1.Цаг агаар:
Өнгөрсөн хоногт: Улаанбаатар хот /4-5 мм/, Булган /24 мм/, Дорноговь, Дархан-Уул /1.1 мм/, Дорнод /4 мм/, Орхон /5 мм/, Өвөрхангай /1 мм/, Сэлэнгэ /0.8-6 мм/, Төв /0.6-16 мм/, Хөвсгөл /4 мм/ аймгуудад бороо орсон. Бусад нутгаар цаг агаар тогтуун байсан.
Өнөөдөр: Ихэнх нутгаар солигдмол үүлтэй. Төв болон зүүн аймгуудын нутгийн зарим газраар бороо, дуу цахилгаантай аадар бороо орно. Салхи нутгийн хойд хэсгээр баруун өмнөөс хойш эргэж, бусад нутгаар баруун өмнөөс секундэд 5-10 метр, зарим газраар борооны өмнө түр зуур ширүүснэ. Монгол-Алтай, Хангай, Хөвсгөл, Хэнтийн уулархаг нутаг, Завхан голын эх, Хүрэнбэлчир орчим, Эг-Үүр, Орхон, Тэрэлж, Онон, Улз голын хөндийгөөр +18…+23 градус, Их нууруудын хотгор болон говийн бүс нутгийн хойд хэсгээр +28…+33 градус, говийн бүс нутгийн өмнөд хэсгээр +32…+37 градус, бусад нутгаар +22…+27 градус дулаан байна.
Улаанбаатар хотод: Үүлшинэ. Бороо орохгүй. Салхи баруун хойноос секундэд 4-9 метр. Шөнөдөө +10…+12 градус, өдөртөө +23…+25 градус дулаан байна.
Төлөв байдал: 4-нд төвийн аймгуудын нутгийн зүүн хэсэг, зүүн аймгуудын нутгийн зарим газраар, 5-нд баруун аймгуудын нутгийн зарим газар, төвийн аймгуудын нутгийн баруун хойд, зүүн аймгуудын нутгийн зүүн хэсгээр, 6-нд баруун аймгуудын нутгийн зарим газар, төвийн аймгуудын баруун хэсгээр, 7-нд төв, говь болон зүүн аймгуудын ихэнх нутгаар бороо, дуу цахилгаантай аадар бороо орно. Салхи 5-нд Алтайн салбар уулсаар, 6,7-нд говь, тал хээрийн нутгаар секундэд 13-15 метр хүрч, нутгийн зарим газраар борооны өмнө түр зуур ширүүсэж, шороон шуурга шуурна. Монгол-Алтай, Хангай, Хөвсгөл, Хэнтийн уулархаг нутаг, Хүрэнбэлчир орчим, Идэр, Тэс, Тэрэлж голын хөндийгөөр шөнөдөө +3…+8 градус, өдөртөө +19…+24 градус, Их нууруудын хотгор болон говийн бүс нутгийн хойд хэсэг, Дорнод-Дарьгангын тал нутгаар шөнөдөө +13…+18 градус, өдөртөө +28…+33 градус, говийн бүс нутгийн өмнөд хэсгээр шөнөдөө +18…+23 градус, өдөртөө +33…+38 градус, бусад нутгаар шөнөдөө +9…+14 градус, өдөртөө +24..+.29 градус дулаан байна. 6-наас нутгийн баруун хагаст, 7-нд ихэнх нутгаар сэрүүснэ.
2.Гал түймэр:
Объектын түймэр: Улаанбаатар хот, Баянзүрх дүүрэг. 26 дугаар хороо, Энканто хотхоны гадна хог шатаж байна гэсэн дуудлагыг 09.02-ны өдрийн 16:44 цагт хүлээн авсан.
Хан-Уул дүүргийн Онцгой байдлын хэлтсийн Гал түймэр унтраах, аврах 14 дүгээр ангийн алба хаагчид 3.5 км замыг туулан 16:52 цагт очиход барилгын хашаанд хог шатаж байсныг 20 минут ажиллаж унтраасан.
Улаанбаатар хот, Баянзүрх дүүрэг. 34 дүгээр хороо, Шархадны 63 дугаар гудамжинд байшин шатаж байна гэсэн дуудлагыг 09.02-ны өдрийн 13:03 цагт хүлээн авсан.
