1.Цаг агаарын талаар:
Өнгөрсөн хоногт: Нийт нутгаар цаг агаар тогтуун байлаа.
Өнөөдөр: Говийн аймгуудын нутгаар багавтар үүлтэй. Цас орохгүй. Бусад нутгаар үүлшинэ. Баруун аймгуудын нутгийн зүүн хэсэг, төвийн аймгуудын нутгийн зарим газар, зүүн аймгуудын нутгийн зүүн хэсгээр ялимгүй цас орно. Салхи баруун хойноос 6-11 м/с. Увс нуурын хотгор, Завхан голын эх, Идэр, Тэс голын хөндийгөөр 20-25 градус, Их нууруудын болон Дархадын хотгор, Хүрэн бэлчир орчим, Хараа, Ерөө, Туул, Тэрэлж, Халх голын хөндийгөөр 11-16 градус хүйтэн, Эхийн голын Баянбүрд болон говийн бүс нутгийн өмнөд хэсгээр 1 градус дулаанаас 4 градус хүйтэн, бусад нутгаар 7-12 градус хүйтэн байна.
Улаанбаатар хотод: Үүлшинэ. Ялимгүй цас орно. Салхи баруун хойноос 6-11 м/с. 11-13 градус хүйтэн байна.
Төлөв байдал: 22-нд төвийн аймгуудын нутгийн зүүн хэсэг, зүүн аймгуудын нутгийн зарим газраар, 23-нд Хангай, Хөвсгөлийн уулархаг нутгаар, 24-нд баруун аймгуудын нутгийн баруун хэсэг, зүүн аймгуудын нутгийн зүүн хэсгээр, 25-нд нутгийн хойд хэсгээр бага зэргийн цас орж, зөөлөн цасан шуурга шуурна. Салхи 22, 23, 25-нд зарим газраар, 24-нд Алтайн уулсаар 14-16 м/с хүрч ширүүснэ. 22-нд нутгийн баруун хэсгээр цаашдаа ихэнх нутгаар хүйтний эрч суларч Увс нуур болон Дархадын хотгор, Завхан голын эх, Идэр, Тэс голын хөндийгөөр шөнөдөө 32-37 градус, өдөртөө 16-21 градус, Хүрэн бэлчир, Хараа, Ерөө, Туул, Тэрэлж, Хэрлэн, Онон, Улз, Халх голын хөндийгөөр шөнөдөө 22-27 градус, өдөртөө 9-14 градус, говийн бүс нутгийн өмнөд хэсгээр шөнөдөө 12-17 градус, өдөртөө 3 градус дулаанаас 2 градус хүйтэн, бусад нутгаар шөнөдөө 17-22 градус, өдөртөө 4-9 градус хүйтэн байна.
2.Объектын түймэр:
Хувийн өмчид гарсан: Нийслэлийн Чингэлтэй дүүргийн 17 дугаар хороонд байшин шатаж байна гэсэн дуудлагыг 02.21-ний өдрийн 12:49 цагт хүлээн авч Сүхбаатар дүүргийн Онцгой байдлын хэлтсийн Гал түймэр унтраах, аврах 34 дүгээр ангийн 8 алба хаагч, 2 автомашинтай 13:02 цагт очиж, 5 минут ажиллаж унтраасан.
Чингэлтэй дүүргийн 14 дүгээр хороонд граж шатаж байна гэсэн дуудлагыг 02.21-ний өдрийн 17:05 цагт хүлээн авч Сүхбаатар дүүргийн Онцгой байдлын хэлтсийн Гал түймэр унтраах, аврах 34 дүгээр ангийн 8 алба хаагч, 2 автомашинтай 17:15 цагт очиж 25 минут ажиллаж унтраасан.
Баянзүрх дүүргийн 22 дугаар хороонд гэр шатаж байна гэсэн дуудлагыг 02.21-ний өдрийн 17:15 цагт хүлээн авч тус дүүргийн Онцгой байдлын хэлтсийн Гал түймэр унтраах, аврах 63 дугаар ангийн 8 алба хаагч, 2 автомашинтай 17:23 цагт очиж 20 минут ажиллаж унтраасан. Уг гал түймэрт иргэн Э /49 настай, эрэгтэй/, А /39 настай, эмэгтэй/, О /7 настай, эмэгтэй/, Ц /5 сартай, эрэгтэй/ нар өртөж нас барсан тул цогцсыг гаргаж Баянзүрх дүүрэг дэх Цагдаагийн 2 дугаар хэлтсийн жижүүрийн бүрэлдэхүүнд шилжүүлэн өгсөн.
Баянзүрх дүүргийн 2 дугаар хороонд байшин шатаж байна гэсэн дуудлагыг 02.21-ний өдрийн 17:33 цагт хүлээн авч Чингэлтэй дүүргийн Онцгой байдлын хэлтсийн Гал түймэр унтраах, аврах 10 дугаар ангийн 8 албан хаагч, 2 автомашинтай 17:48 цагт очиж 30 минут ажиллаж унтраасан.
3.Мэдээлэл:
Гамшиг, аюулт үзэгдэл, ослын талаар: Дорнод аймгийн Халхгол сумын Цогтсүмбэр багт тус сумын харъяат иргэн М /10 настай, эрэгтэй/ 02.20-ны өдрийн 12:00 цагт гэрээсээ гараад сураггүй болсон тухай дуудлагыг мөн өдрийн 22:37 цагт хүлээн авч орон нутгийн 78 хүн, 6 автомашинтай 02.20-ны өдрийн 19:00 цагаас эхлэн эрэн хайх ажиллагааг зохион байгуулж 02.21-ний өдрийн 08:55 цагт сумын төвөөс зүүн хойд зүгт 3 км-т Цогтсүмбэр багийн “Баастын гарам” гэдэг газраас эсэн мэнд олсон.
Сонгинохайрхан дүүргийн 26 дугаар хороонд гэр шатаж байна гэсэн дуудлагыг 02.21-ний өдрийн 20:24 цагт хүлээн авч тус дүүрийн Онцгой байдлын хэлтсийн Гал түймэр унтраах, аврах 26 дугаар ангийн 8 алба хаагч, 2 автомашинтай 20.39 цагт очиход иргэд унтраасан байв. Шатсан гэрийн гадна талд иргэн Б /40 орчим настай, эрэгтэй/ гадны нөлөөтэй нас барсан байсан тул цогцсыг Нийслэлийн Цагдаагийн газрын удирдлага зохицуулалтын хэлтсийн жижүүрийн бүрэлдэхүүнд шилжүүлэн өгсөн тухай мэдээллийг ЦЕГ-ын харьяа МШУТ-өөс ирүүлсэн.
ОНЦГОЙ БАЙДЛЫН ЕРӨНХИЙ ГАЗАР