ОБЕГ-ын харьяа Үндэсний аврах бригадын Хөгжмийн салбарын аврагч-хөгжимчин, цахилгаан хөгжмийн “Тэнгэр” хамтлагийн дуучин, ахлах ахлагч Б.Дорждэрэм “Энхийн элч” анхны бие даасан тоглолтоо 2019 оны 11 дүгээр сарын 07-ны өдрийн 19:00 цагт “UB PALACE”-ийн концертын их танхимд хийх гэж байна.
Ахлах ахлагч Б.Дорждэрэм нь 2000-2005 онд “Хөгжим бүжгийн коллеж”-ийг хөгжимчин мэргэжлээр, 2005 онд СУИС-ийн дуулаачийн ангид эчнээгээр суралцаж төгссөн. Мэргэжлээрээ УДБЭТ, Үндэсний их театрт ажилласан байсан.
Харин 2015 оноос хойш ОБЕГ-ын харьяа Үндэсний аврах бригадын Хөгжмийн салбарын аврагч-хөгжимчин, цахилгаан хөгжмийн “Тэнгэр” хамтлагийн дуучнаар ажиллаж байна.
Энэ хугацаанд нийслэлийн цэргийн хүрээний байгууллагуудын дунд зохион байгуулагддаг ”Монгол цэргийн жавхаа-2016’’ үлээвэр хөгжимчдийн улсын уралдаанд тэргүүн байр, 2018 онд зохион байгуулагдсан МУСТА, хөгжмийн зохиолч Н.Сандагсүрэнгийн нэрэмжит “Үлээвэр хөгжимчдийн улсын анхдугаар уралдаан”-д оролцож, гуравдугаар байр эзэлж байсан.
Мөн тэрээр ОХУ-ын Саратов, Улаан-Үд, Эрхүү зэрэг хотуудад “Ялалтын баярын тоглолт” болон “Үлээвэр хөгжимчдийн фестиваль”-д оролцож, ая дуугаа өргөж байсан юм гэж Онцгой байдлын ерөнхий газраас мэдээллээ.
