд хэсгээр, 21-нд баруун аймгуудын нутгийн зүүн хойд хэсэг, төв, зүүн, говийн аймгуудын нутгийн зарим газраар, 22-нд төвийн аймгуудын нугийн зүүн хэсэг, зүүн аймгуудын нутгийн зарим газраар, 23-нд зүүн аймгуудын нутгийн зарим газраар хур тунадас орно. Салхи 21, 22-нд нутгийн зарим газраар, 23-нд нутгийн зүүн хэсгээр түр зуур 16-18 м/с хүрч ширүүснэ. Хугацааны эхээр Хангай, Хөвсгөл, Хэнтийн уулархаг нутаг, Завхан голын эх, Хүрэнбэлчир орчим, Эг, Үүр, Идэр, Тэс, Туул, Тэрэлж голын хөндийгөөр шөнөдөө 3-8 градус хүйтэн, өдөртөө 8-13 градус, говийн бүс нутгийн өмнөд хэсгээр шөнөдөө 4-9 градус, өдөртөө 18-23 градус дулаан, бусад нутгаар шөнөдөө 2 градус хүйтнээс 3 градус дулаан, өдөртөө 13-18 градус дулаан байна. 21-нд ихэнх нутгаар, 22-нд нутгийн зүүн хагаст хүйтэрнэ.
2.Гал түймэр:
ААН, байгууллагын өмчид гарсан: Нийслэлийн Налайх дүүргийн 6 дугаар хорооны “Задгай”-д гэр шатаж байна гэсэн дуудлагыг 09.18-ны өдрийн 23:23 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 28 дугаар ангийн алба хаагчид 19 км зам туулан 23:43 цагт очиход 5 ханатай гэр шатаж байсныг 7 минут ажиллаж унтраасан.
Хувийн өмчид гарсан: Нийслэлийн Сонгинохайрхан дүүргийн 24 дүгээр хороонд амбаар шатаж байна гэсэн дуудлагыг 09.18-ны өдрийн 10:07 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 29 дүгээр ангийн алба хаагчид 6 км зам туулан 10:15 цагт очиход иргэн Г-гийн 4х3 метрийн хэмжээтэй амбаар шатаж байсныг 25 минут ажиллаж унтраасан.
Сүхбаатар дүүргийн 19 дүгээр хорооны “Хандгайт”-ын зуслангийн “Задгай”-д байшин шатаж байна гэсэн дуудлагыг 09.18-ны өдрийн 10:28 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 74 дүгээр ангийн алба хаагчид 6.5 км зам туулан 10:34 цагт очиход иргэн О-гийн 5х8 метрийн хэмжээтэй байшингийн дээврийн хэсэг шатаж байсныг 20 минут ажиллаж унтраасан.
Дархан-Уул аймгийн Дархан сумын 7 дугаар багт байшин шатаж байна гэсэн дуудлагыг 09.18-ны өдрийн 10:29 цагт хүлээн авсан. Тус аймгийн Онцгой байдлын газрын Гал түймэр унтраах, аврах 22 дугаар ангийн алба хаагчид 5 км зам туулан 10:38 цагт очиход иргэн Г-гийн 8х6 метрийн хэмжээтэй байшингийн 3х3 метрийн хэмжээтэй гал тогооны өрөө шатаж байсныг 30 минут ажиллаж унтраасан.
Нийслэлийн Баянгол дүүргийн 18 дугаар хорооны “Задгай”-д хог шатаж байна гэсэн дуудлагыг 09.18-ны өдрийн 13:27 цагт хүлээн авсан. Чингэлтэй дүүргийн Онцгой байдлын хэлтсийн Гал түймэр унтраах, аврах 10 дугаар ангийн алба хаагчид 4 км зам туулан 13:33 цагт очиж 10 минут ажиллаж унтраасан.
Чингэлтэй дүүргийн 10 дугаар хороонд байшин шатаж байна гэсэн дуудлагыг 09.18-ны өдрийн 16:55 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 10 дугаар ангийн алба хаагчид 5 км зам туулан 17:01 цагт очиход иргэн Б-гийн 8х12 метрийн хэмжээтэй байшингийн дээврийн хэсэг, 4х3 метрийн хэмжээтэй амбаарын дээвэр шатаж байсныг 20 минут ажиллаж унтраасан.
