1. Цаг агаар:
Өнгөрсөн хоногт: Нийт нутгаар цаг агаар тогтуун байсан.
Өнөөдөр: Ихэнх нутгаар үүлшинэ. Хангай, Хөвсгөл, Хэнтийн уулархаг нутаг, Дорнод-Дарьгангын тал нутгаар цас орж, явган шуурга шуурна. Бусад нутгаар цас орохгүй. Салхи нутгийн зүүн хэсгээр баруун хойноос, бусад нутгаар баруун өмнөөс секундэд 5-10 метр, говь, тал, хээрийн нутгаар секундэд 15-17 метр хүрч ширүүсэж, шороон шуурга шуурна. Увс нуурын хотгороор -20…-25 градус, Байдраг, Завхан, Тэс, Туул голын хөндийгөөр -12…-17 градус, Хөвсгөлийн уулархаг нутаг, Хүрэнбэлчир орчим, Эг, Үүр, Сэлэнгэ, Ерөө, Тэрэлж, Хэрлэн, Онон, Улз, Халх голын хөндийгөөр -10…-15 градус хүйтэн, Их нууруудын хотгор болон Алтайн уулархаг нутаг, Хангайн нурууны өвөр бэл болон говийн бүс нутгийн баруун хэсгээр -1…+4 градус дулаан, бусад нутгаар -4…-9 градус хүйтэн байна.
Улаанбаатар хотод: Үүлшинэ. Шөнөдөө цас орохгүй. Өдөртөө ялимгүй цас орно. Салхи баруун өмнөөс баруун хойш эргэж секундэд 5-10 метр. Шөнөдөө Яармаг-Сонгины орчмоор -25…-27 градус, бусад хэсгээр -18…-20 градус, өдөртөө -7…-9 градус хүйтэн байна.
Төлөв байдал: 8-нд Хангай, Хөвсгөл, Хэнтийн уулархаг нутгаар, 9-нд Монгол-Алтайн уулархаг нутгаар, 10-нд Монгол-Алтай, Хангай, Хөвсгөл, Хэнтийн уулархаг нутгаар цас орно. 11-нд баруун аймгуудын нутгийн зарим газар, төвийн аймгуудын нутгийн баруун хойд хэсгээр цас орж, цасан шуурга шуурна. Салхи 10-нд Алтайн салбар уулс болон Арц богдын өвөр хоолойгоор, 11-нд баруун аймгуудын ихэнх нутаг болон төвийн аймгуудын нутгийн зарим газраар секундэд 16-18 метр хүрч ширүүснэ. Увс нуур болон Дархадын хотгор, Завхан голын эх, Идэр, Тэс голын хөндийгөөр шөнөдөө -30…-35 градус, өдөртөө -20…-25 градус, Хангай, Хөвсгөл, Хэнтийн уулархаг нутаг, Хүрэнбэлчир орчим, Эг, Үүр, Туул, Тэрэлж голын хөндийгөөр шөнөдөө -23…-28 градус, өдөртөө -13…-18 градус, говийн бүс нутгийн өмнөд хэсэг болон цас багатай газраар шөнөдөө -8…-13 градус хүйтэн, өдөртөө -1…+4 градус дулаан, бусад нутгаар шөнөдөө -17…-22 градус, өдөртөө -5…-10 градус хүйтэн байна.
2.Гал түймэр:
– Төрийн өмчид гарсан: Нийслэлийн Баянзүрх дүүргийн 42 дугаар хорооны байрны дэргэд гал гарч байна гэсэн дуудлагыг 01.06-ны өдрийн 09:29 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 63 дугаар ангийн алба хаагчдыг очиход хураалттай 4 м хашаа, хорооны байрны баруун хойд талын гадна хана тус тус шатаж байсныг 10 минут ажиллаж унтраасан.
Нийслэлийн Баянгол дүүргийн 4 дүгээр хороо, 62 дугаар байр хогийн суваг шатаж байна гэсэн дуудлагыг 01.06-ны өдрийн 19:29 цагт хүлээн авсан. Чингэлтэй дүүргийн Онцгой байдлын хэлтсийн Гал түймэр унтраах, аврах 10 дугаар ангийн алба хаагчдыг очиход тус байрны 4 дүгээр орцны хогийн суваг шатаж байсныг 20 минут ажиллаж унтраасан. Утаажилтын бүсээс 9 иргэнийг гаргасан.
Нийслэлийн Хан-Уул дүүргийн 3 дугаар хороо нийтийн байранд гал гарч байна гэсэн дуудлагыг 01.06-ны өдрийн 20:01 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 14 дүгээр ангийн алба хаагчдыг очиход байр /актлагдсан/-ны дотор тал, эд зүйлс шатаж байсныг 30 минут ажиллаж унтраасан.
– ААН, байгууллагын өмчид гарсан: Нийслэлийн Сүхбаатар дүүргийн 11 дүгээр хороо байшин шатаж байна гэсэн дуудлагыг 01.06-ны өдрийн 20:40 цагт хүлээн авсан. Чингэлтэй дүүргийн Онцгой байдлын хэлтсийн Гал түймэр унтраах, аврах 10 дугаар ангийн алба хаагчдыг очиход иргэн Г-ийн 7х5 метрийн хэмжээтэй байшингийн дээвэр шатаж байсныг 20 минут ажиллаж унтраасан.
