Ихэнх нутгаар их цас орж, хүчтэй цасан шуурга шуурсны улмаас зам давааны нөхцөл байдал хүндэрсэнтэй холбогдуулан бүх чиглэлийн авто замын хөдөлгөөнийг зогсоосон.
Төв, орон нутгийн Онцгой байдлын анги байгууллага, Зам тээврийн яамны харьяа зам арчлалтын компаниуд хамтран хаагдсан зам, давааг нээх ажлыг зохион байгуулан орон нутгаас хүч хэрэгсэл нэмэгдүүлэн ажиллаж байна.
Онцгой байдлын ерөнхий газрын саналыг үндэслэн цаг агаар сайжиртал бүх чиглэлийн зам давааг нээхгүй байх шийдвэрийг Зам тээврийн яамнаас гаргасан.
Авто замын хөдөлгөөнд хязгаарлалт хийсэн үеэр иргэнд хулгайн замаар зорчиж, улмаар автомашин цасанд суух, эвдрэх, шатахуунгүй болох, мөн малчдын хувьд салхи шуурганы үеэр малаа дагаж уруудах, төөрөх зэрэг эрсдэлд өртөж байна.
Иймд, иргэд, малчид, тээвэрчид, аж ахуйн нэгж байгууллага цаг агаарын мэдээ, мэдээллийг тогтмол хүлээн авч, мэргэжлийн байгууллагуудаас гаргасан шийдвэрийг үндэслэн цаг агаарын гамшигт үзэгдлийн үеэр хол, ойрын замд гарахгүй байхыг онцгой анхааруулж байна.
Цаг уурын байгууллагаас өгсөн мэдээгээр өнөөдөр буюу 2016 оны 03 дугаар сарын 04-ний өдөр Дорноговь, Дундговь, Өмнөговь, Төв, Хэнтий аймаг, Улаанбаатар хотод цас орж, салхи 18-20 м/с, зарим үед 24м/с хүртэл ширүүсч, цасан шуурга шуурна.