Монгол Улсын Засгийн газрын 2020-2024 оны үйл ажиллагааны хөтөлбөрт Хөвсгөл нуурт живсэн тээврийн хэрэгслийг илрүүлэх, байршлыг тогтоох ажлыг тусгасны дагуу БОАЖЯ, Онцгой байдлын ерөнхий газар хамтран өнгөрсөн долдугаар сараас судалгааны ажлыг эхлүүлсэн.
Тус судалгаанд нэн шаардлагатай багаж, тоног төхөөрөмжийг нийлүүлж, дэмжлэг үзүүлэх талаар Япон Улсын Засгийн газар, Жайка болон бусад холбогдох байгууллагуудтай хамтран ажилллаж байна.
Энэ хүрээнд өнөөдөр ОБЕГ-ын тэргүүн дэд дарга, бригадын генерал Ж. Чүлтэмсүрэн болон БОАЖЯ-ны холбогдох удирдлагууд Япон Улсын “Japan international cooperation system” /JICS/ төвийн дэд захирал Наока Очиайтай цахим хурал хийлээ.
Хурлаар нуурт живсэн тээврийн хэрэгслийг илрүүлэх, татан гаргахад шаардлагатай болон судалгааны ажилд ашиглагдах усан завь, шумбагчдын биеийн даралтыг тэнцвэржүүлж, эрүүл мэндийг хамгаалдаг зөөврийн барокамер, аврагч, шумбагчдын усны хувцас зэрэг тоног төхөөрөмж, хувцас хэрэгслийн талаар харилцан санал солилцсон юм гэж Онцгой байдлын ерөнхий газраас мэдээллээ.