1. Цаг агаар:
Өнгөрсөн хоногт: Улаанбаатар хот болон Баян-Өлгий, Дархан-Уул, Төв аймгийн нутгаар цас орсон. Бусад нутгаар цаг агаар тогтуун байлаа.
Өнөөдөр: Нутгийн баруун хагаст үүлшинэ, бусад нутгаар багавтар үүлтэй. Баруун аймгуудын нутгийн зарим газраар цас орж, явган шуурга шуурна. Бусад нутгаар цас орохгүй. Нутгийн баруун хэсгээр баруун өмнөөс баруун хойш эргэж, бусад нутгаар баруун хойноос 4-9 м/с, Алтайн уулархаг нутаг болон Арц Богдын өвөр хоолойгоор 12-14 м/с хүрч ширүүснэ. Увс нуур болон Дархадын хотгор, Завхан голын эх орчмоор -26-31 градус, Хангай, Хөвсгөл, Хэнтийн уулархаг нутаг, Хүрэнбэлчир орчим, Идэр, Тэс, Эг, Үүр, Сэлэнгэ, Хараа, Ерөө, Туул, Тэрэлж, Хэрлэн голын хөндийгөөр -21…-26 градус, говийн бүс нутгийн баруун өмнөд хэсгээр -5-10 градус, Хангайн нурууны өвөр бэл болон говийн бүс нутгийн хойд хэсгээр -10-15 градус, бусад нутгаар -15-20 градус хүйтэн байна.
Улаанбаатар хотод: Багавтар үүлтэй, цас орохгүй. Салхи баруун хойноос 3-8 м/с, -18-20 градус хүйтэн байна.
Төлөв байдал: 3-ны өдөр говь болон төвийн аймгуудын нутгийн зарим газраар, 4-ний өдөр баруун аймгуудын нутгийн баруун хэсгээр, 5-ны өдөр Хангай, Хөвсгөлийн уулархаг нутгаар, 6-ны өдөр төвийн аймгуудын нутгийн зүүн хэсэг, зүүн аймгуудын нутгийн зарим газраар цас орно. Салхи 4, 5, 6-ны өдөр говь, тал хээрийн нутгаар 13-15 м/с хүрч ширүүснэ. Увс нуур болон Дархадын хотгор, Завхан голын эх, Идэр, Тэс голын хөндийгөөр шөнөдөө -35-40 градус, өдөртөө -22-27 градус, Хангай, Хөвсгөл, Хэнтийн уулархаг нутаг, Хүрэнбэлчир орчим, Байдраг, Эг, Үүр, Орхон, Туул, Тэрэлж голын хөндийгөөр шөнөдөө -29-34 градус, өдөртөө -16-21 градус, говийн бүс нутгийн баруун өмнөд хэсэг болон цас багатай газраар шөнөдөө -13-18 градус, өдөртөө -3-8 градус, бусад нутгаар шөнөдөө -23-28 градус, өдөртөө -12-17 градус хүйтэн байна. Хугацааны эцсээр өдөртөө хүйтний эрч бага зэрэг суларна.
2.Гал түймэр:
– Хувийн өмчид гарсан: Хэнтий аймгийн Батширээт сумын Норовлин багийн Холбооны хэсгийн задгай хүнсний дэлгүүр шатсан тухай мэдээллийг 12.31-ний өдрийн 21:16 цагт хүлээн авсан. Иргэн Ч-ийн 10х30 метрийн хэмжээтэй найман нэрийн хүнсний дэлгүүр шатсаныг тус сумын мэргэжлийн ангийнхан, орон нутгийн иргэд ажиллаж, 01.01-ний өдрийн 07:40 цагт унтраасан тухай мэдээллийг тус сум дахь Цагдаагийн хэсгийн мөрдөгч аймгийн Онцгой байдлын газарт 09:22 цагт мэдээлсэн.
