Онцгой байдлын байгууллагад дэмжлэг үзүүлэх зорилгоор төрийн болон төрийн бус байгууллага, иргэд, аж ахуйн нэгж байгууллагууд эд материалын болон мөнгөн хандивыг илгээсээр байна.
Тухайлбал, өнөөдөр Англи улсад ажиллаж, амьдарч байгаа Монголчуудынхаа дунд “Монгол центр” болон О.Одмандах, Б.Анука, Ж.Басоли нар уриалан хандивын аяныг долоо хоногийн хугацаатай өрнүүлж, 5,860,000 төгрөг цуглуулснаа илгээлээ. Уг аянд Англи улсад ажиллаж, амьдарч байгаа 70 гаруй иргэн, аж ахуйн нэгжүүд хамрагдсан байна.
Тус хандивыг Монголын шатрын холбооны гүйцэтгэх захирал Б.Наранбаатар болон “Англи Карго ХХК”-ийн захирал Ч.Пүрэвсүрэн нар ОБЕГ-т гардуулан өглөө.
Мөн Англи улсын Манчестр хотод ажиллаж, амьдарч байгаа 20 гаруй хувь хүн, аж ахуйн нэгж байгууллагууд хамтран хандивын аян өрнүүлж, 3,039,750 төгрөгийг цуглуулснаа өнөөдөр ОБЕГ-т хүлээлгэн өгсөн бол Хөдөлмөр аюулгүй байдал, эрүүл мэндийн төвийн ажилтан, алба хаагчид нэг өдрийн цалин болох 2,300,000 төгрөгийг хандивлалаа гэж Онцгой байдлын ерөнхий газраас мэдээллээ.
