Газар хөдлөлтийн гамшгийн аюулаас урьдчилан сэргийлэх байнгын ажиллагаатай зөвлөлийн 2015 оны анхны хурал боллоо.
Монгол Улсын Засгийн газрын 2011 оны 95 дугаар тогтоолоор Газар хөдлөлтийн гамшгийн аюулаас урьдчилан сэргийлэх, эрсдэлийг бууруулах, бэлэн байдлыг хангахад мэргэжлийн байгууллагуудын үйл ажиллагааг уялдуулан зохицуулж, нэгдсэн удирдлагаар хангах зорилго бүхий байнгын ажиллагаатай зөвлөл байгуулж, “Газар хөдлөлтийн гамшгаас хамгаалах үндэсний чадавхийг бэхжүүлэх төлөвлөгөө”-г баталсан. Мөн 2012 онд Засгийн газрын бүтэц, бүрэлдэхүүнд өөрчлөлт орсонтой холбогдуулан Монгол Улсын Шадар сайдын 2014 оны 36 дугаар тушаалаар зөвлөлийн бүрэлдэхүүнийг шинэчлэн баталсан.
Байнгын ажиллагаатай зөвлөлийн үйл ажиллагааг Монгол Улсын Шадар сайд удирддаг.
Тус зөвлөлийн 2015 оны анхны хурлаар, байнгын ажиллагаатай зөвлөлийн бүрэлдэхүүнийг баталж, ажлын албыг байгууллаа. Байнгын ажиллагаатай зөвлөлийн Ажлын алба нь Онцгой байдлын ерөнхий газрын Гамшгийн шуурхай удирдлагын газар байх юм.
Засгийн газрын бүтэц, бүрэлдэхүүнд 2014 онд орсон өөрчлөлттэй холбогдуулан Барилга хот байгуулалтын сайд, Нийслэлийн Засаг дарга бөгөөд Улаанбаатар хотын захирагчийг Байнгын ажиллагаатай зөвлөлийн орлогч даргаар, гишүүдээр Байгаль орчин, ногоон хөгжил, аялал жуулчлалын дэд сайд, Хүнс, хөдөө аж ахуйн дэд сайд, Эрүүл мэнд, спортын дэд сайд, Уул уурхайн дэд сайд, Эрчим хүчний дэд сайд, Хууль зүйн яамны Төрийн нарийн бичгийн дарга, Сангийн яамны Төрийн нарийн бичгийн дарга, Барилга, хот байгуулалтын яамны Төрийн нарийн бичгийн дарга, Батлан хамгаалах яамны Төрийн нарийн бичгийн дарга, Боловсрол, соёл, шинжлэх ухааны яамны Төрийн нарийн бичгийн дарга, Онцгой байдлын ерөнхий газрын дарга, Мэргэжлийн хяналтын ерөнхий газрын дарга, Мэдээллийн технологи, шуудан, харилцаа холбооны газрын дарга, Шинжлэх ухааны академийн Одон орон, геофизик судалгааны төвийн захирал нар ажиллана.
Харин байнгын ажиллагаатай зөвлөлийн нарийн бичгийн даргаар Монгол Улсын Шадар сайдын гамшгаас хамгаалах асуудал хариуцсан зөвлөх, Үндэсний аюулгүй байдлын зөвлөлийн Ажлын албаны ахлах референт, Онцгой байдлын ерөнхий газрын Гамшгийн шуурхай удирдлагын газрын дарга нарыг ажиллуулахаар болсон. Мөн тус зөвлөлийн 2014 оны үйл ажиллагааны төлөвлөгөөний биелэлт, 2015 оны үйл ажиллагааны төлөвлөгөөг танилцууллаа.
Монгол Улсын Шадар сайд, байнгын ажиллагаатай зөвлөлийн дарга У.Хүрэлсүх зөвлөлийн гишүүдэд тодорхой үүрэг, чиглэлийг өгсөн.
Өнгөрсөн онд Газар хөдлөлтийн гамшгаас амжиж анхааруулах систем байгуулах төслийг бүрэн хэрэгжүүлж, удирдлагын төв, хөдөлгөөнт удирдлагын автомашин болон 5 ФМ радио, 3 телевиз, 60 дуут цамхаг, орон нутагт газар хөдлөлтийн чичирхийлэлийг мэдрэх, мэдээллийг дамжуулах станцууд бүхий сүлжээг ашиглалтад хүлээн авсан.
Уг систем нь иргэдэд үүрэн холбоо, телевиз, радио, ФМ, дуут дохио, мэдээллийн самбараар гамшгийн талаарх мэдээллийг 3-5 секундын дотор хүргэхээс гадна улс орны онц чухал обьектуудад аюулт үзэгдэл, ослоос сэргийлэх, сэрэмжлүүлэх дохиог хүргэх бөгөөд энэ системийг ашиглан гамшгийн үед шуурхай удирдлага, зохицуулалтаар хангах үйл ажиллагааг зохион байгуулах боломжтой юм.
Болзошгүй газар хөдлөлтийн гамшгаас урьдчилан сэргийлэх, эрсдэлийг бууруулах чиглэлээр Хэнтий, Булган аймаг, Чингэлтэй, Сүхбаатар, Налайх дүүрэгт гамшгаас хамгаалах иж бүрэн сургууль, Говь-Алтай, Сүхбаатар, Төв, аймаг, Хан-Уул дүүрэгт гамшгаас хамгаалах команд-штабын дадлага сургуулийг зохион байгуулж нийт 4.082 хүн, 214 техник хэрэгсэл оролцсон байна.
Гамшгийн аюулын зарлан мэдээллийн дохиогоор ажиллах дадлага сургуулийг тогтмол арга хэмжээг болгон, жил бүрийн 3 дугаар сарын 4 дэх долоо хоногийн пүрэв гарагийн 16:00 цагт зохион байгуулдаг болсон бөгөөд сүүлийн 2 жилд 21 аймаг, нийслэл, 320 сум, 9 дүүрэгт гамшгаас хамгаалах 271 алба, 564 мэргэжлийн анги, 1590 аж ахуйн нэгж, байгууллагын нийт 540.0 гаруй мянган хүн оролцжээ.
Нийслэлд хийгдэж буй барилгын газар хөдлөлтийн тэсвэрлэх байдал, чанарыг шалгах үзлэг шалгалтын үр дүнд үндэслэн ашиглалтын шаардлага хангахгүй барилгыг буулгах, дахин төлөвлөлтөд оруулах ажлыг эхлүүлж, Хан-уул, Баянгол дүүрэгт 20 гаруй барилгыг дахин төлөвлөж гүйцэтгэгчийг сонгож байгаа аж.
Нийслэлд орон сууц, олон нийтийн зориулалттай 3000 гаруй барилга байгаагаас 328 барилгад газар хөдлөлтийн тэсвэрлэх байдал, чанарыг шалгах үзлэг шалгалт хийж, 856 барилгын байдалд дүгнэлт гарган паспортжуулж, мэдээллийн санд оруулсан байна.
Онцгой байдлын ерөнхий газар
2015.01.20