Өнөөдөр: Ихэнх нутгаар үүлэрхэг. Говийн аймгуудын ихэнх, баруун аймгуудын зүүн, төвийн аймгуудын өмнөд хэсгээр цас орж, цасан шуурга шуурна. Салхи баруун хойноос 5-10 м/с, Алтайн салбар уулс болон говийн нутгаар 12-14 м/с хүрч ширүүснэ. Дархадын хотгор, Идэр, Тэс голын хөндийгөөр 18-23 градус, Увс нуур, Байтаг богд орчим болон Хангай, Хэнтийн уулархаг нутаг, Хараа, Ерөө, Туул, Тэрэлж голын хөндий, Дорнод Монголын тал нутгаар 13-18 градус, говийн бүс нутгийн өмнөд хэсгээр 3-8 градус бусад нутгаар 9-14 градус хүйтэн байна.
Улаанбаатар хотод: Үүлшинэ. Цас орохгүй. Салхи баруун хойноос 5-10 м/с, 12-14 градус хүйтэн байна.
Төлөв байдал: 6-нд төвийн аймгуудын зарим газраар, зүүн аймгуудын нутгийн өмнөд хэсгээр, 8-нд нутгийн зүүн хэсгээр цас орж, цасан шуурга шуурна. Салхи 6-8-нд говь талын нутгаар 14-16 м/с хүрч ширүүснэ. Дархадын хотгор, Идэр, Тэс голын хөндий, Байтаг Богд орчмоор шөнөдөө 30-35 градус, өдөртөө 21-26 градус, Увс нуурын хотгор болон Орхон-Сэлэнгэ, Хараа, Ерөө, Туул, Тэрэлж, Хэрлэн, Онон, Улз, Халх голын хөндийгөөр шөнөдөө 25-30 градус, өдөртөө 15-20 градус, говийн бүс нутгийн өмнөд хэсгээр шөнөдөө 11-16 градус, өдөртөө 3-8 градус, бусад нутгаар шөнөдөө 18-23 градус, өдөртөө 10-15 градус хүйтэн байна.
2. Эрэн хайх, аврах ажиллагаа
Сураггүй болсон: Сэлэнгэ аймгийн Хүдэр сумын Баянцагаан багийн “Баруун моностой” гэдэг газар самарт явж байсан Орхон аймгийн харьяат иргэн Г /46 настай, эмэгтэй/, Н /38 настай, эрэгтэй/ нар 2016.11.14-ний өдрөөс, мөн иргэн Г /38 настай, эрэгтэй/ 2016.11.28-ны өдрөөс хойш сураггүй болсон тухай дуудлагыг 2016.12.02-ны өдрийн 11:00 цагт хүлээн авч аймгийн Онцгой байдлын газрын 6 албан хаагч, 1 автомашинтай, орон нутгаас 6 хүн, ар гэрээс 7 хүн, нийт 19 хүн, 1 автомашинтайгаар ажиллаж, 2016.12.04-ний өдрийн 12:40 цагт Хүдэр сумын Баянцагаан багийн “Баруун моностой” гэдэг газраас иргэн Г /46 настай, эмэгтэй/, Н /38 настай, эрэгтэй/ нарыг осгож нас барсан байдалтай байсныг олж цагдаагийн байгууллагад хүлээлгэн өгсөн. Иргэн Г /38 орчим настай, эрэгтэй/-г эрэн хайх ажиллагаа үргэлжилж байна.
Дорноговь аймгийн Эрдэнэ сумын Еншөөв багийн “Дуут” гэдэг газар нутагладаг малчин П /19 настай, эрэгтэй/ 2016.12.04-ний өдрийн 14:00 цагийн үед малдаа яваад сураггүй болсон тухай дуудлагыг 2016.12.04-ний өдрийн 21:22 цагт хүлээн авч тус аймгийн Онцгой байдлын газрын Гал түймэр унтраах, аврах 17 дугаар ангийн 5 албан хаагч, 1 автомашинтай, орон нутгаас 6 хүн, 1 автомашинтай, нийт 11 хүн, 2 автомашинтайгаар эрлийн ажиллагааг зохион байгуулж 2016.12.05-ны өдрийн 12:17 цагт тус сумын Еншөөв багийн “Харнууд” гэдэг газраас иргэн Б-н гэрээс эсэн мэнд олсон.
Багануур дүүргийн 4 дүгээр хороо, Улаан ирэг гэдэг газраас дүүргийн төврүү явж байсан иргэн Б /73 настай, эрэгтэй/ төөрсөн гэсэн дуудлагыг 2016.12.06-ны өдрийн 00:22 цагт хүлээн авч тус дүүргийн Онцгой байдлын хэлтсийн Гал түймэр унтраах, аврах 64 дүгээр ангийн бэлтгэл 3 албан хаагч, 1 автомашинтай ажиллаж иргэн Б /73 настай, эрэгтэй/ Улаан ирэг явах замд дүүргийн төвөөс 7 км зайтай осгож бээрсэн байдалтай байсныг эсэн мэнд олж ар гэрийн хүмүүст хүлээлгэн өгсөн.