Тус дүүргийн Онцгой байдлын хэлтсийн Гал түймэр унтраах, аврах 63 дугаар ангийн алба хаагчид 4.5 км замыг туулан 13:16 цагт очиход иргэн Б-ын 6х4 метрийн хэмжээтэй байшин шатаж байсныг 20 минут ажиллаж унтраасан.
Улаанбаатар хот, Сонгинохайрхан дүүрэг. 33 дугаар хороо, Тахилтын задгайд гэр шатаж байна гэсэн дуудлагыг 09.02-ны өдрийн 13:12 цагт хүлээн авсан.
Тус дүүргийн Онцгой байдлын хэлтсийн Гал түймэр унтраах, аврах 26 дугаар ангийн алба хаагчид 4.5 км замыг туулан 13:24 цагт очиход иргэн Х-ын 5 ханатай гэр бүрэн, Б-гийн 4 ханатай гэрийн гадна хэсэг шатаж байсныг 5 минут ажиллаж унтраасан.
Ой, хээрийн түймэр: Увс аймаг, Цагаанхайрхан сум. “Урт жалганы-Эх” гэдэг газар /аймгийн төвөөс зүүн зүгт 256 км, сумын төвөөс урд зүгт 30 км/-т ой, хээрийн гал түймэр гарсан тухай дуудлагыг 09.02-ны өдрийн 11:30 цагт хүлээн авсан.
Тус аймгийн Онцгой байдлын газрын Баруунтуруун сум дахь Гал түймэр унтраах, аврах 60 дугаар ангийн алба хаагчид, сумын Засаг даргын Тамгын газрын ажилтнууд ой, хээрийн гал түймрийг унтраах ажиллагааг зохион байгуулан ажиллаж 09.02-ны өдрийн 17:15 цагт цурамд оруулсан бүрэн унтраахаар ажиллаж байна. Түймэрт урьдчилсан байдлаар 2 га талбай өртөж шатсан.
3.Хүний үйл ажиллагаатай холбоотой осол:
Зам, тээврийн осол:Хэнтий аймаг, Цэнхэрмандал сум. Согоот багийн “Чойнжуур” гэдэг газар /аймгийн төвөөс баруун зүгт 165 км, сумын төвөөс баруун зүгт 65 км/-т 2 суудлын автомшин мөргөлдөж, автомашины эд ангид 2 хүн хавчуулагдсан тухай дуудлагыг 09.02-ны өдрийн 20:05 цагт хүлээн авсан.
Тус аймгийн Онцгой байдлын газрын Жаргалтхаан сум дахь Эрэн хайх, аврах бүлгийн алба хаагчид 65 км замыг туулан 21:55 цагт очиход “Соната-8” загварын суудлын автомашинд зорчиж явсан тус аймгийн Дэлгэрхаан сумын харъяат иргэн С/46 настай, эрэгтэй/, П /39 настай, эмэгтэй/, М/11 настай, эмэгтэй/, М/7 настай, эрэгтэй/, мөн нэр нас тодорхойгүй 1 иргэн тус тус нас барсан, “Т-Акуа” загварын суудлын автомашины жолооч Б/60 настай, эрэгтэй/ автомашины эд ангид хавчуулагдаж нас барсан байсныг 1 цаг 10 минут ажиллаж, цогцсыг гарган тус аймгийн Цэнхэрмандал сумын Цагдаагийн хэсэгт шилжүүлэн өгсөн.
Бусад төрлийн осол: Орхон аймаг, Баян-Өндөр сум.Баянцагаан багт Дулааны шугам засварын ажил гүйцэтгэж байсан 1 хүн шороонд дарагдсан тухай дуудлагыг 09.02-ны өдрийн 11:37 цагт хүлээн авсан.
Тус аймгийн Онцгой байдлын газрын Эрэн хайх, аврах ангийн алба хаагчид 3 км замыг туулан 11:41 цагт очиход Орхон аймгийн Баян-Өндөр сумын Уурхайчин багийн оршин суугч, иргэн Б/39 настай, эрэгтэй/ дулааны шугам засварын ажил гүйцэтгэж байх үед шороон далан нурж 3 метрийн гүн нүхэнд дарагдаж нас барсан байсныг 3 минут ажиллаж цогцсыг гарган аймгийн Цагдаагийн газрын мөрдөгчид шилжүүлэн өгсөн.
ОНЦГОЙ БАЙДЛЫН ЕРӨНХИЙ ГАЗАР