1.Цаг агаар:
Өнгөрсөн хоногт: Булган, Говьсүмбэр, Дархан-Уул, Дорнод, Орхон, Өвөрхангай, Сүхбаатар, Сэлэнгэ, Төв аймгийн нутгийн зарим газраар бороо орсон. Бусад нутгаар цаг агаар тогтуун байлаа.
Өнөөдөр: Ихэнх нутгаар солигдмол үүлтэй. Баруун аймгуудын нутгийн баруун, зүүн аймгуудын нутгийн зүүн хэсгээр бороо орно. Бусад нутгаар бороо орохгүй. Нутгийн зүүн хагаст баруун хойноос, бусад нутгаар баруунаас 5-10 м/с, говь, талын нутгаар 12-14 м/с хүрч ширүүснэ. Хангай, Хөвсгөл, Хэнтийн уулархаг нутаг, Завхан голын эх, Хүрэнбэлчир орчим, Орхон, Сэлэнгэ, Хараа, Ерөө, Туул, Тэрэлж, Хэрлэн, Онон, Улз, Халх голын хөндийгөөр +11+16 градус, Их нууруудын хотгор болон говийн бүс нутгийн баруун өмнөд хэсгээр +22+27 градус, бусад нутгаар +16+21 градус дулаан байна.
Улаанбаатар хотод: Багавтар үүлтэй, бороо орохгүй. Салхи баруун хойноос 5-10 м/с, +13+15 градус дулаан байна.
Төлөв байдал: 12-ны өдөр баруун аймгуудын нутгийн баруун хэсгээр, 13-ны өдөр баруун аймгуудын нутгийн хойд, төвийн аймгуудын нутгийн баруун хэсгээр, 14-ний өдөр баруун болон говийн аймгуудын нутгийн хойд хэсэг, төвийн аймгуудын ихэнх нутаг, зүүн аймгуудын нутгийн баруун хэсгээр, 15-ны өдөр баруун болон зүүн аймгуудын нутгийн зарим газар, төвийн аймгуудын ихэнх нутаг, говийн аймгуудын нутгийн зүүн хойд хэсгээр бороо орно. Салхи ихэнх хугацаанд 6-11 м/с, 12-ны өдөр нутгийн зарим газраар, 13-ны өдөр говь, тал, хээрийн нутгаар түр зуур 15-17 м/с хүрч ширүүснэ. Монгол-Алтай, Хангай, Хөвсгөл, Хэнтийн уулархаг нутаг, Завхан голын эх, Хүрэнбэлчир орчим, Идэр, Тэс, Тэрэлж голын хөндийгөөр шөнөдөө -3+2 градус, өдөртөө +13+18 градус, Их Нууруудын хотгор, говийн бүс нутгийн хойд хэсгээр шөнөдөө +7+12 градус, өдөртөө +21+26 градус, говийн бүс нутгийн өмнөд хэсгээр шөнөдөө +13+18 градус, өдөртөө +28+33 градус, бусад нутгаар шөнөдөө +3+8 градус, өдөртөө +19+24 градус дулаан байна. 14, 15-ны өдөр ихэнх нутгаар сэрүүснэ.
2.Гал түймэр:
Объектын түймэр: Улаанбаатар хот, Хан-Уул дүүрэг. 14 дүгээр хороо, Бурхантын 5 дугаар хэсгийн 4 дүгээр гудамжинд амбаар шатаж байна гэсэн дуудлагыг 09.10-ны өдрийн 12:36 цагт хүлээн авсан.
Тус дүүргийн Онцгой байдлын хэлтсийн Гал түймэр унтраах, аврах 65 дугаар ангийн алба хаагчид 13 км замыг туулан 12:50 цагт очиход иргэн Б-гийн 4х8 метрийн хэмжээтэй амбаарын дээвэр, хураалттай 1.2 тн орчим өвс шатаж байсныг 1 цаг 20 минут ажиллаж унтраасан.
Баянхонгор аймаг, Баянхонгор сум. Гэгээншавь багийн 13 дугаар гудамжинд гэр шатаж байна гэсэн дуудлагыг 09.10-ны өдрийн 13:44 цагт хүлээн авсан.
