Нийслэлийн Засаг даргын 2014-2015 оны төсвийн хөрөнгө оруулалтаар “Нийслэлийн иргэдийг Гамшгаас хамгаалах сургалтын төв”-ийг шинээр байгуулан үйл ажиллагааг нь эхлүүлээд байна.
Тус төв нь гамшгийн аюулаас өөрийгөө болон бусдыг хэрхэн аврах мэдлэгийг иргэд, олон нийтэд олгох бөгөөд эмнэлгийн анхны тусламж үзүүлэх, утаат орчны, гал унтраах сургалт, дадлагын, өндрөөс аврах ажиллагааны, газар хөдлөлтийн тусгай тоноглол бүхий танхим, 3D кино театр, хичээлийн бусад танхим зэрэг нийт 52 өрөө бүхий байгууламжаас бүрдэж байгаа юм.
Жилдээ 750 гаруй мянган иргэнд газар хөдлөлтийн гамшгийн зарлан мэдээллийн дохиогоор ажиллах, обьектыг орхин аюулгүй орчинд гарах, өөртөө болон бусдад эмнэлгийн анхны тусламж үзүүлэх, болзошгүй эрсдэлээс урьдчилан сэргийлэх, гал унтраах анхан шатны багаж хэрэгслийг ашиглаж сургах чиглэлээр мэдлэг, дадлага олгох сургалтыг явуулах боломжтой.
Нийслэлийн Онцгой байдлын газраас тус төвд сургууль, цэцэрлэгийн сурагчдыг сургалтанд хамруулах ажлыг хэрхэн хамтран зохион байгуулах талаар Нийслэлийн Боловсролын газрын удирдлагуудын дунд уулзалт зөвлөгөөн зохион байгуулсан байна. Нийслэлийн зургаан дүүргээс 60 гаруй сургуулийн захирал, эрхлэгч, нийгмийн ажилтнууд хамрагдаж сургалтын төвийн үйл ажиллагаатай танилцан санал бодлоо солилцжээ.
Сургалтад төрийн болон төрийн бус байгууллагууд, ерөнхий боловсролын сургууль, цэцэрлэгийн сурагчид хамрагдах боломжтой юм.
