1.Цаг агаар:
Өнгөрсөн хоногт: Нийт нутгаар цаг агаар тогтуун байлаа.
Өнөөдөр: Салхи баруун хойноос 5-10 м/с. Дархадын хотгор, Хангай, Хөвсгөл, Хэнтэйн уулархаг нутаг, Хараа, Ерөө, Туул, Тэрэлж голын хөндийгөөр 0-5 градус, Увс нуурын хотгор болон говийн бүс нутгийн баруун хэсгээр 8-13 градус, Их нууруудын хотгор болон Алтайн өвөр говиор 15-20 градус, бусад нутгаар 5 -10 градус дулаан байна.
Улаанбаатар хотод: Багавтар үүлтэй, хур тунадас орохгүй, салхи баруун хойноос 5-10 м/с, 6-8 градус дулаан байна.
Төлөв байдал:17-нд баруун аймгуудын нутгийн баруун хэсгээр, 18-нд баруун аймгуудын нутаг, төвийн аймгуудын нутгийн зарим газраар хур тунадас, уулаараа цас орж, цасан шуурга шуурна. Бусад хугацаанд хур тунадас орохгүй. Салхи 17-нд Алтайн салбар уулс болон Арц Богдын өвөр хоолойгоор, 18-нд баруун аймгуудын нутаг, төвийн аймгуудын нутгийн баруун хэсгээр 14-16 м/с хүртэл ширүүсч шороон шуурга шуурна. Ихэнх нутгаар өдөртөө дулаарч Дархадын хотгор, Хангай, Хөвсгөл, Хэнтэйн уулархаг нутаг, Завхан голын эх, Хүрэн бэлчир орчим, Хараа, Ерөө, Туул, Тэрэлж голын хөндийгөөр шөнөдөө 10-15 градус хүйтэн, өдөртөө 4-9 градус дулаан, Их нууруудын хотгор болон Алтайн өвөр говиор шөнөдөө 2 градус дулаанаас 3 градус хүйтэн, өдөртөө 16-21 градус дулаан, бусад нутгаар шөнөдөө 3-8 градус хүйтэн, өдөртөө 7-12 градус дулаан байна. 18-нд нутгийн баруун хэсгээр сэрүүснэ.
2.Гал түймэр:
ААН, байгууллагын өмчид гарсан: Өвөрхангай аймгийн Хайрхандулаан сумын Эмээлт багийн “Бүрд” гэдэг газар /аймгийн төвөөс баруун зүгт 32 км-т/ Өвөрхангай аймгийн Арвайхээр сумаас Богд сум руу зорчиж явсан 26 зорчигчтой “Даевоо” загварын зорчигч тээврийн автобусны дугуй, хөдөлгүүр шатаж байна гэсэн дуудлагыг 10.13-ны өдрийн 19:24 цагт хүлээн авсан. Тус аймгийн Онцгой байдлын газрын Гал түймэр унтраах, аврах 12 дугаар ангийн 5 алба хаагч, 1 автомашинтай 32 км зам туулан 19:50 цагт очиж 1 цаг ажиллаж унтраасан.
Хувийн өмчид гарсан: Дархан-Уул аймгийн Дархан сумын 2 дугаар багт 4х5 метрийн хэмжээтэй байшин шатаж байна гэсэн дуудлагыг 10.13-ны өдрийн 15:19 цагт хүлээн авч тус аймгийн Онцгой байдлын газрын Гал түймэр унтраах, аврах 54 дүгээр ангийн 6 алба хаагч, 1 автомашинтай 3 км зам туулан 15:23 цагт очиж 15 минут ажиллаж унтраасан.
Нийслэлийн Баянзүрх дүүргийн 22 дугаар хороонд 5х3 метрийн хэмжээтэй байшин шатаж байна гэсэн дуудлагыг 10.13-ны өдрийн 17:40 цагт хүлээн авч тус дүүргийн Онцгой байдлын хэлтсийн Гал түймэр унтраах, аврах 63 дугаар ангийн 7 алба хаагч, 2 автомашинтай 4 км зам туулан 17:56 цагт очиж 5 минут ажиллаж унтраасан.
3.Зам, тээврийн осол:
Автозамын осол: Баян-Өлгий аймгийн Бугат сумын Бугын гол багийн “Тавалтайн рашаан” гэдэг газар /сумын төвөөс зүүн хойд зүгт 18 км/ суудлын автомашин онхолдож 1 хүн автомашины төмөр эд ангид хавчуулагдан нас барсан тухай дуудлагыг 10.13-ны өдрийн 13:40 цагт хүлээн авсан. Тус аймгийн Онцгой байдлын газрын 6 алба хаагч, 1 автомашинтай 18 км зам туулан 14:05 цагт очиход Ховд голд загасчилж явсан 3 зорчигчтой УАЗ-469 загварын суудлын автомашин онхолдож Өлгий сумын 6 дугаар багийн харьяат иргэн Ч /21 настай, эрэгтэй/ автомашины бүхээгт хавчуулагдан нас барсан тул цогцсыг гарган аймгийн Цагдаагийн газрын жижүүрийн бүрэлдэхүүнд шилжүүлэн өгсөн.
Нийслэлийн Сүхбаатар дүүргийн 10 дугаар хороонд 9 дүгээр дэлгүүрийн урд талд хатуу хучилттай автозамын зорчих хэсэгт суудлын автомашин мөргөлдөж автомашины төмөр эд ангид хүн хавчуулагдан гэмтсэн байна гэсэн дуудлагыг 10.13-ны өдрийн 23:14 цагт хүлээн авсан. Нийслэлийн Онцгой байдлын газрын Аврах ангийн 7 алба хаагч, 2 автомашинтай 6.5 км зам туулан 23:24 цагт очиход “Приус-20” загварын 1 зорчигчтой суудлын автомашин, “Портер” загварын бага оврын ачааны автомашины араас мөргөсний улмаас “Приус-20” загварын суудлын автомашины жолооч Чингэлтэй дүүргийн 12 дугаар хорооны харьяат иргэн Г /34 настай, эрэгтэй/ гэмтсэн тул эсэн мэнд гаргаж НТТТ-д шилжүүлэн өгсөн.
4.Эрэн хайх, аврах ажиллагаа:
Өндрөөс аврах: Нийслэлийн Баянгол дүүргийн 7 дугаар хороонд 5 давхар орон сууцны барилгын 2 дугаар давхрын цонхоор бага насны хүүхэд унах гээд байна гэсэн дуудлагыг 10.13-ны өдрийн 18:25 цагт хүлээн авсан. Нийслэлийн Онцгой байдлын газрын Аврах ангийн 8 алба хаагч, 2 автомашинтай 6 км зам туулан 18:41 цагт очиход тус байрны оршин суугч иргэн М-ийн С /6 настай, эмэгтэй/ цонхны тавцан дээр зогсч байсныг эсэн мэнд буулгаж ар гэрийнхэнд нь шилжүүлэн өгсөн.
ОНЦГОЙ БАЙДЛЫН ЕРӨНХИЙ ГАЗАР