Тус аймгийн Онцгой байдлын газрын Гал түймэр унтраах, аврах 16 дугаар ангийн алба хаагчид 3.5 км замыг туулан 13:50 цагт очиход тус тоотод иргэн Т-гийн 5 ханатай гэр шатаж байсныг 9 минут ажиллаж унтраасан.
Хэнтий аймаг, Хэрлэн сум. Өндөрхаан багийн “Сариг” хорооллын задгайд гэр шатаж байна гэсэн дуудлагыг 09.10-ны өдрийн 14:26 цагт хүлээн авсан.
Тус аймгийн Онцгой байдлын газрын Гал түймэр унтраах, аврах 32 дугаар ангийн алба хаагчид 7 км замыг туулан 14:35 цагт очиход иргэн Ч-ийн 4 ханатай гэр шатаж байсныг 3 минут ажиллаж унтраасан.
Улаанбаатар хот, Сонгинохайрхан дүүрэг. 23 дугаар хороо, Хангайн 16 дугаар гудамжинд байшин шатаж байна гэсэн дуудлагыг 09.10-ны өдрийн 20:32 цагт хүлээн авсан.
Тус дүүргийн Онцгой байдлын хэлтсийн Гал түймэр унтраах, аврах 26 дугаар ангийн алба хаагчид 6 км замыг туулан 20:42 цагт очиход тус тоотод иргэн О-ийн 7х11 метрийн хэмжээтэй байшингийн дээвэр шатаж байсныг 50 минут ажиллаж унтраасан.
Улаанбаатар хот, Баянзүрх дүүрэг. 17 дугаар хороо, Эмнэлэгийн 18 дугаар гудамжинд гэр шатаж байна гэсэн дуудлагыг 09.11-ний өдрийн 00:31 цагт хүлээн авсан.
Тус дүүргийн Онцгой байдлын хэлтсийн Гал түймэр унтраах, аврах 63 дугаар ангийн алба хаагчид 3.5 км замыг туулан 00:40 цагт очиход тус тоотод иргэн Д-ийн 5 ханатай гэр шатаж байсныг 5 минут ажиллаж унтраасан.
3.Хүний үйл ажиллагаатай холбоотой осол:
Зам, тээврийн осол: Ховд аймаг, Буянт сум. Норжинхайрхан багийн “Хөх булан” гэдэг газар /аймгийн төвөөс зүүн зүгт 21 км, сумын төвөөс баруун хойд зүгт 10 км-т/ суудлын 2 автомашин мөргөлдөж, 1 автомашин нь шатаж байна гэсэн дуудлагыг 09.10-ны өдрийн 22:21 цагт хүлээн авсан.
Тус аймгийн Онцгой байдлын газрын Гал түймэр унтраах, аврах 48 дугаар ангийн алба хаагчид 21 км замыг туулан 22:42 цагт очиход Баян-Өлгий аймгаас Ховд аймгийн чиглэлд зорчиж явсан “Приус-20” загварын суудлын /2 зорчигчтой/ автомашин, Ховд аймгаас Баян-Өлгий аймгийн чиглэлд зорчиж явсан “Приус-20” загварын суудлын /5 зорчигтой/ автомашин хоорондоо мөргөлдсөний улмаас 1 автомашин шатаж, автомашины бүхээгт Ховд аймгийн Буянт сумын харьяат иргэн С/61 настай, эрэгтэй/, А /51 настай, эрэгтэй/ нар хавчуулагдан шатаж нас барсан, 2 дахь автомашины бүхээг дотор Баян-Өлгий аймгийн Улаанхус сумын харьяат иргэн С/61 настай, эмэгтэй/ хавчуулагдаж нас барсан байсан тул гал түймрийг унтрааж, цогцсуудыг гарган тус аймгийн Цагдаагийн газрын бүрэлдэхүүнд шилжүүлэн өгсөн.
Мөн 4 хүнд эмнэлгийн анхны тусламжийг үзүүлж, аймгийн Нэгдсэн эмнэлгийн Яаралтай тусламжийн тасагт хүлээлгэн өгсөн.
ОНЦГОЙ БАЙДЛЫН ЕРӨНХИЙ ГАЗАР