1.Цаг агаар:
Өнгөрсөн хоногт: Баянхонгор, Дорноговь, Өвөрхангай, Өмнөговь, Сүхбаатар аймгуудын нутгаар цас орсон. Бусад нутгаар цаг агаар тогтуун байлаа.
Өнөөдөр: Ихэнх нутгаар солигдмол үүлтэй. Говь болон зүүн аймгуудын нутгийн зүүн өмнөд хэсгээр цас орж, цасан шуурга шуурна. Бусад нутгаар цас орохгүй. Салхи баруун аймгуудын нутгаар баруун өмнөөс, бусад нутгаар баруун хойноос 6-11 м/с. Дархадын хотгор, Монгол-Алтай, Хангай, Хөвсгөлийн уулархаг нутаг, Хүрэн бэлчир орчим, Завхан голын эх, Идэр, Тэс голын хөндийгөөр 6-11 градус, Хэнтийн уулархаг нутаг, Хараа, Ерөө, Туул, Тэрэлж голын хөндийгөөр 0-5 градус хүйтэн, Алтайн өвөр говиор 5-10 градус дулаан, бусад нутгаар 2 градус хүйтнээс 3 градус дулаан байна.
Улаанбаатар хотод: Багавтар үүлтэй. Цас орохгүй. Салхи баруун хойноос 6-11 м/с. 0-2 градус дулаан байна.
Төлөв байдал: 26-нд баруун аймгуудын нутгийн хойд хэсгээр, 27-нд баруун аймгуудын нутгийн зүүн хэсэг, төвийн аймгуудын ихэнх нутаг, зүүн аймгуудын нутгийн баруун хэсэг, 28-нд зүүн аймгуудын нутгийн зүүн хэсгээр цас орж, цасан шуурга шуурна. Салхи 25-26-нд Алтайн салбар уулсаар, 27-нд ихэнх нутгаар, 28-нд зүүн аймгуудын нутгаар түр зуур 18-20 м/с хүртэл ширүүсч шороон шуурга шуурна. Дархадын хотгор, Завхан голын эх, Идэр, Тэс голын хөндий, Хүрэн бэлчир орчмоор шөнөдөө 15-20 градус хүйтэн, өдөртөө 1 градус дулаанаас 4 градус хүйтэн, Алтай, Хангай, Хөвсгөл, Хэнтэйн уулархаг нутаг, Хараа, Ерөө, Туул, Тэрэлж, Хэрлэн, Онон, Улз голын хөндийгөөр шөнөдөө 10-15 градус хүйтэн, өдөртөө 1 градус хүйтнээс 4 градус дулаан, говийн бүс нутгийн өмнөд хэсгээр шөнөдөө 1-6 градус хүйтэн, өдөртөө 6-11 градус дулаан, бусад нутгаар шөнөдөө 5-10 градус хүйтэн, өдөртөө 2-7 градус дулаан байна.
2.Гал түймэр:
Хувийн өмчид гарсан: Дорноговь аймгийн Сайншанд сумын 8 дугаар багт 4 ханатай гэр шатаж байна гэсэн дуудлагыг 10.23-ны өдрийн 15:28 цагт хүлээн авч тус аймгийн Онцгой байдлын газрын Гал түймэр унтраах, аврах 33 дугаар ангийн 7 алба хаагч, 1 автомашинтай 3,2 км замыг туулан 15:32 цагт очиж, 10 минут ажиллаж унтраасан.
Баянхонгор аймгийн Баянхонгор сумын Цагаанчулуут багт 5 ханатай 2 гэр шатаж байна гэсэн дуудлагыг 10.23-ны өдрийн 15:51 цагт хүлээн авч тус аймгийн Онцгой байдлын газрын Гал түймэр унтраах, аврах 16 дугаар ангийн 6 алба хаагч, 2 автомашинтай 3,5 км замыг туулан 15:56 цагт очиж, 10 минут ажиллаж унтраасан.
Нийслэлийн Сонгинохайрхан дүүргийн 31 дүгээр хороонд 4х5 метрийн хэмжээтэй байшингийн дээвэр, үүдний амбаар шатаж байна гэсэн дуудлагыг 10.23-ны өдрийн 16:44 цагт хүлээн авч тус дүүргийн Онцгой байдлын хэлтсийн Гал түймэр унтраах, аврах 26 дугаар ангийн 8 алба хаагч, 2 автомашинтай 4,5 км замыг туулан 16:50 цагт очиж, 30 минут ажиллаж унтраасан.
Сонгинохайрхан дүүргийн 2 дугаар хороонд 6х7 метрийн хэмжээтэй байшингийн дээвэр шатаж байна гэсэн дуудлагыг 10.23-ны өдрийн 23:11 цагт хүлээн авч тус дүүргийн Онцгой байдлын хэлтсийн Гал түймэр унтраах, аврах 26 дугаар ангийн 8 алба хаагч, 2 автомашинтай 5 км замыг туулан 23:18 цагт очиж, 30 минут ажиллаж унтраасан.
Хан-Уул дүүргийн 4 дүгээр хороонд 5 ханатай гэр шатаж байна гэсэн дуудлагыг 10.24-ний өдрийн 01:00 цагт хүлээн авч тус дүүргийн Онцгой байдлын хэлтсийн Гал түймэр унтраах, аврах 14 дүгээр ангийн 8 алба хаагч, 2 автомашинтай 8 км замыг туулан 01:09 цагт очиж, 20 минут ажиллаж унтраасан. Уг гал түймэрт иргэн Г /42 настай, эрэгтэй/ угаартсан байсныг ЯТТТ-ийн их эмчид, иргэн Б /32 настай, эрэгтэй/ галд түймэрт өртөж нас барсан тул цогцсыг тус дүүргийн Цагдаагийн 2 дугаар хэлтсийн мөрдөн байцаагчид шилжүүлэн өгсөн.