Сэлэнгэ аймгийн Баянгол сумын Хараа багийн 10 дугаар гудамжинд байшин шатаж байна гэсэн дуудлагыг 01.01-ний өдрийн 09:57 цагт хүлээн авсан. Тус аймгийн Онцгой байдлын газрын Баянгол сум дахь Гал түймэр унтраах, аврах 40 дүгээр ангийн алба хаагчдыг очиход иргэн Б-ын 10х14 метрийн хэмжээтэй байшингийн дээвэр шатаж байсныг 55 минут ажиллан унтраасан.
Өмнөговь аймгийн Цогтцэций сумын Билгэх багийн 1 дүгээр гудамжинд гэр шатаж байна гэсэн дуудлагыг 01.01-ний өдрийн 10:10 цагт хүлээн авсан. Тус аймгийн Онцгой байдлын газрын Цогтцэций сум дахь Онцгой байдлын хэлтсийн Гал түймэр унтраах, аврах 44 дүгээр ангийн алба хаагчдыг очиход иргэн М-ын 5 ханатай гэр, эд хогшил шатаж байсныг 26 минут ажиллаж унтраасан.
Нийслэлийн Баянзүрх дүүрийн 8 дугаар хороо, 32 дугаар цэцэрлэг хогийн цэгт хог шатаж байна гэсэн дуудлагыг 01.01-ний өдрийн 11:26 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 63 дугаар ангийн алба хаагчдыг очиход тус цэцэрлэгийн гаднах хогийн цэгт хог шатаж байсныг 15 минут ажиллаж унтраасан.
Нийслэлийн Баянзүрх дүүргийн 23 дугаар хороо, Улиастайн 4 дүгээр хэсэгт байшин шатаж байна гэсэн.дуудлагыг 01.01-ний өдрийн 13:05 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 35 дугаар ангийн алба хаагчдыг очиход иргэн Ц-ийн 6х8 метрийн хэмжээтэй байшингийн дээвэр шатаж байсныг 5 минут ажиллаж унтраасан.
Нийслэлийн Сонгинохайрхан дүүргийн 9 дүгээр хороо, Баруун баян-Уулын 8 дугаар гудамжинд байшин шатаж байна гэсэн дуудлагыг 01.01-ний өдрийн 16:43 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 29 дүгээр ангийн алба хаагчдыг очиход иргэн Х-ын 6х9 метрийн хэмжээтэй байшингийн дээвэр шатаж байсныг 50 минут ажиллаж унтраасан.
Төв аймгийн Эрдэнэ сумын 1 дүгээр багийн “Агуйтын хөтөл” гэдэг газар байшин шатаж байна гэсэн дуудлагыг 01.01-ний өдрийн 17:01 цагт хүлээн авсан. Нийслэлийн Налайх дүүргийн Онцгой байдлын хэлтсийн Гал түймэр унтраах, аврах 28 дугаар ангийн алба хаагчдыг очиход иргэн Б-ын 15×30 метрийн хэмжээтэй 2 давхар байшингийн 1 дүгээр давхрын хана, таазны хэсэг дотор талаасаа шатаж байсныг 5 минут ажиллаж унтраасан.
Нийслэлийн Баянзүрх дүүргийн 33 дугаар хороо, Булагтай зуслан-гийн задгай байшин шатаж байна гэсэн дуудлагыг 01.01-ний өдрийн 16:58 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 35 дугаар ангийн алба хаагчдыг очиход иргэн Б-ийн 8×8 метрийн хэмжээтэй байшин шатаж байсныг 25 минут ажиллаж унтраасан.
Өвөрхангай аймгийн Хужирт сумын Шивээд багийн 4 дүгээр гудамжинд байшингийн дээвэр шатаж байна гэсэн дуудлагыг 01.01-ний өдрийн 18:05 цагт хүлээн авсан. Тус аймгийн Онцгой байдлын газрын Хужирт сум дахь Эрэн хайх, аврах бүлгийн алба хаагчдыг очиход иргэн Т-ийн 5х9 метрийн хэмжээтэй байшингийн дээвэр шатаж байсныг 20 минут ажиллаж унтраасан.
