1.Цаг агаар:
Өнгөрсөн хоногт: Сүхбаатар аймгийн зарим нутгаар бороо болон нойтон цас орж, баруун болон говийн аймгуудын нутгаар шуурсан.
Өнөөдөр: Зүүн аймгуудын нутгийн зүүн хэсгээр үүлэрхэг. Халх голын сав газраар бага зэргийн хур тунадас орно. Бусад нутгаар багавтар үүлтэй. Хур тунадас орохгүй. Салхи зүүн аймгуудын нутгаар зүүн хойноос, бусад нутгаар баруунаас 6-11 м/с, баруун, говь, зүүн аймгуудын нутгийн зарим газраар 12-14 м/с хүрч зөөлөн шороон шуурга шуурна. Хангай, Хөвсгөл, Хэнтэйн уулархаг нутаг, Завхан голын эх, Хүрэн бэлчир орчим, Идэр, Тэс голын хөндийгөөр 10-15 градус, Их нууруудын хотгор болон Алтайн өвөр говиор 21-26 градус, Орхон-Сэлэнгийн сав газар, говийн бүс нутгаар 18-23 градус, бусад нутгаар 15-20 градус дулаан байна.
Улаанбаатар хотод: Багавтар үүлтэй. Бороо орохгүй. Салхи баруунаас 7-12 м/с. Дулаарч 17-19 градус дулаан байна.
Төлөв байдал: 21-нд зүүн аймгуудын нутгийн зүүн, 22-нд баруун аймгуудын нутгийн баруун хэсгээр, 23-нд баруун болон төвийн аймгуудын нутгийн зарим газраар бороо, 24-нд баруун болон төвийн аймгуудын ихэнх нутгаар бороо, уулархаг нутгаар нойтон цас орно. Салхи 21-нд нутгийн зарим газраар 14-16 м/с, 22-нд Алтайн салбар уулсаар, 23, 24-нд ихэнх нутгаар түр зуур 18-20 м/с хүртэл ширүүсч шороон болон цасан шуурга шуурна. Дулаарч Дархадын хотгор, Хангай, Хөвсгөл, Хэнтийн уулархаг нутаг, Идэр, Тэс, Туул, Тэрэлж голын хөндийгөөр шөнөдөө 0-5 градус хүйтэн, өдөртөө 16-21 градус, Их нууруудын хотгор болон говийн бүс нутгийн өмнөд хэсэг, Орхон-Сэлэнгийн сав газраар шөнөдөө 11-16 градус, өдөртөө 29-34 градус, бусад нутгаар шөнөдөө 7-12 градус, өдөртөө 24-29 градус дулаан байна. 23-нд нутгийн баруун хойд хэсгээр, 24-нд ихэнх нутгаар сэрүүснэ.
2.Гал түймэр:
ААН, байгууллагын өмчид гарсан: Дорноговь аймгийн Замын-Үүд сумын Сүлд багийн Төмөр замын ачаа шилжүүлэн ачих 2 дугаар ангийн хашаанд төмөр чингэлэг доогуур цахилгааны утас шатаж байна гэсэн дуудлагыг 05.19-ний өдрийн 19:50 цагт хүлээн авч тус аймгийн Онцгой байдлын газрын Гал түймэр унтраах, аврах 17 дугаар ангийн 6 алба хаагч, 2 автомашинтай 3 км замыг туулан 19:54 цагт очиж, 5 минут ажиллаж унтраасан.
Хувийн өмчид гарсан: Дорноговь аймгийн Замын-Үүд сумын 3 дугаар багт 5 ханатай гэр шатаж байна гэсэн дуудлагыг 05.19-ний өдрийн 09:02 цагт хүлээн авч тус аймгийн Онцгой байдлын газрын Гал түймэр унтраах, аврах 17 дугаар ангийн 6 алба хаагч, 2 автомашинтай 3 км замыг туулан 09:07 цагт очиж, 5 минут ажиллаж унтраасан.