3.Зам, тээврийн осол:
Автозамын осол: Булган аймгийн Бугат сумын Ханжаргалант багийн “Түлүүгийн даваа” гэдэг газар /аймгийн төвөөс баруун зүгт 50 км-т/ Хөвсгөл аймгаас Улаанбаатар хотын чиглэлд нийслэлийн Чингэлтэй дүүргийн 14 дүгээр хорооны харьяат иргэн Б /40 настай, эрэгтэй/-ын жолоодож явсан “Портер” загварын бага оврын ачааны автомашин /2 зорчигчтой/ Хөвсгөл аймгийн Мөрөн сумын харьяат иргэн Э /38 настай, эрэгтэй/-ын жолоодож явсан “Королла Аксио” загварын суудлын автомашинтай /4 зорчигчтой/ мөргөлдсөн тухай дуудлагыг 10.24-ний өдрийн 02:26 цагт хүлээн авсан. Тус аймгийн Онцгой байдлын газрын Гал түймэр унтраах, аврах 20 дугаар ангийн 2 алба хаагч, 1 автомашинтай 50 км замыг туулан 03:53 цагт очиж, 8 иргэнийг эмнэлгийн байгууллагад хүлээлгэн өгсөн.
4.Эрэн хайх, аврах ажиллагаа:
Эрэн хайх ажиллагаа /төөрсөн/: Өмнөговь аймгийн Цогтцэций сум (Тавантолгой)-ын Цагаан-Овоо багийн “Цагаан-Эрэг” гэдэг газар /сумын төвөөс баруун хойд зүгт 27 км-т/ Даланзадгад хотоос Цогтцэций сумын чиглэлд иргэн Б-гийн жолоодож явсан “Тоёота Гранд Марк 2” загварын суудлын автомашин /2 зорчигчтой/ 18:00 цагийн орчим төөрч, цасанд суусан тухай дуудлагыг 10.23-ны өдрийн 22:48 цагт хүлээн авсан. Тус аймгийн Онцгой байдлын газрын Цогтцэций сум дахь Гал түймэр унтраах, аврах 44 дүгээр ангийн 7 алба хаагч, 2 автомашинтай эрэн хайх ажиллагааг зохион байгуулж, 10.24-ний өдрийн 04:13 цагт сумаас 35 км-т “Хөх толгой” гэдэг газраас иргэдийг эсэн мэнд олж, сумын төвд авчирсан.
Эрэн хайх ажиллагаа /сураггүй болсон/: Өмнөговь аймаг, Цогтцэций сум (Тавантолгой)-ын Сийрст багийн “Бухан-Овоо” гэдэг газар /сумын төвөөс зүүн урд зүгт 17 км-т/ малчин Г /40 настай, эрэгтэй/, О /25 настай, эрэгтэй/ нар 10.23-ны өдрийн 18:00 цагийн орчим малдаа яваад сураггүй болсон тухай дуудлагыг 10.23-ны өдрийн 23:27 цагт хүлээн авсан. Тус аймгийн Онцгой байдлын газрын Цогтцэций сум дахь Гал түймэр унтраах, аврах 44 дүгээр ангийн 1 алба хаагч, ‘’Эрдэнэс таван толгой’’ ХХК-ийн 4 ажилтан, 2 автомашинтай, ар гэрийн 6 хүн, 1 автомашин, нийт 11 хүн, 3 автомашинтай эрэн хайх аврах ажиллагааг зохион байгуулж, гэрээс нь урд зүгт 1 км-т ‘’Эргийн бууц’’ гэдэг газраас 10.24-ний өдрийн 00:45 цагт иргэдийг эсэн мэнд олж, ар гэрт нь хүлээлгэн өгсөн.
Өмнөговь аймгийн Ханбогд сумын Баян багийн “Улаан-Эрэг” гэдэг газар /сумын төвөөс зүүн урд зүгт 45 км-т/ малчин Д /39 настай, эрэгтэй/ 10.23-ны өдрийн 14:00 цагийн орчим малдаа яваад сураггүй болсон тухай дуудлагыг 10.24-ний өдрийн 00:38 цагт хүлээн авсан. Тус аймгийн Онцгой байдлын газрын Ханбогд сум дахь Гал түймэр унтраах, аврах 66 дугаар ангийн 4 алба хаагч, сумын ЗДТГ-ын 4 ажилтан, ар гэрийн 5 иргэн, нийт 13 хүн, 4 автомашинтай эрэн хайх ажиллагааг зохион байгуулж, мөн өдрийн 04:35 цагт гэрээс нь зүүн урд зүгт 20 км-т “Сэмжидийн хоолой” гэдэг газраас эсэн мэнд олсон.
Булган аймгийн Булган сумын 4 дүгээр багт иргэн Б-гийнд байсан Г /8 настай, эрэгтэй/ 10.24-ний өдрийн 01:50 цагт гэрээсээ гараад сураггүй болсон тухай дуудлагыг мөн өдрийн 02:50 цагт хүлээн авсан. Тус аймгийн Онцгой байдлын газрын Эрэн хайх, аврах салбарын 5 алба хаагч, 1 нохой, 1 автомашин, аймгийн Цагдаагийн газрын 2 алба хаагч, 1 автомашин, ар гэрийн 9 иргэн, 2 автомашин, нийт 16 хүн, 4 автомашинтай эрэн хайх ажиллагааг зохион байгуулж, мөн өдрийн 05:30 цагт тус сумын 4 дүгээр багийн иргэн С-ийн гэрт унтаж байхад нь олж, ээж Г-д хүлээлгэн өгсөн.
ОНЦГОЙ БАЙДЛЫН ЕРӨНХИЙ ГАЗАР