Сэлэнгэ аймгийн Сүхбаатар сумын Хонгорморьт багийн Цанын бааз гэдэг газар суудлын автомашин шатаж байна гэсэн дуудлагыг 01.01-ний өдрийн 18:06 цагт хүлээн авсан. Тус аймгийн Онцгой байдлын газрын Гал түймэр унтраах, аврах 36 дугаар ангийн алба хаагчдыг очиход иргэн С-ийн “Элентра” загварын суудлын автомашин шатаж байсныг 7 минут ажиллаж унтраасан.
Нийслэлийн Сонгинохайрхан дүүргийн 25 дугаар хороо, Хайрханы 2 дугаар гудамжинд байшин шатаж байна гэсэн дуудлагыг 01.01-ний өдрийн 20:04 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 29 дүгээр ангийн алба хаагчдыг очиход иргэн Г-ын 5х8 метрийн хэмжээтэй байшингийн 3×4 метрийн хэмжээтэй үүдний өрөө шатаж байсныг 30 минут ажиллаж унтраасан.
Төв аймгийн Зуунмод сумын Баянхошуу багийн 2 дугаар гудамжинд байшин шатаж байна гэсэн дуудлагыг 01.01-ний өдрийн 23:36 цагт хүлээн авсан. Тус аймгийн Онцгой байдлын газрын Гал түймэр унтраах, аврах 24 дүгээр ангийн алба хаагчдыг очиход иргэн Э-ийн 6х8 метрийн хэмжээтэй байшингийн таазны хэсэг шатаж байсныг 16 минут ажиллаж унтраасан.
Сэлэнгэ аймгийн Сүхбаатар сумын Буур хээр багийн 2 дугаар хэсэгт суудлын автомашин шатаж байна гэсэн дуудлагыг 01.02-ны өдрийн 00:05 цагт хүлээн авсан. Тус аймгийн Онцгой байдлын газрын Гал түймэр унтраах, аврах 36 дугаар ангийн алба хаагчдыг очиход иргэн Ц-ын Аллион загварын суудлын автомашин шатаж байсныг 23 минут ажиллаж унтраасан.
3.Хүний үйл ажиллагаатай холбоотой осол:
Төөрсөн, сураггүй болсон: Төв аймгийн Сэргэлэн сумын Хөшиг багийн “Манзуширын хийд” гэдэг газар /Аймгийн төвөөс хойд зүгт 8 км-т/ 01.01-ний өдрийн 11:00 цагийн орчим иргэн Г, О нар “Богд хан-Уул”-ын оргил “Цэцээ гүн”-ийн чиглэлд алхалт хийгээд буцах замдаа төөрч, иргэн О-ын бие нь өвдөж явж чадахгүй болсон тухай дуудлагыг мөн өдрийн 18:50 цагт хүлээн авсан. Тухайн 2 иргэний байршлыг “What3words” аппликэйшинээр тодорхойлсноор тус аймгийн Онцгой байдлын газрын Эрэн хайх, аврах салбарын алба хаагчдыг очиход тухайн 2 иргэн байгаагүй тул эрэн хайх ажиллагааг эхлүүлсэн. Эрэн хайх ажиллагааг зохион байгуулах явцад нийслэлийн Баянзүрх дүүргийн харьяат иргэн Г /37 настай, эрэгтэй/ өөрөө уулнаас эсэн мэнд бууж, “Цэцээ гүн” амралтын газар ирсэн тухай 01.02-ны өдрийн 00:01 цагт тус аймгийн Онцгой байдлын газарт мэдэгсэн бөгөөд иргэн Э.Одбаяр /37 настай, эрэгтэй/-ын цогцсыг 00:44 цагт “Өгөөмөрийн-Ам” гэдэг газраас олж, Цагдаагийн байгууллагад шилжүүлэн өгсөн.
ОНЦГОЙ БАЙДЛЫН ЕРӨНХИЙ ГАЗАР