– Хувийн өмчид гарсан: Нийслэлийн Баянзүрх дүүргийн 27 дугаар хороо, Сэлбийн 1 дүгээр гудамжинд байшин шатаж байна гэсэн дуудлагыг 01.06-ны өдрийн 09:38 цагт хүлээн авсан. Сүхбаатар дүүргийн Онцгой байдлын хэлтсийн Гал түймэр унтраах, аврах 34 дүгээр ангийн алба хаагчдыг очиход иргэн Б-ын 7х8 метрийн хэмжээтэй 1 давхар мансардтай байшингийн дээвэр шатаж байсныг 15 минут ажиллаж унтраасан.
Баян-Өлгий аймгийн Бугат сумын Бугын гол багийн 5 дугаар гудамжинд байшин шатаж байна гэсэн дуудлагыг 01.06-ны өдрийн 12:41 цагт хүлээн авсан. Тус аймгийн Онцгой байдлын газрын Гал түймэр унтраах, аврах 31 дүгээр ангийн алба хаагчдыг очиход иргэн Х-ын 13х10 метрийн хэмжээтэй байшингийн ханан пийшингээс гал гарч байшингийн дотор тасалгааны хана шатаж байсныг 20 минут ажиллаж унтраасан.
Нийслэлийн Баянзүрх дүүргийн 21 дүгээр хороо, Жамсран-Уулын Өвөр 8 дугаар гудамжинд гэр шатаж байна гэсэн дуудлагыг 01.06-ны өдрийн 13:44 цагт хүлээн авсан. Сүхбаатар дүүргийн Онцгой байдлын хэлтсийн Гал түймэр унтраах, аврах 34 дүгээр ангийн алба хаагчдыг очиход иргэн С-ийн 4 ханатай гэр, эд зүйлс, эзэн тодорхойгүй 7х8 метрийн хэмжээтэй байшингийн дээврийн хэсэг тус тус шатаж байсныг 20 минут ажиллаж унтраасан.
Ховд аймгийн Зэрэг сумын Эхэн багийн 4 дүгээр бригад /аймгийн төвөөс баруун урд зүгт 180 км, сумын төвөөс баруун урд зүгт 20 км/-т ачааны автомашин шатаж байна гэсэн дуудлагыг 01.06-ны өдрийн 17:10 цагт хүлээн авсан. Тус аймгийн Онцгой байдлын газрын Зэрэг сум дахь Гал түймэр унтраах, аврах 70 дугаар ангийн алба хаагчдыг очиход иргэн Х-ын “Норд Бенз” загварын ачааны автомашины чиргүүлийн баруун талын арын дугуй шатаж байсныг 5 минут ажиллаж унтраасан.
3.Геологийн гаралтай аюулт үзэгдэл:
Газар хөдлөлт: Увс аймгийн Сагил сумын Өндөр мод багийн “Цагаан шувуут-Уул” гэдэг газар /аймгийн төвөөс баруун хойд зүгт 66 км, сумын төвөөс баруун зүгт 36 км, Ө-50°14’24.0”, У-91°08’24.0”/01.07-ны өдрийн 02:42:41 цагт 4 магнитудын хүчтэй газар хөдлөлт болсон тухай мэдээллийг ШУА-ийн ООГХ-ээс мөн өдрийн 02:50 цагт цахим шуудангаар ирүүлсэн. Тус аймгийн Онцгой байдлын газраар дамжуулан Сагил сумын Засаг дарга болон тухайн газар нутагладаг малчдаас тодруулахад газар хөдлөлтийн чичирхийлэл иргэдэд мэдрэгдээгүй бөгөөд учирсан хохиролгүй тухай мэдээлсэн.
4.Хүний үйл ажиллагаатай холбоотой осол:
– Автозамын тээврийн осол: Булган аймгийн Орхон сумын Мааньт багийн “Нарангийн гүүр” гэдэг газар /аймгийн төвөөс зүүн хойд зүгт 30 км, сумын төвөөс хойд зүгт 50 км/-т Зам тээврийн осол болж жолооч нь автомашины эд ангид хавчуулагдсан тухай дуудлагыг 01.06-ны өдрийн 23:15 цагт хүлээн авсан. Тус аймгийн Онцгой байдлын газрын Эрэн хайх, аврах салбарын алба хаагчдыг очиход Орхон аймгийн Баян-Өндөр сумаас Булган аймгийн чиглэлд зорчиж явсан Фав загварын ачааны автомашины чиргүүлийн ар талаас, Хондо Инсайд загварын суудлын автомашин мөргөж иргэн Д /36 настай, эрэгтэй/ автомашины эд ангид хавчуулагдаж нас барсаныг 7 минут ажилллаж цогцсыг гарган, Булган аймгийн Цагдаагийн газрын Мөрдөн байцаах тасгийн даргад шилжүүлэн өгсөн.
ОНЦГОЙ БАЙДЛЫН ЕРӨНХИЙ ГАЗАР