Нийслэлийн Баянзүрх дүүргийн 9 дүгээр хороонд 6х3 метрийн хэмжээтэй амбаар шатаж байна гэсэн дуудлагыг 05.19-ний өдрийн 13:36 цагт хүлээн авч тус дүүргийн Онцгой байдлын хэлтсийн Гал түймэр унтраах, аврах 63 дугаар ангийн 7 алба хаагч, 2 автомашинтай 6 км замыг туулан 13:47 цагт очиж, 25 минут ажиллаж унтраасан.
Дархан-Уул аймгийн Дархан сумын 4 дүгээр багийн Төмөр замын байрны хогийн цэг шатаж байна гэсэн дуудлагыг 05.19-ний өдрийн 15:34 цагт хүлээн авч тус аймгийн Онцгой байдлын газрын Гал түймэр унтраах, аврах 54 дүгээр ангийн 3 алба хаагч, 1 автомашинтай 3.5 км замыг туулан 15:39 цагт очиж, 15 минут ажиллаж унтраасан.
Сонгинохайрхан дүүргийн 20 дугаар хороо, Хуучин цэргийн хотхонд байрны дээвэр шатаж байна гэсэн дуудлагыг 05.19-ний өдрийн 17:29 цагт хүлээн авч тус дүүргийн Онцгой байдлын хэлтсийн Гал түймэр унтраах, аврах 26 дугаар ангийн 8 алба хаагч, 2 автомашинтай 3 км замыг туулан 17:34 цагт очиход гал түймэр дэлгэрч байсан тул нэмэлтээр Баянгол дүүргийн Онцгой байдлын хэлтсийн Гал түймэр унтраах, аврах 18 дугаар ангийн 7 алба хаагч, 2 автомашинтай 3 км замыг туулан 17:40 цагт очиж, 1 цаг 20 минут ажиллаж унтраасан.
Сонгинохайрхан дүүргийн 27 дугаар хороонд 6×3 метрийн хэмжээтэй байшингийн тааз шатаж байна гэсэн дуудлагыг 05.19-ний өдрийн 21.46 цагт хүлээн авч тус дүүргийн Онцгой байдлын хэлтсийн Гал түймэр унтраах, аврах 26 дугаар ангийн 8 алба хаагч, 2 автомашинтай 2.5 км замыг туулан 21.50 цагт очиж, 15 минут ажиллаж унтраасан.
3.Эрэн хайх, аврах ажиллагаа:
Эрэн хайх ажиллагаа /сураггүй болсон/: Баянхонгор аймгийн Жинст сумын Уулан багийн “Сэнжитийн даваа” гэдэг газар /аймгийн төвөөс баруун урд зүгт 18 км-т/ тус сумын харьяат иргэн Е /29 настай, эрэгтэй, сэтгэцийн өвчтэй/ Баянхонгор аймгаас Жинст сум руу явган яваад сураггүй болсон тухай дуудлагыг 05.18-ны өдрийн 20:30 цагт хүлээн авч тус аймгийн Онцгой байдлын газрын 1 алба хаагч, аймгийн Цагдаагийн газрын 2 алба хаагч, нийт 3 алба хаагч, 1 автомашинтай 05.18-ны өдрийн 21:30 цагаас тус багийн “Сарын гэзэг” гэдэг газар 50 км-ын тойрогт автомашинаар эрэн хайх ажиллагааг зохион байгуулсан боловч үр дүнд хүрээгүй тул 05.19-ний өдрийн 01:00 цагт зогсоосон. 05.19-ний өдрийн 10:40 цагт тус аймгийн Онцгой байдлын газрын Эрэн хайх, аврах бүлгийн 5 алба хаагч, ар гэрийн 1 хүн, нийт 6 хүн, 1 автомашинтай эрэн хайх ажиллагааг зохион байгуулж, Өлзийт сумын 1 дүгээр багийн “Баянтөхөм”, Жинст сумын төв зэрэг газар 75 км-ын тойрогт эрэн хайх ажиллагааг зохион байгуулж, мөн өдрийн 19:54 цагт “Цохион хашаат” гэдэг газраас эсэн мэнд олж, ар гэрт нь хүлээлгэн өгсөн.
