Хөвсгөл аймгийн Засаг дарга Л.Ганболд аймгийн Онцгой байдлын газрын үйл ажиллагаа болон автомашин техник, багаж зэвсэглэмж, тоног төхөөрөмжтэй танилцаж нийт бие бүрэлдэхүүнтэй уулзлаа.
Энэ үеэр Онцгой байдлын газрын дарга онцгой байдлын хурандаа Г.Нэргүй, тус газрын 2015-2016 онд хийж хэрэгжүүлсэн ажлын талаар танилцуулга хийж, Мөрөн хотод шинээр Гал унраах, аврах анги байгуулах, Тариалан суман дахь депогийн барилгыг улсын төсөвт суулгах, Онцгой байдлын газрын барилгыг төвийн дулаан шугамд холбох, 2017 онд болох Гамшгаас хамгаалах Иж бүрэн сургуулийн төсвийг батлах, аврагч гал сөнөөгчдийн нэрэмжит гудамжны газрын асуудлыг шийдвэрлэх, ар гэрийг нь ажилтай болоход дэмжлэг үзүүлэх зэрэг хүсэлт, саналыг Засаг даргаас хүслээ.
Засаг дарга Л.Ганболд тус газрын хийж хэрэгжүүлсэн, төлөвлөж буй ажлыг өндрөөр үнэлээд гамшгаас урьдчилан сэргийлж ажиллахын чухлыг онцолж, аврагчдын ар гэрийг ажилтай болгох, төсөл хөтөлбөрт хамруулах, нэрэмжит гудамжны газрын асуудлыг шийдвэрлэхээ илэрхийлж, аврагч гал сөнөөгчдийн орон нутгийнхаа онцлогт тохируулж хийсэн гамшгаас урьдчилан сэргийлэх сэрэмжлүүлэг, гарын авлага материалыг санхүүжүүлж хэвлэн олон нийтэд хүргэж, санаачилгатай ажилласан албан хаагчдыг урамшуулж ажиллахаа илэрхийллээ гэж Хөвсгөл аймгийн Онцгой байдлын газраас мэдээллээ.
