1.Цаг агаар:
Өнгөрсөн хоногт: Улаанбаатар хот болон Баянхонгор, Говь-Алтай, Өвөрхангай, Сүхбаатар, Төв, Хөвсгөл, Хэнтий аймгуудад бороо, Завхан, Өвөрхангай аймгуудын зарим сумдаар цас орсон. Дархан-Уул аймагт шороогоор шуурсан. Бусад нутгаар цаг агаар тогтуун байсан.
Өнөөдөр: Ихэнх нутгаар солигдмол үүлтэй. Төв болон зүүн аймгуудын ихэнх нутаг, говийн аймгуудын нутгийн хойд хэсгээр бороо, нойтон цас орно. Салхи төвийн аймгуудын нутгаар барун өмнөөс хойш эргэж, зүүн аймгуудын нутгаар баруун өмнөөс, бусад нутгаар баруун хойноос секундэд 4-9 метр, говь, тал, хээрийн нутгаар секундэд 12-14 метр хүрч ширүүснэ. Алтай, Хангай, Хөвсгөл, Хэнтийн уулархаг нутаг болон Орхон-Сэлэнгийн сав газар, Завхан голын эх, Хүрэнбэлчир орчим, Эг-Үүр, Тэрэлж голын хөндийгөөр +7…+12 градус, говийн бүс нутгийн баруун өмнөд хэсгээр +20…+25 градус, говийн бүс нутгийн зүүн өмнөд хэсэг, Дорнод-Дарьгангын тал нутаг, Улз, Халх голын хөндийгөөр +16…+21 градус, бусад нутгаар +12…+17 градус дулаан байна.
Улаанбаатар хотод: Үүлшинэ. Шөнөдөө бороо орохгүй, өдөртөө бага зэргийн бороо орно. Салхи баруун өмнөөс хойш эргэж секундэд 5-10 метр. Шөнөдөө Яармаг-Сонгины орчмоор 0…+2 градус, бусад хэсгээр +4…+6 градус, өдөртөө +13…+15 градус дулаан байна.
Төлөв байдал: 12-нд баруун аймгуудын нутгийн хойд, төвийн аймгуудын нутгийн баруун, говийн аймгуудын нутгийн зүүн хэсгээр, зүүн аймгуудын нутгийн зарим газраар, 13-нд нутгийн хойд хэсгээр, 14-нд баруун болон төвийн аймгуудын нутгийн хойд хэсгээр, 15-нд баруун болон төвийн аймгуудын нутгийн зарим газраар бороо, нойтон цас орно. Салхи 13-нд нутгийн зарим газраар, 14-нд ихэнх нутгаар, 15-нд говь, тал, хээрийн нутгаар секундэд 15-17 метр хүрч ширүүсэж, шороон шуурга шуурна. Алтай, Хангай, Хөвсгөлийн уулархаг нутаг, Завхан голын эх, Хүрэнбэлчир орчмоор шөнөдөө -1…-6 градус хүйтэн, өдөртөө +11…+16 градус, Хангайн нурууны өвөр бэл, говийн бүс нутгийн хойд хэсгээр шөнөдөө +4…+9 градус, өдөртөө +19…+24 градус, говийн бүс нутгийн өмнөд хэсгээр шөнөдөө +10…+15 градус, өдөртөө +25…+30 градус, бусад нутгаар шөнөдөө 0…+5 градус, өдөртөө +16…+21 градус дулаан байна. 14-нд нутгийн хойд хэсгээр, 15-нд ихэнх нутгаар сэрүүснэ.
2.Гал түймэр:
Төрийн өмчид гарсан: Нийслэлийн Баянзүрх дүүргийн 18 дугаар хороо, 14 дүгээр байрны гадна хогийн цэг шатаж байна гэсэн дуудлагыг 05.10-ны өдрийн 09:26 цагт хүлээн авсан. Чингэлтэй дүүргийн Онцгой байдлын хэлтсийн Гал түймэр унтраах аврах 10 дугаар ангийн алба хаагчид очиж хогийн цэгт хог шатаж байсныг 10 минут ажиллаж унтраасан.
Нийслэлийн Чингэлтэй дүүргийн 17 дугаар хороо, 103 дугаар цэцэрлэгийн урд өнжмөл шар өвс шатаж байна гэсэн дуудлагыг 05.10-ны өдрийн 14:48 цагт хүлээн авсан. Сүхбаатар дүүргийн Онцгой байдлын хэлтсийн Гал түймэр унтраах, аврах 34 дүгээр ангийн алба хаагчдыг очиход 3 га орчим газарт өнжмөл шар өвс шатаж байсныг 25 минут ажиллаж унтраасан.
ААН, байгууллагын өмчид гарсан: Нийслэлийн Баянзүрх дүүргийн 11 дүгээр хороо, Хонхор явах зам дагуу гал гарч байна гэсэн дуудлагыг 05.11-ний өдрийн 02:41 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 63 дугаар ангийн алба хаагчдыг очиход 2х2 метрийн хэмжээтэй харуулын байр, барилгын модон материал, дулаалгын шилэн хөвөн тус тус шатаж байсныг 50 минут ажиллаж унтраасан.
