1.Цаг агаарын талаар:
Өнгөрсөн хоногт: Дархан-Уул, Орхон, Сэлэнгэ, Төв аймгийн нутагт цас орсон. Бусад нутгаар цаг агаар тогтуун байлаа.
Өнөөдөр: Баруун болон говийн аймгуудын нутгаар солигдмол үүлтэй, бусад нутгаар үүлэрхэг. Төв болон зүүн аймгуудын ихэнх нутгаар цас, баруун аймгуудын нутгийн зүүн, говийн аймгуудын нутгийн хойд хэсгээр бага зэргийн цас орж, цасан шуурга шуурна. Салхи баруун өмнөөс хойш эргэж 7-12 м/с, говь талын хээрийн нутгаар 18-20 м/с хүрч ширүүснэ. Хүйтэрч Дархадын хотгор болон Идэр, Тэс, Туул, Тэрэлж голын хөндийгөөр 14-19 градус, Хангай, Хөвсгөл, Хэнтэйн уулархаг нутаг, Орхон-Сэлэнгэ, Хараа, Ерөө, Хэрлэн голын сав газраар 9-14 градус хүйтэн, говийн бүс нутгийн өмнөд хэсгээр 3 градус дулаанаас 2 градус хүйтэн, бусад нутгаар 5-10 градус хүйтэн байна.
Улаанбаатар хотод: Үүлшинэ. Бага зэргийн цас орж, цасан шуурга шуурна. Салхи баруун өмнөөс хойш эргэж 6-11 м/с, зарим үед 14-16 м/с хүрч ширүүснэ. 9-11 градус хүйтэн байна. Оройдоо хүйтний эрч чангарна.
Төлөв байдал: 28-нд зүүн болон баруун аймгуудын нутгийн зарим газар, төвийн аймгуудын нутгийн баруун хэсгээр, 29-нд зарим газраар, 30-нд нутгийн зүүн хэсгээр цас орж, зөөлөн цасан шуурга шуурна. Салхи 28-29-нд зарим газраар, 30-нд нутгийн зүүн хэсгээр 12-14 м/с хүрч ширүүснэ. 28-29-нд нутгийн зүүн хагаст хүйтний эрч чангарна. Бусад хугацаанд Дархадын хотгор, Идэр, Тэс, Туул, Тэрэлж, Хэрлэн, Онон, Улз, Халх голын хөндийгөөр шөнөдөө 28-33 градус, өдөртөө 16-21 градус, Хангай, Хөвсгөл, Хэнтэйн уулархаг нутаг, Хараа, Ерөө голын сав газраар шөнөдөө 21-26 градус, өдөртөө 12-17 градус, говийн бүс нутгийн өмнөд хэсгээр шөнөдөө 10-15 градус, өдөртөө 3-8 градус, бусад нутгаар шөнөдөө 17-22 градус, өдөртөө 8-13 градус хүйтэн байна.
2.Объектын гал түймэр:
Төрийн өмчид гарсан: Баянхонгор аймгийн Баянхонгор сумын Есөн булаг багт хашаанд хураасан 15 м3 банз шатаж байна гэсэн дуудлагыг 11.26-ны өдрийн 14:58 цагт хүлээн авч тус аймгийн Онцгой байдлын газрын Гал түймэр унтраах, аврах 16 дугаар ангийн 7 алба хаагч, 2 автомашинтайгаар 15:02 цагт хүрэлцэн очиж, 00:29 цаг ажиллаж унтраасан.
Хувийн өмчид гарсан: Дорнод аймгийн Хэрлэн (Сүмбэр) сумын 1 дүгээр багт байшин шатаж байна гэсэн дуудлагыг 11.26-ны өдрийн 17:04 цагт хүлээн авч тус аймгийн Онцгой байдлын газрын Гал түймэр унтраах, аврах 52 дугаар ангийн 6 алба хаагч, 1 автомашинтайгаар 17:09 цагт хүрэлцэн очиж, 00:58 цаг ажиллаж унтраасан.
Сүхбаатар аймгийн Баруун-Урт сумын 2 дугаар багт иргэн Н-ийн 58-36 СҮА улсын дугаартай “Стана” загварын автомашин шатаж байна гэсэн дуудлагыг 11.26-ны өдрийн 09:19 цагт хүлээн авч тус аймгийн Онцгой байдлын газрын Гал түймэр унтраах, аврах 15 дугаар ангийн 6 алба хаагч, 1 автомашинтайгаар 09:23 цагт хүрэлцэн очиж, 00:12 цаг ажиллаж унтраасан.
3.Зам тээврийн осол:
Автозамын осол: Дархан-Уул аймгийн Дархан сумын Малчин багийн “Төмөр хүн хөшөө” гэдэг газар иргэн Х-гийн эзэмшлийн 36-15 ДАХ улсын дугаартай “Форостер” загварын суудлын автомашин, 18-20 УНВ улсын дугаартай “Приус-20” загварын суудлын автомашин, 07-69 УНМ улсын дугаартай “Альфард” загварын суудлын автомашинуудтай мөргөлдөж, автомашины төмөр хийцэд хүн хавчуулагдсан тухай дуудлагыг 11.26-ны өдрийн 19:51 цагт хүлээн авч тус аймгийн Онцгой байдлын газрын Гал түймэр унтраах, аврах 22 дугаар ангийн 4 алба хаагч, 1 техник хэрэгсэлтэйгээр 00:12 цаг ажиллаж, автомашины төмөр хийцэд хавчуулагдсан иргэн Х /26 настай, эрэгтэй/-г аварч, эмнэлгийн байгууллагад шилжүүлэн өгсөн.