Усны осол /эрэн хайх, аврах/: Сэлэнгэ аймгийн Сүхбаатар сумын Хонгорморьт багийн 3 дугаар хэсгийн “Ширнэнгийн тохой” гэдэг газар /сумын төвөөс урд зүгт 800 м / тус сумын харьяат иргэн О /54 настай, эрэгтэй/ 04.02-ны өдөр Орхон голын мөсөн дээгүүр явж байгаад живсэн бөгөөд тус аймгийн Онцгой байдлын газар 04.02-ны өдрөөс 04.08-ны өдрүүдэд эрэн хайх ажиллагааг зохион байгуулж, үр дүнд хүрээгүй тул түр зогсоогоод байсныг 05.14-ний өдөр дахин үргэлжлүүлсэн. Тус аймгийн Онцгой байдлын газрын Эрэн хайх, аврах ангийн 7 алба хаагч, ар гэрийн 5 хүн, нийт 12 хүн, 3 техник хэрэгсэлтэйгээр 05.19-ний өдрийн 08:30 цагаас “Нүхэн гүүр”-ээс 12-ын зөрлөг хүртэл усаар, Орхон-Сэлэнгийн бэлчир хүртэл 2 удаа 2-3 метр гүнд шумбалт хийж, голын арал дээрх модонд явганаар самналт хийн нийтдээ 20 км-ийн тойрогт эрлийн ажиллагааг зохион байгуулсан боловч үр дүнд хүрээгүй тул мөн өдрийн 19:00 цагт эрлийн ажиллагааг түр зогсоосон. 05.20-ны өдрийн 08:00 цагаас дахин эхлүүлнэ.
Угаартсан: Сүхбаатар аймгийн Түмэнцогт сумын Баян-Овоо багийн Цагдаагийн хэсгийн хяналтын цэгт /сумын төвөөс баруун хойд зүгт 1 км-т/ үүрэг гүйцэтгэж байсан 3 алба хаагч угаартсан тухай дуудлагыг 05.19-ний өдрийн 11:45 цагт хүлээн авсан. Тус аймгийн Онцгой байдлын газрын Түмэнцогт сум дахь Эрэн хайх, аврах бүлгийн 1 алба хаагч, 1 автомашинтай 1 км замыг туулан 11:15 цагт очиход тус бүлгийн аврагч, дэд ахлагч Э /21 настай, эрэгтэй/, сумын Цагдаагийн хэсгийн цагдаа, цагдаагийн дэд ахлагч Г /26 настай, эрэгтэй/ нар угаартсан байсныг эмнэлгийн байгууллагад, хэсгийн төлөөлөгч, цагдаагийн дэслэгч Ж /35 настай, эрэгтэй/ угаартаж нас барсан байсан тул цогцсыг цагдаагийн байгууллагад шилжүүлэн өгсөн. Тус аймгийн Онцгой байдлын газрын дарга, хурандаа Т.Энхбаатар, тус аймаг дахь Цагдаагийн газрын дарга, цагдаагийн хурандаа Н.Лхагвасайхан нарын 14 алба хаагч, аймгийн Нэгдсэн эмнэлгийн 3 эмч, нийт 17 хүн, 4 автомашинтай ажлын хэсэг тус суманд мөн өдрийн 15:45 очиж ажиллаж байна. Цэргийн төв эмнэлгийн хордлогын яаралтай тусламжийн үндэсний төвийн их эмч, ахмад Т.Оролзодоор ахлуулсан ажлын хэсэг /ОБЕГ-ын 1, ХЯТҮТ-ын 4 алба хаагч/ ЗХ-ний 303 дугаар ангийн “МИ-171Е” загварын нисдэг тэргээр 05.20-ны өдрийн 06:05 цагт Улаанбаатар хот-Сүхбаатар аймгийн Түмэнцогт сумын чиглэлд нислэг үйлдэж 08:44 цагт буусан.
ОНЦГОЙ БАЙДЛЫН ЕРӨНХИЙ ГАЗАР