Хувийн өмчид гарсан: Сэлэнгэ аймгийн Сант сумын Ивэн багийн “Цагаан-Эрэг” гэдэг газар /аймгийн төвөөс баруун зүгт 180 км, сумаас баруун урд зүгт 10 км/-т өвөлжөө шатаж байна гэсэн дуудлагыг 05.10-ны өдрийн 11:40 цагт хүлээн авсан. Тус аймгийн Онцгой байдлын газрын Сайхан сум дахь Гал түймэр унтраах, аврах 61 дүгээр ангийн алба хаагчдыг очиход иргэн Б-ийн 25х6 метрийн хэмжээтэй өвөлжөө шатаж байсныг 44 минут ажиллаж унтраасан.
Хөвсгөл аймгийн Мөрөн сумын Гичиг багийн Талын хонхор хорооллын 3 дугаар гудамжинд гэр шатаж байна гэсэн дуудлагыг 05.10-ны өдрийн 17:46 цагт хүлээн авсан. Тус аймгийн Онцгой байдлын газрын Гал түймэр унтраах, аврах 27 дугаар ангийн алба хаагчдыг очиход иргэн М-ийн 5 ханатай гэр шатаж байсныг 13 минут ажиллаж унтраасан. Тус гал түймэрт М /54 настай, эмэгтэй/ өртөж нас барсан тул цогцсыг гарган тус аймгийн Цагдаагийн газрын ахлах мөрдөгчид хүлээлгэн өгсөн.
Баян-Өлгий аймгийн Цэнгэл сумын Партизан багийн 3 дугаар гудамжны задгайд өвс шатаж байна гэсэн дуудлагыг 05.10-ны өдрийн 18:54 цагт хүлээн авсан. Тус аймгийн Онцгой байдлын газрын Цэнгэл сум дахь Гал түймэр унтраах, аврах 71 дүгээр ангийн алба хаагчдыг очиход иргэн Х-ийн хашаанд хураалттай 1 тн өвс шатаж байсныг 10 минут ажиллаж унтраасан.
3.Хүний үйл ажиллагаатай холбоотой осол:
– Автозамын тээврийн осол: Завхан аймгийн Идэр сумын Загастай багийн “Пойлны хэсэг” гэдэг газар /аймгийн төвөөс зүүн зүгт 85 км, сумын төвөөс зүүн зүгт 12 км/-т Суудлын автомашин, ачааны автомашинтай мөргөлдөж автомашины эд ангид 2 хүн хавчуулагдсан тухай дуудлагыг 05.11-ний өдрийн 04:34 цагт хүлээн авсан. Тус аймгийн Онцгой байдлын газрын Эрэн хайх, аврах бүлгийн алба хаагчдыг очиход Асгат сумаас Завхан аймгийн Улиастай сумын чиглэлд зорчиж явсан “Хьюндай Маяти” загварын ачааны автомашин, “Митцүбиши Делика” загварын суудлын автомашинтай мөргөлдөж зорчигч иргэн Т /34 настай, эрэгтэй/, Б нар автомашины эд ангид хавчуулагдсан байсныг 25 минут ажиллаж эсэн мэнд гарган тус сумын их эмчид хүлээлгэн өгсөн.
Өндрөөс унах: Нийслэлийн Сүхбаатар дүүргийн 11 дүгээр хороо 5 дугаар давхраас хүн унах гээд байна гэсэн дуудлагыг 05.10-ны өдрийн 13:28 цагт хүлээн авсан Нийслэлийн Аврах ангийн алба хаагчдыг очиход иргэн Э /32 настай, эмэгтэй/ гэр бүлийн маргаанаас болж гэртээ амиа хорлох зорилгоор цонхоор үсрэх гэж байсныг 24 минут ажиллаж аюулгүй болгон Сүхбаатар дүүргийн Цагдаагийн 2 дугаар хэлтэст хүлээлгэн өгсөн.
Бусад төрлийн осол /ажиллагаа/ – Цогцос гаргах: Нийслэлийн Баянгол дүүргийн 20 дугаар хороо дулааны шугамын худгаас цогцос гаргахад тусламж хэрэгтэй байна гэсэн дуудлагыг 05.10-ны өдрийн 21:50 цагт хүлээн авсан. Нийслэлийн Аврах ангийн алба хаагчдыг очиход 1.5х2 метрийн хэмжээтэй, 3 метрийн гүнтэй дулааны шугамын худагт нэр, хаяг тодорхойгүй 30-35 орчим насны эрэгтэй хүн унаж нас барсан байсныг цогцсыг гарган Баянгол дүүргийн Цагдаагийн 2 дугаар хэлтэст хүлээлгэн өгсөн.
Бусад төрлийн осол /ажиллагаа/ – Бусад: Нийслэлийн Хан-Уул дүүргийн 19 дүгээр хороо хүүхэд цахилгаан шатанд гацсан тухай дуудлагыг 05.10-ны өдрийн 16:12 цагт хүлээн авсан. Нийслэлийн Аврах ангийн алба хаагчдыг очиход иргэн Б/37 настай, эмэгтэй/, хүү А /3 сартай, эрэгтэй/ нар нь 1 дүгээр давхарт цахилгаан тасарсаны улмаас цахилгаан шатанд гацсан байсныг 6 минут ажиллаж хаалгыг онгойлгон гаргасан.
ОНЦГОЙ БАЙДЛЫН ЕРӨНХИЙ ГАЗАР