3. Ой, хээрийн түймэр:
Хээрийн түймэр: Дорнод аймгийн Матад сумын Эрдэнэбадрах багийн “Сүүжийн хүрэн” гэдэг газар /аймгийн төвөөс зүүн урд зүгт 280 км-т, сумын төвөөс зүүн урд зүгт 150 км-т/ хээрийн түймэр гарсан тухай дуудлагыг 09.17-ны өдрийн 16:52 цагт хүлээн авсан. Хилийн 0146 дугаар ангийн 8 дугаар застав, Хилийн 0146 дугаар ангийн алба хаагчид мөн өдрийн 23:20 цагт, “Петро-Чайна дачин тамсаг” ХХК-ийн ажилтнууд 23:30 цагт, Сүхбаатар аймгийн Онцгой байдлын газрын Эрдэнэцагаан сум дахь Гал түймэр унтраах, аврах 47 дугаар ангийн алба хаагчид 09.18-ны өдрийн 03:30 цагт, тус аймгийн Онцгой байдлын газрын Эрэн хайх, аврах ангийн алба хаагчид 03:30 цагт тус тус очиж түймрийг унтраахаар ажиллаж байна. Түймрийн голомтод салхи баруун хойд зүгээс зүүн урд зүгт 5-10 м/с, зарим үед 10-12 м/с байна. 09.18-ны өдөр хүч нэмэгдүүлэн ажиллахаар Халхгол сум дахь Гал түймэр унтраах, аврах 62 дугаар анги, Гал түймэр унтраах, аврах 52 дугаар ангийн алба хаагчид очиж түймрийг унтраахаар ажиллаж 18:30 цагт цурамд оруулсан бөгөөд 19:50 цагт унтраан Жаргалант багийн Засаг даргад хүлээлгэн өгсөн. Түймэр 09.17-ны өдрийн 23:30 цагийн орчим хилийн 1101 дүгээр тэмдэгтээр хил даван тархсаныг БНХАУ-ын талаас унтраасан.
Ой, хээрийн түймэр: Говь-Алтай аймгийн Халиун сумын Гүү бариач багийн “Шонт” гэдэг газар /аймгийн төвөөс урд зүгт 70 км-т, сумын төвөөс зүүн хойд зүгт 45 км-т/ ой, хээрийн түймэр гарсан тухай дуудлагыг 09.15-ны өдрийн 17:15 цагт хүлээн авсан. Тус аймгийн Онцгой байдлын газрын Гал түймэр унтраах, аврах 59 дүгээр анги, тус сумын мэргэжлийн ангийн алба хаагчид ажиллаж, 09.16-ны өдрийн 05:00 цагт цурамд оруулсан. 09.18-ны өдөр хүч нэмэгдүүлэн ажиллахаар тус аймгийн Онцгой байдлын газрын даргаар ахлуулсан алба хаагчид 14:00 цагт явж 16:00 цагт түймрийн голомтод очиж унтраахаар ажиллаж байна. Түймэрт урьдчилсан байдлаар 4 га талбай шатсан.
4. Хүний үйл ажиллагаатай холбоотой осол:
Төөрсөн, сураггүй болсон: Хөвсгөл аймгийн Тариалан сумын Давааны-Ар багийн “Орой цагааны нарийн хошуут” гэдэг газар /аймгийн төвөөс зүүн хойд зүгт 222 км-т, сумын төвөөс хойд зүгт 62 км-т/ иргэн А 09.17-ны өдрийн 12:00 цагийн орчим самар түүж яваад сураггүй алга болсон тухай дуудлагыг 09.18-ны өдрийн 00:20 цагт хүлээн авсан. Тус аймгийн Онцгой байдлын газрын Тариалан сум дахь Гал түймэр унтраах, аврах 46 дугаар ангийн алба хаагчид тус сумын харьяат иргэн А /34 настай, эмэгтэй/-ийг эрэн хайх ажиллагааг зохион байгуулахаар 09.18-ны өдрийн 06:26 цагт явж 17:32 цагт “Орой цагааны нарийн хошуут” гэдэг газар хүрэлцэн очиход тухайн иргэнийг ар гэрийнх нь “Дэлүү-Овоо” гэдэг газраас эсэн мэнд олсон байсан тул бүлэг 17:34 цагт буцсан.
Увс аймгийн Улаангом сумын 8 дугаар багийн “Бага нуур” гэдэг газар /сумын төвөөс хойд зүгт 60 км-т/ гэрийнхээ гадаа тоглож байсан бага насны хүүхэд сураггүй алга болсон тухай дуудлагыг 09.18-ны өдрийн 20:50 цагт хүлээн авсан. Тус аймгийн Онцгой байдлын газрын Эрэн хайх, аврах салбар, Цагдаагийн байгууллагын алба хаагчид, тус сумын Засаг даргын Тамгын газрын ажилтнууд, ар гэрийнхэн Н-ийн О /2 настай, эмэгтэй/-ийг эрэн хайх ажиллагааг 09.18-ны өдрийн 21:10 цагаас эхлэн зохион байгуулж байна.
ОНЦГОЙ БАЙДЛЫН ЕРӨНХИЙ ГАЗАР