Онцгой байдлын ерөнхий газар, НҮБ-ын Гамшгийн эрсдэлийг бууруулах газартай хамтран “Гамшгийн эрсдэлийг бууруулах орон нутгийн стратеги боловсруулах сэдэвт” сургалтыг 2019 оны 8 дугаар сарын 20-21 өдрүүдэд Орхон аймагт зохион байгуулж байна.
Сургалтад Архангай, Булган, Дархан-Уул, Дорнод, Орхон, Сэлэнгэ, Сүхбаатар, Төв, Хөвсгөл, Хэнтий аймгийн Онцгой байдлын газар болон аймгуудын Засаг даргын тамгын газар, Гамшгийн эрсдэлийг бууруулах орон нутгийн зөвлөлийн нийт 50 гаруй мэргэжилтнүүд хамрагдаж байгаа юм.
Сургалтыг Онцгой байдлын ерөнхий газрын мэргэжилтнүүд болон НҮБ-ын Гамшгийн эрсдэлийг бууруулах газрын Зүүн хойд Ази болон Дэлхийн Боловсрол, сургалтын хүрээлэнгийн хөтөлбөрийн ажилтан Ана Торланд / Ms Ana Thorlund, Programme Officer, UNDRR GETI/ нар удирдан явуулж байна.
Сургалтын хүрээнд аймаг, орон нутгийн хэмжээнд гамшгийн эрсдэлийг бууруулах чиглэлээр хэрэгжүүлж байгаа арга хэмжээний талаар харилцан туршлага солилцож, гамшгийн эрсдэлийг бууруулах төлөвлөгөөг орон нутгийн түвшинд боловсруулах арга зүйд суралцан, цаашид хэрэгжүүлэх үйл ажиллагаагаа тодорхойлно гэж Онцгой байдлын ерөнхий газраас мэдээллээ.