Сэлэнгэ аймгийн Сүхбаатар сумын Хонгорморьт багийн “Сайханы хөтөл” гэдэг газар иргэн Т-гийн эзэмшлийн 86-36 СЭҮ улсын дугаартай “Портер” загварын ачааны автомашин онхолдож, автомашины төмөр хийцэд хүн хавчуулагдсан тухай дуудлагыг 11.26-ны өдрийн 14:40 цагт хүлээн авч тус аймгийн Онцгой байдлын газрын 8 алба хаагч, 1 техник хэрэгсэлтэй ажиллаж, автомашины төмөр хийцэд хавчуулагдаж нас барсан иргэн Т /37 настай, эрэгтэй/-н цогцсыг гаргаж, цагдаагийн байгууллагад шилжүүлэн өгсөн.
4.Эрэн хайх, аврах ажиллагаа:
Эрэн хайх ажиллагаа /сураггүй болсон/: Дорноговь аймгийн Замын-Үүд сумын 3 дугаар багт С /8 настай, эмэгтэй/ 11.02-ны өдрийн 13:00 цагт хичээлдээ явна гэж гэрээсээ гараад сураггүй болсон тухай дуудлагыг 11.02-ны өдрийн 21:41 цагт хүлээн авч тус суман дахь Онцгой байдлын хэлтсийн 10, Цагдаагийн хэлтсийн 16, нийт 26 хүн, 2 техник хэрэгсэлтэйгээр тус сумын төвийн дулааны, цэвэр болон бохир усны шугамын худагт эрэн хайх ажиллагааг зохион байгуулсан.
Бусад: Сүхбаатар аймгийн Асгат сумын Дөхөм багийн “Авдарын гол” гэдэг газар /сумын төвөөс зүүн урд зүгт 10 км-т/ иргэн Ц-гийн эзэмшлийн 25-46 УБГ улсын дугаартай “Стана” загварын автомашин цасанд суусан тухай дуудлагыг 11.26-ны өдрийн 21:50 цагт хүлээн авч тус аймгийн Онцгой байдлын газрын 5 алба хаагч, 1 техник хэрэгсэлтэйгээр 00:30 цаг ажиллаж, автомашиныг цаснаас татан гаргасан.
Сүхбаатар аймгийн Баруун-Урт сумын 2 дугаар багийн “Гүн булаг” гэдэг газар /сумын төвөөс хойд урд зүгт 30 км-т/ иргэн Т-гийн эзэмшлийн 42-33 ДОР улсын дугаартай “Кроун” загварын автомашин цасанд суусан тухай дуудлагыг 11.26-ны өдрийн 23:10 цагт хүлээн авч тус аймгийн Онцгой байдлын газрын 5 алба хаагч, 1 техник хэрэгсэлтэйгээр 00:20 цаг ажиллаж, автомашиныг цаснаас татан гаргасан.
Нийслэлийн Хан-Уул дүүргийн 11 дүгээр хороонд дулааны шугамын худагт цогцос байна гаргаж өгнө үү гэсэн дуудлагыг 11.26-ны өдрийн 13:54 цагт хүлээн авч Нийслэлийн Аврах ангийн 5 алба хаагч, 1 автомашинтай 14:10 цагт очиж, 00:20 цаг ажиллаж, дулааны шугамын хоойлойд түлэгдэж нас барсан нэр, нас, оршин суух хаяг тодорхойгүй 2 эмэгтэй хүний цогцсыг гаргаж, Цагдаагийн байгууллагад шилжүүлэн өгсөн.
5.Мал, амьтны гоц халдварт өвчин
Дорнод аймгийн Баяндун сумын Яргай багийн “Үхэрт” гэдэг газар /сумын төвөөс баруун урд зүгт 40 км-т/ тус багийн малчин Г-гийн 4 үхэрт мал, амьтны гоц халдварт “Шүлхий” өвчний шинж тэмдэг илэрч, өвчилсөн малаас дээж авч, УМЭАЦТЛ-д шинжлүүлэхэд 10.17-ны өдрийн 17-2195 тоот хариугаар “Шүлхий” өвчин болох нь;
Сэлэнгэ аймгийн Мандал сумын 7 дугаар багт иргэн Д-гийн 5 үхэрт 11.16-ны өдөр мал амьтны гоц халдварт “Шүлхий” өвчний шинж тэмдэг илэрч, өвчилсөн малаас дээж авч, УМЭАЦТЛ-д шинжлүүлэхэд 11.18-ны өдрийн 17-2433 дугаар хариугаар “Шүлхий” өвчин болох нь;
Хэнтий аймгийн Өмнөдэлгэр сумын Баянзүрх багийн “Түмэнгийн гозгор” гэдэг газар /сумын төвөөс баруун хойд зүгт 60 км-т/ тус багийн малчин Д-гийн 11 үхэрт мал, амьтны гоц халдварт “Шүлхий” өвчний шинж тэмдэг илэрч, өвчилсөн малаас дээж авч, УМЭАЦТЛ-д шинжлүүлэхэд 11.13-ны өдрийн 17-2368 дугаар хариугаар “Шүлхий” өвчин болох нь;
Булган аймгийн Дашинчилэн сумын Хараат багийн “Бандийнхүү” гэдэг газар /сумын төвөөс урд зүгт 20 км-т/ тус багийн малчин Б-гийн 1 үхэр 11.07-ны өдөр халдварт өвчний шинж тэмдэгтэй хорогдсон тул дээж авч аймгийн МЭАЦЛ-д шинжлүүлэхэд 11.16-ны өдрийн 361-362 дугаар хариугаар “Галзуу” өвчин болох нь тус тус тогтоогдсон.
ОНЦГОЙ БАЙДЛЫН ЕРӨНХИЙ ГАЗАР